13
1 Asun üng kkhyaang päe üng ka akhäk noh Booi Jeishüh üng Kalile üng ka kkhyaange sun khah naak kkhyüng kshei ah nih jah shoih k'um üng Pilat booi noh ah jah hnim shaka mong ah nih mtheh u.
2 Booi Jeishüh noh ta “Asun kba ah nih jah hnim Kalile kkhyaange sän akse Kalile kkhyaang abänga kthaka mkhye mshoh bok ktie atia nah nih ngngaih u mä.
3 Am ni. Kei kah ning jah mtheh kkhai. Nang nih-e phi am nah nih vuuk be u ta nah nih bäng asun kba kuunga nah nih sim pyak kkhaie ni.
4 Shilom üng ka tou naak lung kshang ah jaam üng kkhyaang xalei kkhyet thik ktie ti sun nah nih ngjak ktie va am ni bä. Thik kti xalei kkhyet akse Jeirüh Shalem mlüh mah-ea kthaka mkhye mshoh bok ktie atia nah nih ngngaih u mä.
5 Am ni. Kei kah ning jah mtheh kkhai. Nang nih-e phi am nah nih vuuk be u ta nah nih bänga asun kba kuunga nah nih sim pyak kkhaie ni” tilü ah jah mtheh.
6 Kona Booi Jeishüh noh pum üng msäp lü ah jah mtheh ta “Kkhyaang mat noh ah ngbom ngvoonga kthei dung ah jah nglin shak mjoh. Aktheih kphyüt ei kkhaia ah büh vaai üng nglung mat phi am hmuvaai mjoh.
7 Asun üng ta ngvoong mah noh ah xüh ei üng ‘Bük ma-a. Hina kthei dung aktheih kphyüt kkhaia kah lo lo naak kum kthum lohnüh kti. Lüphi aktheih laang am hmu ngü. Asuna thoon lü hina kthei dung hin nah khyuk in vai ni. Amdanga mdek kooi kaih kti ni’ tilü ah pyen mjoh.
8 Xüh shoh noh ta ‘Angvaaio, ve sa ma she. Kum mat sa däk nih tama vai. Aphung hlong kthoong peet ngüshe ksiin kah mbei ma vai ni.
9 Sheeng kuma ah ngtheih-a ta do kkhai shü. Am ah ngtheih lo ta sheeng kum su khyuk-in vai’ ah ti be mjoh” tilü ah pyen.
10 Pangsiim ngam püi mhnüüp mat üng ta Booi Jeishüh noh Sangsiim ngthei naak kyonga jah msuuk mtheh kti.
11 Asu sua kho yaai noh vaan nalü kum xalei kkhyet ah kut kho ngpyan-in kti nghnu mi mat vek kti. Ah nih sun ah kkhyüng kuluk-in lü angdäih-a am vethei.
12 Booi Jeishüh noh asuna nghnu mi hmulü ta ah veeia khü lü ah nih üng “Nghnu mio, am nah khyaih eia kkhyüh nah lät hnüh kti ni” tilü ah pyen.
13 Asun üng ah nih-a kkhaana ah kut ah mtaan jah ngdäih lobe lü Pangsiim ah mküüi mtou lo.
14 Lüphi Pangsiim ngam püi mhnüüp üng Booi Jeishüh noh ah jah mdo bea phäh Sangsiim ngthei naak kyong up kti noh ah thi naak. Asuna thoon lü kkhyaange üng “Khüüi naak vai kho mhnüüp kkhyuk vek kti. Am nah nih khyaih ei akhyüh be vaia asunea mhnüüp üng lokom u kti. Pangsiim ngam püi mhnüüp asuna phäh am ni” tilü ah jah mtheh.
15 Booi Jeishüh noh ta “Pangsiim lei shong ktia hana ngsom ktieo, nah nih bänge hin noh hjok khah mhnüüp üng nah nih she mse jah nah nih she la ah nih ei kkoa hlonga ngkhun ei kti shuut lü tui nah nih tu ei vaai khoi ktie va am ni bä.
16 Ahina nghnu mi hin Apyahama sa ni. Shatan yaai pa noh ah nih sun kum xalei kkhyet ah khun phep ni. Asun üng Pangsiim ngam püi mhnüüp üng am hlät phya mä” tilü ah pyen.
17 Asun kba ah pyen lo üng Booi Jeishüh kpet mjak ktie sun ngke ei lok ktie. Kkhyaang abäng sun Booi Jeishüh-a poh mün sam kshea phäh mün sam pi pi ktie.
(Mate 13.31-32; Marküh 4.30-32)
18 Booi Jeishüh noh “Pangsiima pe hin i üng täng kti ni. I üng mshuui msäp lü pyen vai ni.
19 Pangsiima pe hin Isare an ne ui mat üng täng kti ni. Kkhyaang mat noh an ne ui seh lü ah loua ah phuh ei. Adung akdäm nua thoon lobe kti. An ne dunga ngbaan üng kkhae noh ah nih ngbu tu-ei ktie” tilü ah jah mtheh.
(Mate 13.33)
20 Asun üng Booi Jeishüh noh “Pangsiima pe hin i üng mshuui msäp vai ni.
21 Pangsiima pe hin kkhaai phoom üng täng kti. Nghnu mi mat noh kkhaai kkhui sit mat sun kkhaai phoom api sa üng kso lü abäng sun phoom lok kti” tilü ah pyen.
(Mate 7.13-14, 21-23)
22 Booi Jeishüh sun Jeirüh Shalem mlüh da ah kdung naak lam naküta mlüh ngnamea vaang hü lü kkhyaange ah jah msuh mtheh.
23 Kkhyaang mat noh “Booi Pao, kkhyaang alääm sa noh mä kuum kyan naak ah nih yah kom” tilü Booi Jeishüh üng ah kthäh.
24 Booi Jeishüh noh ta “Mkot akdiik üng Pangsiima pea nah nih vaan vai mtun ei ua. Kei noh kah ning jah mtheh ma kkhai. Kkhyaang kho hah pa lut hlükyo ulü phi am lut khoh u.
25 Im mah thou lolü kshoh sun khaai-in kkhai. Asun üng nang nih-e sun kho kpunga ngdüüi-in u kti lü kshoh nah nih kkhok kkhaie. ‘Booi Pao, kshoh nah nghmon ma tua’ tilü nah nih khü kkhaie kyo. Im mah noh ta ‘Nang nih hoa kae ni. Am ning hmat u ngü’ tik kkhai.
26 Asun üng nang nih-e noh ‘Kei nih-e hin buh phi ayüma nah jah ei püi khoi ni. Kah nih ngnam kshuunga nah jah msuuk mtheh khoi kti ni’ tilü nah nih pyen be kkhaie.
27 Lüphi im mah pa noh ‘Kah ning jah mtheh be tü kkhai ni. Nang nih hoa kae ni. Am ning jah hmat ngü. Nang nih kkhyaang kshe-e am ning jah hmuhlü u ngü. Shot hü ua’ tilü pyen kkhai.
28 Apyaham, Isak, Jakop jah shahma ngsiim abäng sun Pangsiima pea ah nih ve ei u nah nih jah hmuh üng nang nih-e ta ah nih ning mshot ua thoon lü kyap u kti lü mni suui ha kkhyüüt nah nih thoon kkhaie ni.
29 Nghngi lo, kho kyaak, sum shiip naküta ka kkhyaange lohü ulü Pangsiima pea ei ook pooi üng ngshut lok kkhaie.
30 Ngngaai ua. Tuh hi hnua vek kti akhäk hin Pangsiima pea ta ma-a veyah kkhaie. Tuh hi ma-a vek ktie akhäk hin Pangsiima pea ta hnua veyah kkhaie ni” tilü ah jah mtheh.
(Mate 23.37-39)
31 Asuna ksüün üng Pharishe-e akhäk lo-ulü Booi Jeishüh üng “Ahina khyonga kkhyüh shota. Shang phuhlang Herot noh ning hnim hlük kti ni” tilü ah nih mtheh u.
32 Booi Jeishüh noh ta “Herot hin sha uia kba lim ma kti ni. Sit lü ah nih üng ‘Ngngaaia, tuh ngooi jah kho ngooia kho yaaie jah kshät ngüshe am khyaih kti kah jah mdo be kkhai. Amhnüüp kthuma mhnüüp üng kah khuut poh ngpääng lok kkhai’ tilü kah pyen hin mtheh vaai ua.
33 Kei ta tuh ngooi, kho ngooi, amhnüüp be tü üng kdung seh kah mhläi yah kkhai. I a thoon lüni ti ta shahma ngsiim mat hin Jeirüh Shalem mlüh käh nik kti mlüh ksea hnim ah khaam ei vai am looi ngkäih.
34 Jeirüh Shalem mlüh mah-eo, Jeirüh Shalem mlüh mah-eo, shahma ngsiim nah nih jah hnim thak thak ktie. Pangsiim noh nah nih veeia ah jah tüih lo ngshäe lung üng nah nih jah khoong tong u. Aai nu noh aai sae ah ngphya kkea ah jah vopa kba kei noh phi nang nih Jeirüh Shalem kkhyaang sae kah ning jah vop hlü be kyo u. Lüphi kah veeia am lohlü u kti.
35 Ngngaai ua, Pangsiim nah nih hlonga am veti. Kah ning jah mtheh ma kkhai. Nang nih-e noh ‘Pangsiima ksah-a lok kti hin do kya naak vek kti’ tilü nah nih pyena mhnüüp vei säpa kei am nah hmuti u kti” tilü ah jah msuh mtheh.