12
(Mate 10.26-27)
1 Asun üng kkhyaange thoong kho hah pa ngkhääm lo-ulü ah nih püi phi leh-in täh vek ktie. Booi Jeishüh noh aksüka akläke üng “Pharishe-ea kkhaai phoom ta kyüh kshe ni. Mseei ei ubä. Ngpyuun ktia hana som ktie ni.
2 Lüphi ngthuh ngvih naküt ktie hin mhnüüp mat üng ta pou lok kkhaie ni. U a am kshing naküt hin phi ngshing ngte lok kkhai ni.
3 Anghmüp naaka ah nih pyen kshak hüte sän kkhyaange noh kho mhnüüp kvaaia ngjak kkhaie ni. Küng nu kkepa nah nih mship mhjop sän ngnam kshuunga kkhyaange noh kpyaü hü kkhaie ni.
(Mate 10.28-31)
4 Kah püieo, kah ning jah mtheh kkhai. Nah nih puum sha ah nih ning hnim kona ta i a phi am ning poh khoh ti kkhai kkhyaang nghngi siime käh jah kyüh ua.
5 U nah nih kyüh vai hlü kti atia kei noh kah nih ning mtheh kkhaie. Kkhyaanga puum sha mthih lü Mulai pea kkhyaak vaia hiit vek kti Pangsiim bä kyüh ua. Aksanga kah ning jah mtheh kti. Ah nih sun kyüh ua.
6 Khi khik sa puum mhma sän phe mata ah nih joih u ni. Lüphi asuna khi khik sa puum mat phi Pangsiim noh am mhnih laang.
7 Ngngaai ua, nah nih lu üng ka lu sham abäng phi Pangsiim noh ah kkheh pääng ni. Käh kyüh ei ua. Khi khik kho hah pa-a kthaka Pangsiim noh aphu kküüi boka ah ning jah ngngaih u ni.
8 Kah nih ning mtheh ma kkhai. ‘Kei hin Jeishüh üng kah shääng ei kti’ tilü kkhyaangea ma-a pyen kti naküta mong sun ‘Kei Kkhyaang Sa noh phi ah nih hin kei üng shääng ei kti ni’ tilü Pangsiima kkhaan kho ngshäea ma-a kah pyen kkhai ni.
9 Lüphi ‘Kei hin Jeishüh üng am shääng ei ngü’ tilü kkhyaangea ma-a pyen kti naküta mong sun kei noh phi ‘Ah nih hin kei üng am shääng ei laang’ tilü Pangsiima kkhaan kho ngshäea ma-a kah pyen kkhai ni.
10 Kei Kkhyaang Sa nah kshe nak kti ta Pangsiim noh asuna mkhye sun mhlät khoh kti. Lüphi Mkhyangsiim thang msheet kti ta asun kba ah mkhye sun anghläia ah ve ei püi ni.
11 Kkhyaange noh Sangsiim ngthei naak kyonga ni, khong mangea ma-a ni, aso-yah booiea ma-a ni, nang nih-e ah ning jah khü u üng ‘I hok kba kah pyen kkhai ni. I hok kba kah ng'yung ei kkhai ni’ tilü käh sääi ubä.
12 Asun k'um bä bä üng i hok kba nah nih pyen vai sun Mkhyangsiim noh ning jah mtheh kkhai ni” tilü ah pyen.
13 Kkhyaang päe üng ka mat noh Booi Jeishüh üng “Angvaaio, kah be noh kah nih pa noh ah taak hüt khoh kei üng ah nah pa vaia kah be üng mtheh-a” tilü ah pyen.
14 Booi Jeishüh noh ta “Nang nih ning jah si jaang kkhai jah nah nih pa-a khoh hat nah nih ngpa ei vaia phäh kei noh kah pyen vai am hlü” tilü ah mshak be.
15 Kona kkhyaange üng “Ngui xüi külak käh kpaam ei ua. Kkhyaang mat hin i a mäia ngui xüi külak ta-ei kyo lüphi asun üng angshääia xün naak am yah khoh.”
16 Kona Booi Jeishüh noh pum üng msäp lü ah jah mtheh ta “Booi ei kti kkhyaang mat sun ah laia tun, saang kho hah pa ah pha mjoh.
17 Ah nih noh ‘Kah tun saange jah taak naak vai am oong ti kti ta i üng kah taak päih vai ni’ tilü ah pät sun noh ngngaai ei lü ve mjoh kti.
18 Asun üng ah nih noh ‘I hok kba kah poh vai ti ta kah kkhei kphyüme jah phye ngüshe kkhei kthaai akdäm nua kah sha-be kkhai. Asun üng kkhyääi jah to ngmaai naküt kah taak ei vai ni.
19 Asun kona kah pät noh kah pät kah pyen kkhai. Kei akam mah pi pi ni. Ngooi nu ngooi pa vei ei vai kho hah kuung kah ta-ei kti. Ngngaih k'hnipa kah vehnüh kkhai. Kah ei ook hlü mjü kküm ei o-ngüshe kah ve ve hlüa je je kyai kyaia kah ve-ei kkhai’ ah ti mjoh.
20 Lüphi Pangsiim noh ah nih üng ‘Nang hin nah nghmoong kti va nik kba. Sheep mthan nah thik kkhai ni. Nah taak ei naküt u noh van nak kkhai ja’ tilü ah pyen mjoh.
21 Ah nih khoh kkhyam vai thak mtun ei ktia kkhyaang naküt asuna Booi nghmoong üng täng ktie ni. Ah khoh kkhyam naküt sun Pangsiima hmaai ma-a i a phi am kyah laang” tilü ah jah mtheh.
(Mate 6.25-34)
22 Asun üng Booi Jeishüh noh akläke üng “Asun kba thoon lü kei kah pyen ma kkhai. Nah nih xün naak vai ei ook vaia phäh käh ng'äh ngkhyah ua. Nah nih puum sha-a phäh i shui shak vai atia käh pyang ma ua.
23 Nah nih shak hin ei ooka kthaka aktung bok ni. Nah nih puum sha hin shui shaka kthaka phu mah bok kti ni.
24 Vang aake sän jah bük lü ngngaai shüm ua. Vang aake sän noh msi mna am sho nglin ei u. Avui ktheih phi am xät aat ei u. Ah nih veeia kkhei jah kyäng phi am ve. Lüphi Pangsiim noh asune ah jah mbei ni. Nang nih-e ta kkha-a kthaka käh kkheh päih-a nah nih phu mah ktie ni.
25 Nah nih sääi siing naak üng nah nih shak sun kho mhnüüp mat sa hngoh phi mshaaü ei vaia am khyaih khoh u kti.
26 Asun sa hngoh phi am khyaih ei khoh mah mah u kti lü i lü amjü kküma phäh-a nah nih pyang ma xa ktie ni.
27 Mik ku paaie sän jah bük lü ngngaai shüm ua. Phai phi am bi u. Tah phi am tak u. Lüphi kah ning jah mtheh kkhai. Jou taai kti shang phuhlang Sholoh Monga shui shak kkyäp ah shui shak hngoh noh phi mik ku paaia ngtou ngtaai am ngteh püi.
28 Jum ei naak am vek ktieo, tuh ngooi moa paai kti adunge sän kho ngooia mei üng shi vaia thoon kyo lüphi Pangsiim noh angtou ngtaaia ah piit pyaang ni. Asun kba ani ta Pangsiim noh asuna kthaka do kya pyei ktia ning jah mshui mshak kkhaie am ni bä.
29 ‘Kei noh i kah ei ok kkhai ni’ tilü ngngaai lü käh pyang ma ua.
30 Hina kho mdek üng ka Pangsiim am kshing kti kkhyaang mjü kküm noh ah nih ei ook vaia phäh-a mtun ei ktie. Asun bange nang nih üng hlü kti atia nah nih Pa Pangsiim noh hmat kti ni.
31 Asun banga phäh käh ng'äh ngkhyah lü Pangsiima pea phäh mtun ei ua. Asun kba nah nih thoon ta hlü kti sun Pangsiim noh ning jah pek kkhai.
(Mate 6.19-21)
32 Nang nih to pä sao, käh kyüh ei ua. Nah nih Pa Pangsiim noh ah upa pe üng nah nih ngpüi vaia hlü ei kti ni.
33 Nah nih külak naküt jooi lü ngui nah nih yah sun ampyeen kshe-e üng jah yet ua. Asun üng käh sim pyak laang kkhai khoh kkhyam nah nih yah ei kkhaie. Am khyük leih khoh kkhai msum ngui phi kkhaan khoa nah nih yah kkhaie. Asun ta mpyuk ei noh am yah khoh. Mkhya noh phi am ei yah.
34 I lüni ti ta nah nih khoh kkhyama ve naaka nah nih mlung phi vek kti ni.
35 Khä tääng säk ei ua. Mei phäih mdääi ei ua.
36 Salaak pooia kkhyüh phalo be hnüh kkhai ah nih mah pa mtät-in kti xüh shoh-ea kba ve ua. Ah nih nih-e ta ah nih mah pa phalo be lü kshoh ah kkhok lo jah nghmon peet hnaam kkhaia ngshääm ktie ni.
37 Ah mah pa ah lo be üng ah xüh eie noh käh ip lü mtät ktie ah jah hmuh üng asuna xüh shoh-ea phäh do kya naaka thoon kti. Ngngaai ua kei kah pyen ma kkhai. Ah mah pa ah pät kuung ngpyaih xat lü ah xüh shoh-e sun buh k'ei vaia jah ngshut shak lü shook tik piit pyaang lü jah mbei kkhai ni.
38 Ah mah pa sun mthan nglunga am ani üng aai khoona ah pha lo be üng ah xüh eie noh asun kba ah nih mtäh u sun ah hmuh üng xüh shoh-ea phäh do kya naaka thoon kti.
39 Ahin phi nah nih kshing ei vai ni. Mpyuk eia lo vaia ksüün ah mah pa noh ah nah kshing ei vaia athoon ta ah nih noh ah namtät lü mpyuk ei i am vaan shak.
40 Nang nih-e phi ngpyaih xat lü nah nih ngshääm yah kkhaie. I lüni ti ta u noh am ah ngngaih hmuh vaia ksüün üng kei Kkhyaang Sa kah phalok kkhai” tilü ah jah mtheh.
41 Peta noh “Booi Pao, asuna pum msäp naak kei nih-ea phäh mä. Kkhyaang abänga phäh nah pyen mä” tilü ah kthäh.
42 Booi Jeishüh noh “Ah mah pa-a üm naaka ngyam mah kti xüh shoh sun u ja. Ah mah pa noh ah kkyoong long büh peet kkhaia msoon kkhai ni. Ah nih noh xüh shoh akse-e sun aksüün ksüün üng ah nih ei ook vai shoon jah pek kkhai ni.
43 Ah mah pa kdunga kkhyüh ah lo be üng kkyoong long bük kti xüh shoh noh asun kba ah poh mshah ksang sun ah hmuh lo üng asuna xüh shoh-a phäh do kya naaka thoon kti.
44 Ngngaai ua, kei kah pyen ma kkhai ni. Ah mah pa noh ah khoh van naküt up kkhaia xüh shoh sun msoon kkhai ni.
45 Lüphi asuna xüh shoh noh ‘Kah mah pa-a pha lo be vai hjou pyei ham kkhai ni’ tilü ah pät noh ah pät ngngaai lü xüh shoh akse nghnu mi kpa mie sun jah hnep ei lü ah jah te. Ah hlü hlü eia ei lü ju o-lü mpyüi kti.
46 Kkyoong long up kti xüh shoh noh am ah ngngaih hmuh jah am ah kshinga ksüün üng im mah pa phalo be kkhai. Xüh shoh sun mtaam pek kshe kkha lü Pangsiim am üm nak kti kkhyaange üng ayüma tak kkhai ni.
47 Ah mah pa-a hlü ei kshing mah mah lüphi käh ah nangshääm lü ah mah pa-a hlü eia kba phi käh poh mshah lü ve mjoh kti. Ah mah pa noh xüh shoh sun jah te shak hlaak hlaak kkhai ni.
48 Lüphi ah mah pa-a hlü ei am hmat kti xüh shoh ta te naak ngkäih vai ah poh ave üng alääma jah te shak kkhai. Pangsiim noh mat mat üng kshing hmat naak kho hah pa ah peet ta asuna kkhyaang noh ah nih sun ah ksang naak be pyei vai Pangsiim noh mkhüh nak kti ni. Kkhyaang mat mat üng ah nih ap anunga athoon üng ah mta-a kba poh kkhai tia phi jum hnam ktie.
(Mate 10.34-36)
49 Hina kho mdek hin mei üng mdääi kkhaia kah lok kti. Tuh kuung hi mei mpho vai kah hlü ei pyei kti ni.
50 Kei noh khui kha kshe nu kah khaam ei yah ham kkhai. Asun kah phyäät vaai vei säpa kah mlunga shük khyak kshe kah suun ei yah kti.
51 Hina kho mdek diim deih naak vaia kah lok ktia nah nih ngngaih uo. Am ni. Kah pyen ma kkhai. Kei hin kkhyaangea ngkhoi ngpa naak lo vaia kah lok kti ni.
52 Tuh-a kkhyüh lü kkhyaang mhma vek kti kkyoong long üng kthum noh nghngih sun kpet mjak lü nghngih noh kthum sun kpet mjak kkhai ni.
53 Ah pa jah ah sa kpa noh ah nih püi kpet mjak kkhai xooi. Ah nu jah ah sa nghnu noh ah nih püi kpet mjak kkhai xooi. Ah si si jah ah na na noh ah nih püi kpet mjak kkhai xooi. Asune abäng phi ngkhoi ngpa kkhaie ni” tilü ah pyen.
(Mate 16.2-3)
54 Booi Jeishüh noh kkhyaang pä üng “Kho kyaak da ngmeia ngvuuk lo üng nang nih-e noh ‘Kho a-lo hnüh kkhai’ tilü nah nih pyen ei khoi ktie. Asun kba kuunga thoon lok kti ni.
55 Sum kho ah khi lo üng nang nih-e noh ‘Kho hlok hnüh kkhai’ tilü nah nih ti ei ktie. Asun kba kuunga thoon lok kti ni.
56 Pangsiim lei shong ktia hana som ktieo, kho mdek jah kkhaan kho bük lü kho puk nah nih dang yah ktie. Asun kba ani ta tuh-a kha üng shääng ei kti ngshing ngte naake ta i lü am nah nih dang yah u ni.
57 Aksang sun i ni atia nah nih päte noh i a thoon lü am nah nih mkhyah ei u ja.
(Mate 5.25-26)
58 Avai shüa nang hin ning kkhya hlük kti mat vek kkhai. Si jaang luum da nah nih seh lama ah nih sun nah ng'ye püi be vai mtun eia. Asun kba am ani ta si jaang khong manga veeia ning kaih kkhai ni. Si jaang khong mang noh mtät kti ngtuk kpoh-a kut üng nang ning ap ham kkhai. Asuna ngtuk kpoh noh khup üng ning khyum-in kkhai ni.
59 Kei kah pyen ma kkhai ni. Mtaam ngui nah msuum naaka ngui phe mat nah khyah vei säpa khup üng nah veyah kkhai” tilü ah jah mtheh.