14
1 Pangsiim ngam püi mhnüüp mat üng ta Booi Jeishüh sun Pharishe-e üng ka khong mang mata ima buh ei vaai kti. Asun üng Pharishe-e noh ah nih ling mpyuuk u.
2 Booi Jeishüh-a hlonga ah kut kho phoom ktia kkhyaang mat vek kti.
3 Booi Jeishüh noh Sangsiim ktheeme jah Pharishe-e üng “Pangsiim ngam püi mhnüüp üng am ah nih khyaih ei jah mdo be vai Pangsiima thuum üng ngkäk kkhai mä. Am ngkäk mä” tilü ah jah kthäh.
4 Asune ta am sik sik u. Booi Jeishüh noh ta am khyaih kti ah veeia khü lü mdo be lü ah tüih be.
5 Booi Jeishüh noh Pharishe-e sun üng “Avai shüa nah nih sa am ani üng nah nih she hin tui soh khuuia Pangsiim ngam püi mhnüüp üng ah kyaak yot ta nang nih-e üng ahunata am kshet be hnaam kkhai kkhyaang vek kti mä” tilü ah jah kthäh.
6 Lüphi asune noh am mshak be ngtu u.
7 Kkhine noh ngshut naak vai akdo bok ah nih xü ei hlü sun Booi Jeishüh noh ah hmuh lo. Asun üng ta asune sun pum üng msäp lü ah jah mtheh.
8 Booi Jeishüh noh “Sa laak pooia ah nih ning khü ei üng ado naak boka käh ngshuta. Ning jah mhleih kti mat mat loham to kkhai ni.
9 Asun üng ta ning khü ei kti im mah pa noh nang sun üng ‘Thou loa. Ah nih hin üng ngshut kom’ tik kkhai. Asun üng hmaai shelü am ado naak boka nah ngshut yah kkhai ni.
10 Asuna thoon lü kkhyaange noh ah nih ning khü ei üng am ado naak boka ngshut vaai ua. Im mah pa ah lo üng nang üng ‘Kah püio, ado naak bok hia ngshut loa’ tilü ning mtheh to kkhai. Asun üng ta kkhin abänga ma-a nah hmaai vaai kkhai ni.
11 Ah pät noh ah pät mhlün mtaai ei kti ta Pangsiim noh mhneem kkhai. Ah pät noh ah pät mhneem ei kti ta Pangsiim noh mhlün mtaai kkhai” tilü ah jah msuh mtheh.
12 Asun üng Booi Jeishüh noh im mah üng “Nang noh ngooi ei am ani üng mü eia kkhyaang nah khü ei üng nah nih looi püi, be na, mjü mjoong jah booi ei kti käh jah khü ei ua. Asune noh ta ning khü ei be kkhaie ni. Asun üng nah kheen vai phi nah yah ei be pääng ni.
13 Pooi nah nih poh üng ta ampyeen kshe, ah kut kho ngpyan, ah kho kthi, ah mik müa ngkho jah khü ei ua.
14 Asune noh am ning thung be khoh u. Asun üng va Pangsiim noh do kya naak ning jah pek kkhai. Pangsiim üng ng'ye be ktie ah nih thoh bea mhnüüp üng Pangsiim noh nang nih üng ning jah thung be kkhai ni” tilü ah pyen.
(Mate 22.1-10)
15 Ayüma buh jah ei püi kti mat noh asun kba ah pyen lo ngjalü Booi Jeishüh üng “Pangsiima pea buh pooi üng ei o naküt kkhai noh do kya naak yah kti” tilü ah pyen.
16 Lüphi Booi Jeishüh noh “Kkhyaang mat noh buh pooi ngbüh nu poh veia kkhyaang kho hah pa ah jah laak ei.
17 Kkhin suna mhnüüp ah pha lo üng ta im mah pa noh ah xüh shoh sun tüih lü ah jah laak eie üng ‘Lo-ua, kah jah pooi pyaang pän ni’ tilü ah jah pyen vaai shak.
18 Lüphi ah nih bäng noh am ah nih seh khoh vai sun ah nih pyen be u. Aksüka mat noh ‘Lai kak mat kah kkhyäih ei kah bük vaai ma kkhai. Asuna thoon lü kei ta am loyah ham ngü. Käh nah puk sheet ei bä’ tilü ah pyen be mjoh.
19 Mat be tü noh ta ‘Mna ngkhop mhma kah kkhyäih ei. Asuna thoon lü kah jah mhnüt na-vaai ma kkhai. Am loyah ham ngü. Käh nah puk sheet ei bä’ tilü ah pyen mjoh.
20 Mat be tä noh ‘Kei ta tuh-a va kah kkhyu mah kti. Asuna thoon lü kei ta am loyah ham ngü’ tilü ah pyen be.
21 Xüh shoh sun ah mah pa-a veei sit be lü athoon ve sun ah mtheh mkhyah vaai be. Asun üng ta im mah pa thüi lolü xüh shoh sun üng ‘Angshenga ngnam kshuunga sit lü ampyeen kshe, ah kut kho ngpyan, ah kho kthi, ah mik müe jah khü ei hüa’ tilü ah xüh.
22 Xüh shoh phalo be lü ‘Kah mah pao, nah nah xüh-a kba kah poh pääng ni. Lüphi ei naak vai oong ei ham kti’ ah ti mjoh.
23 Im mah pa noh xüh shoh üng ‘Ye li khashanga kkhyaange khäp khäpa lok kkhaiea jah la-hüa. Kah im üng kkhyaang be yah kkhai.
24 Kah ning mtheh ma kkhai ni. Aksüka kah jah khü eia kkhyaange üng ka mat noh phi kah buh pooi am ei yah u’ tilü mah pa noh ah pyen” ah ti.
(Mate 10.37-38)
25 Kkhyaang pä nu sun Booi Jeishüh üng ngkhyüi vaai ktie. Booi Jeishüh noh asune da va mdei lü hin kba ah pyen.
26 “Mat mat hin kah veeia ah lo ta ah nu pa, ah kkhyu sa na, ah hnuun püi kphyaai be jah ah päta shaka kthaka nah mhlä kphya nalü va keia akläka thoon khoh kkhai.
27 Mat mat hin keia ah khui kha vai jah keia thih-a kba ah thih vai hngoh-a phi ngshääm ei lü ah nah läk üng va keia akläka thoon khoh kkhai.
28 Nang nih-e üng mat mat noh im ah shak hlü ta aksüka i kän päih kkhai atia täp ei ma kti. Ah nih noh ngsäng onga shak naak vai vek kkhai mä atia ngngaai ma kkhai am ni bä.
29 Asun kba am ani ta ktung thak jah nglin-in lü ngsäng onga am ah shak ei khoh ta kkhyaange noh ah nih sun yaih ei kkhaie ni.
30 Kkhyaange sun noh ‘Asan noh im shak ah sut ei tuhan kyo va. Am ah msän khoh’ tilü pyen ei kkhaie.
31 Shang phuhlang mat noh shang phuhlang akse sun ah täk vaia ah mkhüh naak ta ah ngtuk kpoh thoong xa üng ah ye ngtuk kpoh thoong mku sun nääng khoh vai mä atia aksüka ngngaai ma kkhai ni.
32 Shang phuhlang noh ah ye-e am ah jah nääng hlü ta täk kkhai lok kti shang phuhlanga veei su athuuk naak ham lama ah ngshä jah tüih lü ah nih ng'ye vaia jah nghui vaai shak kkhai ni.
33 Asun kba ni mat mat noh akpäih naak säpa ah nah läk vai käh mkhyah khoh lü akve naküt am ah hoih khoh ta keia akläka am thoon khoh.
(Mate 5.13; Marküh 9.50)
34 Msi ta do kyo kti. Msi hin msia am ah tui ta u noh phi tui onga am pyaang be khoh.
35 Ngvoong mdeka phuh vaia phi ta-kyaaia xon vaia phi am do ti. Asuna thoon lü msi sun kkhyaange noh ah nih kpyaai-in u. Ah nghnga khuui kti noh ngja-she” tilü ah jah mtheh.