11
(Mate 6.9-13, 7.7-11)
1 Mhnüüp mat üng ta Booi Jeishüh noh hnün mata tä sham lü vek kti. Ah tä sham lo pääng üng akläk mat noh “Booi Pao, Patiso Johaan noh ah nih-a akläke üng tä sham ning ah jah mtheia kba kei nih-e phi jah mtheia” tilü ah pyen.
2 Booi Jeishüh noh “Nah nih tä sham lo üng hin kba pyen ua. ‘Pa Pangsiimo, nah ngming jou taai mah she. Nah upa pe phalo she.
3 Amhnüüp tä ei ook vai jah pea.
4 Kah nih kkhaana mkhye kti kah nih mhläta kba kah nih mkhye naak phi jah mhlät bä. Mkhye vaia hlo hleep naak käh jah khaam ei shak bä’ tilü” ah jah mtheh.
5 Kona Booi Jeishüh noh “Avai shüa nang nih-e üng mat mat hin nah nih püia veei mthan nglunga sit lü ‘Kah püio, kkhaai kpeh beei kthum bang nah kpu ma.
6 Kah püi mat kdunga kkhyüh kah ima kaai lok kti. Kah mbei vai i phi am ve’ tilü ah nghui naak.
7 Im mah pa noh ‘Käh nah mkhuh mhlih loa. Kshoh kah nih khaai ei pääng ktie. Kah sa nae mah mah kah ip hnüh kti ni. Am thou lohlü ngü. I phi am ning pe-khoh ngü’ tilü im k'uma kkhyüh ah pyen be.
8 Kei kah pyen ma kkhai. Im mah sun noh ah nih nglooi eia phäh thou lolü kkhaai kpeh sun am pe-kyo. Lüphi tong kti sun noh ngke kkhyak ei käh poh lü anghläia ah tong eia phäh im mah sun noh hnua ta thou lolü ah hlü ei sun pek kkhai ni.
9 Kei kah pyen ma kkhai. Tä sham ua. Pangsiim noh ning pek kkhaie. Shui hü ua. Nah nih hmuk kkhaie. Kshoh kkhok ua. Pangsiim noh ning jah nghmon peet kkhai ni.
10 I lüni ti ta tä sham kti naküt üng Pangsiim noh pek kkhai. Shui naküt kti noh hmuk kkhai. Kshoh kkhok naküt kti üng Pangsiim noh nghmon peet kkhai.
11 Nang nih-e hin üng ah pa-a thoon kti noh nah nih sa noh nga thek mat ah tong ei üng kphyu kphyaai kshou nah nih pek kkhaie laang mä.
12 Nah nih sa noh aai ktui ah tong ei üng mti kshou nah nih pek kkhaie laang mä.
13 Nang nih-e hin mkhye mshoh ei khoi ktia thoong u kti lüphi nah nih sa na üng akdo kkya nah nih pe-ei ktie. Asun kba ani ta kkhaan khoa ka nih Pa Pangsiim noh ah veeia tong ei kti naküt üng Mkhyangsiim pe-hlü bok kkhai ni.”
(Mate 12.22-30; Marküh 3.20-27)
14 Booi Jeishüh noh käh shi hlo thei ktia jah poh hü kti kho yaai ah kshät. Kho yaaia shot kona anghmo sun shi hlo lobe thei kti. Asun üng kkhyaange mün sam tong ktie.
15 Lüphi kkhyaang akhäk noh “Ahin noh Bese Bu kho yaaia hiit üng kho yaaie ah jah mshot” tilü ah nih pyen u.
16 Akhäk noh ta Booi Jeishüh ah nih saam naaka kkhaan khoa ka ngshing ngte naak mat mat ah poh vaia ah nih tong tuhan u.
17 Booi Jeishüh noh asunea su ngngaih kshing lolü ta “Teng pe mat üng käh ngkhot ngsheng lü angkhoi ngkhya ta teng pe am vekhoh. Kkyoong long mat üng phi käh ngkhot ngsheng lü angkhoi ngkhya ta kkyoong long hi lok kkhai ni.
18 Asuna thoon lü Shatan yaai pa hin ah pät noh ah pät sok ei lü ah hiit angkhoi ngpa ta Shatan yaai pa-a pe sim pyak kkhai ni. Asun kba ani ta kei noh Bese Bu kho yaaia hiit üng kho yaaie kah jah kshät kti atia i hok kba nah nih pyen khoh kkhaie ni.
19 Avai shüa kei noh Bese Bu yaai pa-a hiit üng kho yaai kah jah kshäta athoon ta nang nih-ea akläke noh ta u a hiit üng kho yaai jah kshät ktie ja. Nah nih nah ngngaih mkhye u atia asune shak shi kkhaie ni.
20 Lüphi kei noh Pangsiima hiit üng kho yaaie kah jah kshäta athoon ta Pangsiima upa pe nang nih üng phalo hnüh kti ni.
21 Angjung ktha mah pa noh ah li ksim akküma bilü ah sü im ah mtäh ta ah xüi ngui külak am mpyu ei khoh u.
22 Lüphi ah nih-a kthaka ktha mah bok kti noh täk lü ah nääng ta ah üm naak ah li ksim sun ah huh ei ma. Kona asuna külak sun aktha mah bok noh ah püi poe üng ah jah yet-in.
23 Kei da am ngpüi kti hin aksanga ta nah kpet mjak kti ni. Kah hlonga toe am nah jah mhmaak püi kti hin aksanga ta toe jah ngpyeen hü shak kti ni.
(Mate 12.43-45)
24 Kho yaai sän kkhyaanga kkhyüh ah shot üng mkyaanga ngvaak hü hü lü ah ngxü naak vai hjam khoi kti. Am ah hmuh ei lüta ‘Kah shot naak loa veei kah sit be kkhai’ tilü pyen kti.
25 Lai vaai be lü avai shüa ah ve naak khoi sun ngpheih ngkhoih ei lü angsih ngkhäh sa-a ah hmuh vaai be.
26 Asun üng ta ah nih-a kthaka shou bok kti kho yaaie kkhyüh jah khü vaai lü asuna kkhyaang üng jah vaan püi lü vekyet kkhai. Asun üng ta kkhyaanga ve soh sun ahlaana kthaka kshe hleen lobok kkhai ni” tilü ah pyen.
27 Booi Jeishüh noh asun kba ah pyen üng kkhyaang pä k'um üng ka nghnu mi mat noh “Nang ning sa nalü sih ning tu kti nghnu mi üng Pangsiim noh do kya naak ah peet kuung ni” tilü akthai kdäma Booi Jeishüh üng ah mtheh.
28 Booi Jeishüh noh ta “Pangsiima kkhyü ngjalü ksang nak kti ta Pangsiim noh do kya naak pe-bok kti ni” tilü ah pyen.
(Mate 12.38-42)
29 Kkhyaang pä nung nung lolü ta Booi Jeishüh noh “Tuh kha üng ka kkhyaange hin she xu pi pi ktie ni. Ah nih nih-e noh ngshing ngte naak hmuhlük ktie. Lüphi Jonah-a poh khoi ngshing ngte naaka koong ni ah nih hmuh yah kom u. Ngshing ngte naak akse am hmu-yah u.
30 I hok kba ni ti ta Nineveh mlüh-a ka kkhyaangea phäh Jonah sun ngshing ngte naaka thoon ktia kba kei kkhyaang sa phi tuh kha üng ka kkhyaangea phäh-a ngshing ngte naaka kah thoon kkhai ni.
31 Asum pe da ka nghnu mi shang phuhlang sun Pangsiima jah si jaang loa mhnüüp üng ta ngdüüi lolü tuh-a kha üng ka kkhyaange sun üng mtaam jah pephya kuung kti atia pyen mkhyah lok kkhai. I lüni ti ta shang phuhlang Sholoh Monga pum ngyam pyen kshak sun ngngaai lok kkhaia kho mdek kphyüta kkhyüh nghnu mi shang phuhlang sun lok kti ni. Ngngaai ua. Ahia shang phuhlang Sholoh Monga kthaka däm duh kti mat vek kti ni.
32 Nineveh mlüh üng kae noh phi Pangsiima jah si jaang loa mhnüüp üng ta ngdüüi lo-ulü tuh-a kha üng ka kkhyaange sun üng mtaam jah pephya kuung kti atia pyen lok kkhaie. I lüni ti ta shahma ngsiim Jonah noh Nineveh mlüh-a Pangsiima kkhyü ah kpyaü üng ah nih nih-e vuuk be pääng ktie ni. Ngngaai ua, ahia shahma ngsiim Jonah-a kthaka däm duh kti mat vek kti ni” tilü ah pyen.
(Mate 5.15, 6.22-23)
33 Booi Jeishüh noh “Kkhyaang hin noh mei phäih mdääi lü im kkea am ta-khoi. Sä üng phi am mük ei. Im k'uma lut lok ktie noh akvaai ah nih hmuh vaia khum khäh k'hlüng üng ni ah taak ei kom.
34 Nah nih mik hin nah nih puum sha-a mei phäih kvaai ni. Nah nih mik angkyaai ta nah nih puum sha-a phi akvaai üng vek kkhai. Lüphi nah nih mik nah nih tuui ten ta nah nih puum sha phi anghmüp naaka vek kkhai ni.
35 Asuna thoong lü nah nih kvaai sun anghmüpa käh athoon vaia mseei ei ubä.
36 Nah nih puum sha hin Pangsiima akvaai üng abänga vaai lü anghmüp naak am ave ti ngtu ta mei phäih-a kvaai noh ah nih ning ksäih-a kba nah nih lik lik jaaü jaaü pyei kkhaie.”
(Mate 23.1-36; Marküh 12.38-40)
37 Booi Jeishüh ah shi hlo mtuuia Pharishe mat noh ah ima buh ei vaai kkhaia ah khü ei. Asun üng Booi Jeishüh sun asuna ima sit lü buh pooi üng vaang kti.
38 Booi Jeishüh sun buh ah ei hlaana thuum seena kba ah kut am ah mthih ei sun Pharishe noh ah hmuh üng mün lopyei kti.
39 Booi Jeishüh noh ta “Nang nih Pharishe-e hin noh phäih-e jah kpäiea hnu da hngoh phi nah nih mthi mkaaü ei ktie kyo. Nah nih mlung ngneia ta shexu lü nah nih shili shan tak ktie ni.
40 Kkhyaang nghmoongeo, nih mik üng nih hmuh yah nih puum sha mhnün mseng kti Pangsiim noh nih mlung kkyoong phi ah mhnün mseng ni.
41 Nah nih taak ei üng ka ampyeen kshe-e üng jah yet ua. Asun kba ani ta abäng naküt nah nih phäh-a ngsiim ngsaih kkhai ni.
42 Nang nih Pharishe-e, nah nih phäh-a khui kha naaka thoon kkhai ni. Yaai nu hnah jah akse ng'uui hnah jah kthuui an akve naküt sun nang nih-e noh xa üng ka mat nah nih peet kyo u. Lüphi kkhyaanga kkhaana nah nih bäü hma ktie. Pangsiim phi am kphya na-u kti. Xa üng ka mat nah nih peet u ta do kyo kti. Lüphi pyuun vai jah Pangsiim mhlä kphya naak ksang vai hlü bok kti ni.
43 Nang nih Pharishe-e, nah nih päta khui kha naaka thoon kkhai. Nang nih-e hin Sangsiim ngthei naak kyonga akdo bok ngshut naak üng nah nih ngshut hlü ktie. Kkhyaang päea kshuunga ah nih ning mün naak vai nah nih hlü ei bok ktie.
44 Nang nih-ea phäh khui kha naaka thoon kkhai ni. Kkhyaangea am hmuh yah msüm hnün khuui üng nah nih täng ktie ni. Kkhyaange asuna msüm hnün khuuia kkhaana am hmat lü ngleh ei yot ktie ni” tilü ah jah mtheh.
45 Sangsiim ktheem mat noh ta “Angvaaio, ahin kba nah pyen hin kei nih-e phi nah jah msheet ei kti ni” ah ti.
46 Booi Jeishüh noh ta “Nang nih Sangsiim ktheemea phäh phi khui kha naaka thoon kkhai ni. I lüni ti ta phüüi shek kti phüih k'yüh nue kkhyaange üng nah nih jah phüih shak u. Nah nih päte noh ta asuna phüih k'yüh nue sun nah nih jah ku ei vaia nah nih mjung mat hngoh üng phi am hne hlü u kti.
47 Nah nih phäh-a khui kha naaka thoon kkhai ni. Nah nih pu paea jah hnim shahma ngsiimea phäh-a nang nih-e noh ng'yeen ei naaka msüm hnün lung khuui akkyäp kkyäpa nah nih jah shak peet u.
48 Asuna thoon lü nah nih pu paea thoon ve nah nih jah ä ati sun nah nih ngshing ngte shak ktie ni. I lüni ti ta nah nih pu pae noh shahma ngsiim jah hnim ulü nang nih-e noh msüm hnün lung khuui nah nih jah shak peet ktie.
49 Asuna thoon lü Pangsiim noh ah theem naak üng malam vai ah pyen ta ‘Ahinea veeia shahma ngsiime jah ngshäe kah jah tüih lok kkhai. Shahma ngsiime jah ngshäe sun akhäk ah nih nih-e noh mkhuh mhlih lü jah hnim kkhaie ni’ tilü ni.
50 Asuna thoon lü Pangsiim noh kho mdek ah tüüi pyaana kkhyüh shahma ngsiime ah nih jah hnim ua phäh-a tuh kha üng ka kkhyaange üng Pangsiim noh mtaam jah pek kkhai ni.
51 Ngngaai ua, kah ning jah mtheh ma kkhai. Apel ah nih hnima kkhyüh lü khah naak lung päm jah hjok khah naak hnüna kkeh-a ah nih hnim shahma ngsiim Sekha Rih säpa Pangsiima kkhyaange ah nih jah hnim ua phäh-a tuh kha üng ka kkhyaange üng Pangsiim noh mtaam jah pek kkhai.
52 Sangsiim ktheemeo, nang nih-ea phäh khui kha naaka thoon kkhai ni. Pangsiim kshing hmat sun im üng täng kti. Asuna im kshoh khaai lü keh naak nah nih seh-in u. Nah nih päte phi Pangsiim kshing lo vaia asuna im k'uma am lut u kti. Lut hlük kti phi nah nih jah ngya u” tilü ah jah mtheh mkhyah.
53 Booi Jeishüh asua kkhyüh ah seh kona Sangsiim ktheeme jah Pharishe-e noh ah nih mlung naak lo u. Booi Jeishüh sun saam naaka amjü mjüa ah nih kthäh kkhyah tuhan u.
54 Booi Jeishüh-a pyen kshake üng ah mkhye naak lo ah nih hmuh vai ua ah nih bü u.