1 Booi Jeishüh lama ah seh k'um üng ah nu puka kkhyüh ah mik mü ktia kkhyaang ah hmuh. 2 Akläke noh “Angvaaio, ahina kkhyaang ah nu puka kkhyüh ah mika mü hin ah päta mkhye mä. Am ani ta ah nu paea mkhyea phäh mä” tilü ah nih ngthäh. 3 Booi Jeishüh noh “Ah mika mü hin ah päta mkhyea phäh am ni. Ah nu pa-a mkhyea phäh phi am ni. Pangsiima hiit sun ah nih üng angshing ngte lo vaia phäh ni.

4 Khoa mü hlaan vei kei nah tüih lok ktia khuut kah poh yah kkhai. U phi am ah khüüi naak khoh-a kho mthan phalok kkhai ni. 5 Kei kho mdeka kah ve k'um üng kho mdeka kkhyaangea phäh-a akvaaia kah thoon kti ni” tilü ah jah mtheh. 6 Asun kona mdeka ah msi mshoh lü ah msi üng lok ah pyaan. Asun üng ah mik müa mik ah hlu peet. 7 Asun üng ta Booi Jeishüh noh “Sita, Shi Loong tui lia mthi vaai bea” tilü ah xüh. (Shi Loonga ngming ti hlü ta ‘Ah tüih’ ti ni.) Ah mik mü noh sit lü mthi vaai lü ah mik vaai lobe kti. 8 Ah im senge jah ngui ah tong ei khoi hmuk ktia kkhyaange noh “Ah nih hin aläa ngshut lü ngui tong ei khoi ktia kkhyaang sän am ni bä” tilü ngthäh ngkhyah ktie. 9 Akhäk noh “Ah sun kba ni. Ah nih ni” ah nih ti u. Akhäke noh ta “Am ni. Ah nih hmaai täng kti va ni khüng vai” tilü nghai ktie. Ah mik mü hüt khoi kti noh ta “Kei hin asun ni” tilü ah jah mkhyaai. 10 Ah nih nih-e noh “Asun kba ani ta tuh-a i hok kba nah mik vaai lok kti ni” tilü ah nih kthäh u. 11 Ah nih noh “Jeishüh-a ah nih shuia kkhyaang noh lok pyaang lü kah mik ah nah hlu peet kona Shi Loong tui lia ah nah mthih vaai shak. Asun üng sit ngüshe kah mik kah mthih jah ta ahunata kah mik vaai lobe shoxat kti ni” tilü ah jah mtheh. 12 Kkhyaange noh “Jeishüh ta hoa ni” tilü ah nih kthäh u üng “Kei noh am hmat ngü” tilü ah jah mshak be.

13 Ah nih nih-e noh ah mik mü khoi sun Pharishe-ea veei ah nih seh püi u. 14 Booi Jeishüh noh lok pyaang lü ah nih-a mik ah mdo bea mhnüüp ta Pangsiim ngam püi mhnüüpa thoon kti ni. 15 Pharishe-e noh “I hok kba nah mik vaai lobe kti ni” tilü ah nih kthäh be tü u. Ah nih noh ta “Jeishüh noh kah mik üng lok hlu lü kah mthih vaai be. Ahin kba vaai lobe kti ni” tilü ah pyen be. 16 Pharishe akhäk noh “Asuna kkhyaang Pangsiima kkhyüh lok kti ta am ni shoom. I lüni ti ta Pangsiim ngam püi mhnüüp üng am jeih ei kba” ah nih ti u. Akhäk noh ta “Mkhye mshoh ktia kkhyaang noh ahin kba mün sam kshe i hok kba poh khoh kkhai ni” tilü ngthäh be ktie. Asun üng Pharishe-e sun ngkyaü lü ngkyalok ktie. 17 Pharishe-e noh ah mik mü khoi üng “Ah nih noh nah mik ning vaai shak be kti. Nang noh i a nah ngngaai kti ja” tilü ah nih kthäh u. Ah nih noh “Shahma ngsiim ni” ah ti be. 18 Jüdah khong mange noh ta asuna kkhyaang ah mik mü khoi lü tuh-a ah vaai lo be sun am jum ngtu u. Asuna thoon lü ah mik mü khoia nu pae ah nih jah khü u. 19 Jüdah khong mange noh “Ahin nanga sa mä. Ah nih hin ah nu puka kkhyüh ah mik mü ktia nah nih pyen khoi u ta tuh hi i hok kba ah mik vaai lobe kti ja” tilü ah nih jah kthäh u. 20 Nu pa mah-e noh ta “Ah nih hin kah nih sa ua ngte kti ni. Ah nu puka kkhyüh-a ah mika mü phi kah nih hmat ktie ni. 21 Ah mik ihok kba ah vaai be jah u noh ah mdo be sun kei nih-e noh am hmat u ngü. Ah pät üng kthäh ua. Kkhyaang teh lohnüh kti ni. Ah pät noh pyen ei thei kti ni” ah nih ti be. 22 Ah nu pae noh Jüdah khong mange ah nih jah kyüh-a phäh asun kba ah nih pyen u ni. “Jeishüh sun Khrito ni” tilü kkhyaange üng jah mtheh hü naküt kti ta Sangsiim ngthei naak kyonga kkhyüh mshot vaia Jüdah khong mange ngi pääng ktie. 23 Asuna thoon lü ah nu pae noh “Ah nih kkhyaang teh lohnüh kti ni. Ah pät üng kthäh ua” ah nih ti u. 24 Asun üng ta ah mik mü khoi sun Jüdah khong mange noh anghngih naaka ah nih khü u. “Pangsiim däk mküüi mtou a. Asuna kkhyaang akkhye atia kah nih hmat u ni” tilü ah nih mtheh u. 25 Ah mik mü khoi noh ta “Asuna kkhyaang akkhye atia ta am hmat ngü. Lüphi mat ta kah kshing vek kti ni. Kah mik mü khoi lü tuh ta vaai lobe kti” tilü ah jah mtheh be. 26 Ah nih nih-e noh “Ah nih noh nang üng i ning poh peet kti ja. Nah mika mü i hok kba ah ning vaai shak be ni” tilü ah nih kthäh u. 27 Ah nih noh “Kei noh ahun ning mtheh pääng kyo u ngüshe phi am nah ngngaai hlü u kti. I vai tuh-a nah nih ngja-hlü ham ktie ja. Nang nih-e phi ah nih-a akläka nah nih thoon lohlük ktie ve-mä” tilü ah pyen be. 28 Ah nih nih-e noh “Nang hin ah nih-a akläk ni. Kei nih-e ta Mosheia akläke kah nih thoon ktie ni. 29 Pangsiim noh Moshei ah ngthuh ei püi kah nih kshing ktie ni. Asuna kkhyaanga ngkho ta hoa kkhyüh ah lo phi am hmat ngtu u ngü” tilü pyen lü ah nih kshe naak u. 30 Ah mik mü khoi noh ta “Asun ta mün kshe va nik kba. Ah nih hoa kkhyüh lok kti atia am nah nih hmat u. Lüphi ah nih noh kah mik nah mdo be khü. 31 Pangsiim noh khye ktia kkhyaanga pyen am su ngngaai atia nih hmat ktie. Pangsiim sun hjok khah lü ah hlü eia vek kti naküta pyen ni ah ksang naak. 32 Ah nu puka kkhyüh ah mik müa mik vaai shak be ktia kkhyaang ta hina kho mdeka ngtüüia kkhyüh am ngja-khoi ham ngtu ngü. 33 Asuna kkhyaang Pangsiima kkhyüh am ah lo ta asun bang i phi am poh mshah khoh” tilü ah jah mtheh. 34 Jüdah khong mange noh “Nang bang mkhyea ning sa noh kei nih-e nah jah mthei hlü tuhan kti ve-mä” tilü ah nih mshot u. 35 Ah nih nih-e noh ah mik mü khoi ah nih mshot u sun Booi Jeishüh noh ngja-lüta shui hü lü ah hmuh lo. Booi Jeishüh noh “Nang hin noh Kkhyaang Sa nah jum ei kti mä” tilü ah kthäh. 36 Ah nih noh ta “Asun u ni atia nah mhnüh mtheh ma kti lü kah jum ei kkhai ni” ah ti be. 37 Booi Jeishüh noh “Nang hin noh ah nih nah hmupääng kti ni. Tuh-a nah ngsi ngjaang püi hin ah nih ni” tilü ah mtheh. 38 Ah nih noh “Booi Pao, kah jum ei kti ni” tilü pyen lü ah mkhuuk lu üng ngdääng lü ah hjok khah. 39 Asun üng ta Booi Jeishüh noh “Ah mik müa mik vaai lobe kkhaia, ah mik kvaaia mik mü lo-onga taam pek kkhaia kei kke kho mdeka kah kyum lok kti ni” ah ti. 40 Pharishe akhäk noh ah hlonga ve-ulü asun ah nih ngjaak u. Ah nih nih-e noh “Kei nih-e phi kah nih mik mü mjoh ktia nah pyen hlük kti ve mä” tilü ah nih kthäh u. 41 Booi Jeishüh noh “Nah nih mik amü ta ning jah kbäü ei naak vai am ve. Nang nih-e noh ta ‘Kah nih mik vaai kti ni’ nah nih ti ua phäh üng ning jah kbäü ei naak vai veshet kti ni” tilü ah jah mtheh.