1 Booi Jeishüh sun Kshi Dung msuunga kaai kti. 2 Akho ngooi üng ngooi lama hjok khah im nua lobe ngooi kti. Kkhyaang kho hah ah veeia lo-ulüta Booi Jeishüh noh ngshut lü ah jah msuh mtheh. 3 Sangsiim ktheeme jah Pharishe-e noh ah khong pa am nik kti ve püi ktia nghnu mi ah nih hmuh u sun khü lo-ulü kkhyaangea ma-a ah nih ngdüih shak u. 4 Ah nih nih-e noh “Angvaaio, ahina nghnu mi hin ah khong pa am nik ktia kpa mi ah ve püi k'um üng hmu-ulü ah nih man u ni. 5 Asun banga nghnu mi sun lung üng khoong tong vaia Moshei noh kah nih thuum üng ah mkhyah ni. Nang noh ta i nah tik kkhai ja” tilü ah nih kthäh u. 6 Asun ta ah nih kbäü ei naaka mkot ave lo vaia saam naaka ah nih pyen u. Booi Jeishüh noh ta mdeka ngmüm lü ah mjung üng sa yuk ei kti. 7 Ah nih nih-e noh Booi Jeishüh sun kthäh ei lä ulüta ngkyääk lolü “Nang nih-e üng ah mkhye am vengtu kti noh ah nih sun lung üng aksüka khoong she” ah ti. 8 Asun üng ta ngmüm be tü lü mdeka sa yuk mhläi kti. 9 Ah nih nih-e üng sut ei lü mat siim mat siim üng ngpyeeng be päih ktie. Booi Jeishüh ah pät däk vehüt kti. Nghnu mi phi ah ma-a ngdüüi ei ham kti. 10 Booi Jeishüh ngkyääk lobe tü lü “Nghnu mio, ah nih nih-e hoa lai päih ktie ni. Mat sa hngoh noh phi nah mkhyea phäh mtaam am ning pek ktie mä” tilü ah kthäh. 11 Nghnu mi noh ta “Ä, Booi Pao, u noh phi mtaam am nah pe u” tilü ah pyen be. Booi Jeishüh noh phi “Asun kba ani ta kei noh phi nah mkhyea phäh mtaam am ning pe ngü. Sit bea. Hnua mkhye käh poh ti bä” ah ti.

12 Booi Jeishüh noh ah nih nih-e üng “Kei hin kho mdeka kkhyaangea phäh-a akvaai ni. Kei nah läk naküt kti anghmüp naaka am sit soon hü ti. Xün naak pek ktia akvaai yah ei kkhai ni” ah ti. 13 Pharishe-e noh Booi Jeishüh üng “Nang noh nah päta mong nah shak shi kti ni. Nah pyen hin sang kti mä atia am nih yü khya khoh” ah nih ti u. 14 Booi Jeishüh noh ta “Asun kba am ni. Kei noh kah päta mong shak shi kyo ngüshe phi kah shak shi hin sang kti ni. I lüni ti ta kei hin hoa kkhyüh lo ngüshe ho da kah seh sun kah kshing ei kti ni. Nang nih-e noh ta keia mong sun am hmat u kti. 15 Nang nih-e noh ta kkhyaanga thuum seen üng nah nih si jaang ktie. Kei noh ta u phi am si jaang ngü. 16 Lüphi kei noh kah si jaanga athoon ta kah si jaang naküt sang kti. I a thoon lüni ti ta kah pät däk käh nik ktia, kei nah tüih lok kti kah Pa Pangsiima dä kah nih si jaang yüm kkhai ni. 17 Kkhyaang nghngih-a shak shi amat lo ta ah nih kkhyü sang kti atia nah nih thuum üng ng'yuk kti ni. 18 Kei hin noh kah päta mong kah shak shi kti. Kei nah tüih lok kti kah Pa Pangsiim noh phi keia mong shak shi kti ni” tilü ah pyen. 19 Ah nih nih-e noh “Nah pa sun hoa ni” tilü ah nih kthäh u. Booi Jeishüh noh “Nang nih-e noh kei jah kah Pa Pangsiim phi am jah hmat ngtu laang u kti. Kei nah nih nah kshin u ta kah Pa Pangsiim phi nah nih hmat yah kkhaie ni” tilü ah pyen be. 20 Booi Jeishüh noh ahina kkhyü abäng hin hjok khah im nua k'um khoh peet msun naak ngui bunga hlonga ah jah msuh mtheh. Lüphi aksüün am pha ham lü u noh phi am man ham u.

21 Booi Jeishüh noh “Kei hin sa-a kah sit kkhai ni. Nang nih-e noh kei nah shui hü kyo u kti lüphi nah nih mkhye mshoh üng nah nih thik kkhaie ni. Kei kah seh naak vaia hnüna nang nih-e am phalo khoh u kti” tilü ah pyen be tü. 22 Jüdah khong mange noh “Ah nih noh ah seh naaka hnüna nih nih-e am nih pha-khoh kkhaiea ah pyen ni. Ah pät noh ah pät hnim ei vaia tääng to kti mä” tilü ngthäh ngkhyah ktie. 23 Booi Jeishüh noh “Nang nih-e ta hina kho mdek üng nah nih shääng ei ktie ni. Kei ta kkhaan khoa kkhyüh kah lok kti. Nang nih-e hin kke kho mdeka nah nih ngtüüi lok ktie. Kei ta ahia ka am ni. 24 Asuna thoon lü ‘Nang nih-e hin nah nih mkhye üng nah nih thik kkhaie ni’ tilü kei noh kah ning jah mtheh ni. Kei hin kah pyena kba asun ni atia am nah nih jum u ta nah nih mkhye üng aksanga nah nih thi-yah kkhaie ni” tilü ah jah mtheh. 25 Ah nih nih-e noh “Nang u ni” tilü ah nih kthäh u. Booi Jeishüh noh “Kei noh nang nih-e üng aksüka kkhyüh kah ning jah mtheh pääng ni. 26 Kei noh nang nih-ea mong kho hah kuung kah pyen vai jah nah nih mkhye u kah ning jah si jaang vai vepyei kti ni. Lüphi kei nah tüih lok kti kkhyü kshing ktia thoon lü ah nih-a veei kah ngjaaka kkhyü pyen sun kkhyaang nghngi siime üng kei noh kah jah mtheh be ni” ah ti. 27 Booi Jeishüh noh Pangsiima mong ah pyen atia ah nih nih-e noh am dang yah u. 28 Asuna thoon lü Booi Jeishüh noh “Nang nih-e noh kei, Kkhyaang Sa, nah jäk u kti lü kei hin kah pyena kba asun ni atia nah nih kshing lok kkhaie. Asun üng kah päta hiit üng i phi käh poh lü kah Pa Pangsiima nah msuh mtheh-a kba kah pyen kti ati sun nang nih-e noh phi nah nih hmat lok kkhaie ni. 29 Kei nah tüih lok kti sun kah hlonga vekyet kti. Ah nih noh kah pät sa däk am nah ta. I lüni ti ta ah hlü eia anghläia kah poh mshah kti” tilü ah pyen. 30 Ah nih noh asuna kkhyü ah pyen üng kkhyaang kho hah pa noh ah nih jum ei lo u.

31 Booi Jeishüh noh ah nih jum ei kti Jüdah-e üng “Nang nih-e hin keia msuh mtheh-a kba nah nih ve soh kyet u ta keia akläke ksanga nah nih thoon ktie ni. 32 Nang nih-e noh Pangsiima mong aksanga nah nih hmat kkhaie ni. Asun noh ning jah mhlät kkhaie ni” ah ti. 33 Ah nih nih-e noh “Kei nih-e hin Apyahama mjü mjoong ni. Ua mpya-a phi am thoon khoi u ngü. Nang noh ‘Ning jah mhlät kkhai ni’ nah ti ta i nah pyen hlü ni” tilü ah nih kthäh u. 34 Booi Jeishüh noh “Ngngaai ua, kei kah pyen ma kkhai ni. Mkhye mshoh poh ktia kkhyaang naküt mkhyea mpya-a thoon kti ni. 35 Mpya ta kkyoong longa aläa am ve. Sa kpa ni kkyoong longa anghläia ah ve khoi. 36 Asuna thoon lü Sa Kpa noh ah nih ning hläh u ta nah nih lät ksang kkhaie ni. 37 Nang nih-e hin Apyahama ning mjü mjoonge atia kah hmat kti. Lüphi nang nih-e noh kah ning jah msuh mtheh u am nah ngja-hlü u kti lü kei nah nih nah hnim vai nah nih mtun ei ktie. 38 Kei hin noh kah Pa Pangsiima nah mhnüh mtheh-a kba kah pyen kshak kti ni. Nang nih-e noh ta nah nih pa-a msuh-a kba nah nih poh mshah ktie” tilü ah pyen. 39 Ah nih nih-e noh “Kei nih-ea pa ta Apyaham ni” ah nih ti u. Booi Jeishüh noh “Nang nih-e hin Apyahama sa naea nah nih thoon ksang u ta ah nih-a poh mshah-a kba nah nih poh hnga kkhaie shü. 40 Kei noh Pangsiima kkhyüh kah ngjaaka kkhyü ksang sun kah ning jah mtheh ni. Nang nih-e noh ta kei nah nih nah hnim hlük ktie ni. Apyaham ta asun kba am thoon. 41 Nang nih-e noh nah nih pa-a khuut nah nih poh ktie ni” tilü ah jah mtheh. Ah nih nih-e noh “Kei nih-e hin ngsoone am ni. Kah nih pa u mat däk ni ah ve. Asun ta Pangsiim ni” tilü ah nih pyen be u. 42 Booi Jeishüh noh “Pangsiim sun nang nih-ea pa-a ah thoon sang to ta nang nih-e noh kei nah nih nah kphya nak kkhaie shü ni. I lüni ti ta kei hin Pangsiima kkhyüh ahia kah lok kti. Kah päta tia kah lok kti am ni. Ah nih noh ah nah tüih lo ni. 43 Nang nih-e noh kah pyen i lü am nah nih ngjaak kya u ja. Nang nih-e noh kah kkhyü am nah nih ngngaih ngjaak hlü ua phäh ni. 44 Nang nih-e hin Shatan yaai pa-a sa nae ni. Nah nih pa-a hlü ei phi nah nih läk hlük ktie. Ah nih hin aksüka kkhyüh kkhyaang hnim ktia thoon lü Pangsiima hlü ei üng am shääng ei. I lüni ti ta ah nih noh kkhyü am shing ngtu. Ah hleei hlak üng ah ngnei shaka kba pyen kshak kti. Aläa hleei khoi lü ak'hleeia pa-a phi thoon kti. 45 Kei noh kkhyü ksang kah pyen ktia thoon lü am nah jum u kti. 46 Kei hin kah mkhye kti atia u nah nih ngdüüi khoh ktie ja. Kei noh aksang kuunga kah ning jah mtheh u. I lü am nah nih jum ei u ni. 47 Pangsiim üng shääng ei kti noh ah kkhyü ngngaai ngjak kti. Nang nih-e ta Pangsiim üng ka am ni u kti. Asuna thoon lü Pangsiima kkhyü am ngja-laang u kti” tilü ah pyen.

48 Jüdah khong mange noh “Nang hin Shama Rih mjü ni. Kho yaaia ning vaan naak ni tilü kah nih pyen khoi u sän sang kti ni” ah nih ti. 49 Booi Jeishüh noh “Kei hin kho yaaia vaan naak am ni. Kei noh ta kah Pa Pangsiim sun lei shong kyo ngüshe phi nang nih-e noh nah nih nah msheet ei ktie. 50 Kei noh kah päta nglou ngthang naak vai am mtun ei ngü. Lüphi kah nglou ngthang naak ngte shak kti mat vek kti. Ah nih noh ngpyuun ktia ni ah si jaang. 51 Ngngaai ua, kei kah pyen ma kkhai ni. Kah msuh mtheh läk lam kti ta am thi-ti” tilü ah jah mtheh. 52 Jüdah-e noh “Nang hin kho yaaia vaan naak atia tuh ta kah nih hmat lo ksang hnüh u ni. Apyaham thipääng kti. Shahma ngsiime phi thipääng ktie. Nang noh ta ‘Kah msuh mtheh läk lam kti ta am thi-ti’ tilü pyen kbah kti. 53 Kah nih pa u Apyaham ta thipääng kti ni. Nang hin ah nih-a kthaka nah däm duh kti ta am ni bä. Shahma ngsiime phi thi päih ktie. Nah pät noh nah pät i a nah ngngaih ei laang ni” ah nih ti u. 54 Booi Jeishüh noh “Kei noh kah pät kah mhlün mtaai ei be ta i a am kyah ngtu. Lüphi kah Pa Pangsiim noh kei nah jou taai shak kti ni. Ah nih sun nah nih Pangsiim ua nah nih shui ei u. 55 Lüphi ah nih sun nang nih-e noh am hmat laang u kti. Kei noh ta ah nih kah kshing kti ni. Kei hin noh ‘Ah nih am hmat ngü’ kah ti ta nang nih-ea kba kkhyaang k'hleeia kah ngläü kkhai ni. Lüphi kei noh ta ah nih hmat ngüshe ah kkhyü pyen kah läk lam kti ni. 56 Nah nih pa u Apyaham noh kah lo vai sun ah hmuh yah vaia phäh ah naje kyai tong kti. Ah nih noh hmu-yah ksang lü xe nak kti ni” ah ti. 57 Jüdah khong mange noh “Nah kho kum mhma kip phi am lo ham lü Apyaham sun nah hmuh mjoh mä” tilü ah nih kthäh u. 58 Booi Jeishüh noh “Ngngaai ua, kei kah pyen ma kkhai ni. Apyahama ngtüüi hlaana kah nave pääng kti ni” tilü ah jah mshak be. 59 Asun üng Booi Jeishüh ah nih khoong naak tong vai lung ah nih jah hooi ei lo u. Ah nih sun angthupa hjok khah im nua kkhyüh shot kti.