1 Booi Jeishüh noh “Ngngaai ua, kei kah pyen ma kkhai ni. To ngvoong mkot üng käh nik ktia, ngvoong kkaan lü ak'uma lut kti ta mpyuk ei jah akläänga thoon kti. 2 Mkot üng lut kti ta to kshääm ni. 3 Mkot mtät kti noh phi ah nih sun kshoh nghmon peet kti. Toe noh ah kthai ngja-ulü ah nih noh ah toe sun ah nih ngming üng jah khü lü kho kpunga ah jah kshet. 4 Ah toe sun jah khü lopäih ma lü ah nih ma-a hma kti. Toe noh ah kthai sun kshing ulü ah nih läk u. 5 Toe noh kkhyaang kse ta käh läk lü sen-in kkhaie ni. I lüni ti ta ah kthai am kshing u” tilü ah pyen. 6 Booi Jeishüh noh asuna pum üng msäp lü ah jah mtheh üng kkhyaange noh i ah pyen hlü am ngja-kya u. 7 Asuna thoon lü Booi Jeishüh noh ah pyen be tü ta “Ngngaai ua, kei kah pyen ma kkhai ni. Kei hin toea phäh kshoh-a kba kah thoon kti. 8 Kah pha lo hlaana lo naküt kti ta mpyuk ei jah kkhyaang kshe-e ni. Asuna thoon lü toe noh am jah ksang na-u. 9 Kei hin kshoh-a kah thoon kti. Kei üng lut kti naküt kah kuum kyan kkhai. Aklooia nglääng ngla lü ah ei ook vai phi hmu-ei kkhai ni. 10 Ampyuk ei sun mpyuuk kkhai, hnim kkhai, ksim kpyak kkhaia lok kti ni. Kei kah lo hin ta shak yah lü mlung hlü kthak kphya nüüma ah nih ve ei yah vai ua phäh ni. 11 Kei hin to kshääm kdo ni. To kshääm kdo noh ta ah toea phäh-a shak üng taam kti. 12 Ah nih xüh eia kkhyaang noh ta toe am jah ka na. To kshääm am ni. Mhnge-e ah nih lo ah jah hmuh üng toe jah sen ei tak kti. Mhnge-e noh toe jah man ei ulü akse-e phi ah nih jah kthü phyeeng-in u. 13 Xüh ei sun ta ah nih sun noong vei kho ah nih ngvah ua thoon lüva toe sun am jah mhlä na. 14-15 Kei hin to kshääm kdo ni. Kei jah kah pa mat jah mat kah nih nghmat eia kba kah pät jah kah toe phi kah nih nghmat ei ksang ktie ni. Kei noh kah toea phäh-a kah shak kah ton kti. 16 Ahina ngvoonga am um kti kah to akse-e phi veham ktie. Asune phi kah jah la-be yah kkhai. Asune noh kah pyen kthai nah ksang nak ktie. Abäng sun to pä mata thoon lolü to kshääm phi mat ni ah ve kom. 17 Kei noh kah shak kah tona phäh kah Pa Pangsiim noh nah mhlä kphya nak kti. Kah thoh be vaia kah shak kah peet ni. 18 U noh phi kah shak sun anäänga am nah hut ei khoh. Kah mkhüh ktüüma kah ton ei ni. Kah shak kah ton vai jah kah thoh be vai sun kah xü ei khoh kti. Asun kba vaia kah Pa Pangsiim noh ah nah mkhyah peet” tilü ah jah msuh mtheh. 19 Asuna kkhyü mkha-a phäh Jüdah kkhyaang päe ngkhoi ngkhya lobe tü ktie. 20 Kkhyaang kho hah kuung noh “Ah nih hin kho yaai noh vaan nalü ng'yo kti ni. I vai ah pyen nah nih ngngaai ktie ja” tilü ah nih jah hai u. 21 Akhäk noh ta “Kho yaaia vaan naaka kkhyaang noh ahin kba am pyen ksha khoh. Kho yaai noh ah mik müa mik ihok kba mdo be khoh kkhai ja” ah nih ti be u.

22 Kho kshik k'uma phi thoon kti. Jeirüh Shalem mlüh-a hjok khah im nu Im Kaai Shüüm naaka Pooi poh ktie. 23 Booi Jeishüh sun hjok khah im nu ngvoong k'um Sholoh Monga lam shüa sit ei hü kti. 24 Asun üng Jüdah-e noh Booi Jeishüh sun boom lopyei ulü “Kah nih mlung i vei nah jah äh lah shak kkhai ni. Nang hin Khrito mä. Angtea jah mshi mkhyaai ma-a” tilü ah nih mshi vaai u. 25 Booi Jeishüh noh “Kah ning jah mtheh pän kyo u va am nah jum u kti. Kah Pa Pangsiima hiit üng kah poh-a khuute noh kah mong ngshing ngte shak ktie. 26 Lüphi nang nih-e hin kah toea am thoon u kti lü am nah jum ei u kti. 27 Kah toe noh kah kthai nah ngngaai ulü nah läk ktie. Kei noh ah nih nih-e sun kah jah kshing kti. 28 Kei noh ah nih nih-e sun angshääia xün naak jah pe-ngüshe am sim pyak ti u. U laang noh phi kah kut k'uma kkhyüh am nah hut khoh. 29 Kah Pa Pangsiim sun abäng naküta kthaka däm duh bok kti ni. Ah nih noh va kah toe hin kah vana ah nah jah ap. Kah Pa Pangsiima kut k'uma kkhyüh lü asune sun u noh phi am jah hnuuk kaih ei khoh. 30 Kei hin kah Pa Pangsiima dä kkhyaang mata mäia kah nih ng'yüm kti ni” tilü ah pyen. 31 Asun üng Jüdah kkhyaange noh ah nih khoong naak tong vai lung ah nih hooi ei u. 32 Booi Jeishüh noh “Nah nih ma-a kah Pa Pangsiima hiit üng akdo kkya kho hah kah poh kti ni. Asuna thoon ve-e sun üng hona phäh nah nih nah hnim hlü u ni” tilü ah jah kthäh. 33 Jüdah kkhyaange noh ta “Akdo nah poh-a phäh-a lung üng kah ning khoong hlü tong am ni. Pangsiim nah thang msheeta phäh ni. Nang nghngi siim va nik kti hin Pangsiima nah thoon hlük kti ni” ah nih ti u. 34 Booi Jeishüh noh “Sangsiim üng ng'yuk kti ta ‘Nang nih-e hin Pangsiima mäie ni’ tilü vek kti. 35 Sangsiim üng vek kti Pangsiima kkhyü i tüh-a phi am nghlai laang. Pangsiim noh ah kkhyü ngjak ktia kkhyaange sun Pangsiima mäia ah jah shui. 36 Kei ta Pa Pangsiim noh nah msoon lü kke kho mdeka ah nah tüih lo. Asun üng ‘Kei hin Pangsiima Sa ni’ kah ti üng nang nih-e noh ‘Pangsiim nah thang msheet kti’ atia i hok kba nah nih pyen khoh kkhaie ja. 37 Kei noh kah Pa Pangsiima nah poh shak am kah poh ta käh nah jum xa ua. 38 Kah pyen am nah nih jum u üng phi kei noh Pangsiima khuut kah poh ta asuna khuut sun jum ei ua. Asun üng ta kah Pa Pangsiima dä kkhyaang mata mäia kah nih ng'yüm kti atia kshing lo u kti lü nah nih lu nglang lok kkhaie ni” tilü ah jah mtheh. 39 Asun üng Booi Jeishüh sun ah nih man hlü be tü kyo u. Ah nih kuta kkhyüh man vata lät kti. 40 Ah nih sun Jotan mlik tui sa ye dan sit lü Patiso Johaan noh aksüka patiso ah jah peet naaka vek kti. 41 Kkhyaang kho hah pa ah veeia lok ktie. Ah nih nih-e noh “Johaan noh mün sam kshe am poh kyo lüphi asuna kkhyaanga mong ah pyen kshak naküt sang kti ni” ah nih ti u. 42 Asua kkhyaang kho hah noh Booi Jeishüh sun jum ei lok ktie.