1 Asun kona Booi Jeishüh sun Kalile hnea ngleng hü kti. Jüdah khonge noh hnim vaia ah nih seng kyam ua phäh Jüdah hnea am sit hü hlü. 2 Hjaam Pooi säh lok kti. 3 Asuna thoon lü Booi Jeishüh-a nae noh “Ahina kkhyüh shot lü nanga akläke noh nah poh mshah ah nih ning hmuh vaia Jüdah hnea sita. 4 Nglou ngthang hlü kti noh ah poh mshah am thuh. Nang noh ahin bang nah poh kkhyaang abäng noh hmat u she” tilü ah nih mtheh u. 5 Ah nae hngoh noh ah nih sun am jum ulü asun kba ah nih pyen ei u ni. 6 Booi Jeishüh noh “Keia phäh aksüün am pha ham. Nang nih-ea phäh ta i tüh-a ksüün üng phi ng'yah kti. 7 Kho mdek kkhyaange noh ah nih ning mlung naak vai am ve. Kei noh ta ah nih poh mshah ve soh mkhye kah kpou ktia thoon lü ah nih nih-e noh kei nah mlung nak ei ktie ni. 8-9 Asuna pooia nah nih päte sit ei ua. Kah ksüün am pha-ham lü am sit ngü” tilü Kalile hnea vehüt kti. 10 Ah nae ah nih shot kona Booi Jeishüh phi joong kti. Lüphi kkhyaang kshuunga käh ngte pyei ktia ampyua sit kti. 11 Pooi sua Jüdah khonge noh ah nih sun shui hü ulü “Asuna kkhyaang hoa vek kti ni” tilü ngthäh hü ktie. 12 Kkhyaang pä noh ah nih-a mong mship mhjop na-hü pyei ktie. Akhäk noh “Ah nih hin kkhyaang kdo ksang ni” ah nih ti u. Akhäk noh ta “Am ni. Kkhyaange lam jah hmü shak kti ni” ah nih ti u. 13 Lüphi Jüdah khonge jah kyüh ulüta kkhyaang ma-a angtea am pyen dat u.

14 Pooi nglung k'um üng hjok khah im nua sit lü Pangsiima kkhyü Booi Jeishüh noh ah jah msuh mtheh. 15 Jüdah khong mange mün sam tong ktie. “Ahina kkhyaang nih thuum am ngthei xa lü ahin kba ta i hok kba pi pia theem kti ni” ah nih ti u. 16 Booi Jeishüh noh “Kah ning jah msuh mtheh hin keia theem naak üng am ni. Kei nah tüih lok kti Pangsiim üng ni kah ning msuh mtheh u. 17 Pangsiima hlü ei poh hlük kti naküt noh ta keia ning msuh mtheh u hin Pangsiima kkhyüh lok kti mä, kah päta hiit üng kah pyen mä, ati sun hmat ei kkhai ni. 18 Ah päta mkhüh ktüüma pyen kti noh ta ah päta nglou ngthang naak vai ni ah mtun ei. Ah nih tüüi lok ktia ngming mhlün mtaai hlü kti ta ah kkhyü sang lü ngtuui ngten am ve. 19 Moshei noh nang nih-e üng thuum ning pek ktie am ni bä. Lüphi mat noh phi asuna thuum am läk u kti. I lü nang nih-e noh kei nah nih nah hnim hlük ktie ja” ah ti. 20 Kkhyaang pä noh “Nang hin kho yaaia ning vaan naak ni. U noh nang ning hnim hlük kti ja” tilü ah nih pyen be u. 21 Booi Jeishüh noh ta “Kei noh ngshing ngte naak mat kah poh-a phäh nah nih mün ktie. 22 Moshei noh nah nih sae üng vun moih ah nih ning poh shak u. Lüphi aksanga ta Mosheia sut ei am ni. Nah nih pu paea kkhyüh poh mshah lo ni. Asuna thoon lü Pangsiim ngam püi mhnüüp üng phi nah nih sa kpa üng vun moih nah nih poh peet ktie. 23 Nang nih-e noh Mosheia thuum käh song kheei kkhaia Pangsiim ngam püi mhnüüp üng vun moih nah nih jah poh peet u. Asun kba ni kei noh kkhyaang mata puum sha abäng sun Pangsiim ngam püi mhnüüp üng kah mdo bea phäh i vai nah nih thüi ktie ja. 24 Amdanga käh si jaang ua. Ngpyuun ktia si jaang ua” tilü ah jah mtheh.

25 Jeirüh Shalem mlüh-a ka kkhyaang akhäk noh “Khong mangea hnim hlü sun ahina kkhyaang am ni bä. 26 Bük ua, kkhyaangea ma-a jah msuuk mtheh kyo lüphi ah nih nih-e noh am ngya kbak u. Ah nih hin Khritoa ah thoon sun khong mange noh dang yah to kkhaie mä. 27 Lüphi ahina kkhyaang hoa kkhyüh ah lo kah nih hmat kyo u. Khrito ah pou lo üng ta ah nih sun hoa ka atia u noh phi am kshing u” tilü ah nih pyen u. 28-29 Booi Jeishüh noh hjok khah im nua ah jah msuh mtheh üng “Nang nih-e noh kei nah nih nah hmat ksang ktie mä. Hoa kkhyüh kah lo nah nih kshing laang u mä. Kei hin kah mlung hlüa kah lok kti am ni. Kei nah tüih lok kti ta kkhyü kshing kti. Nang nih-e noh ah nih sun am dang yah u kti. Kei noh ta ah nih kah hmat ni. I lüni ti ta ah nih noh kei nah tüih lolü kei hin ah nih-a kkhyüh kah lok kti” tilü akthai kdäma ah kpyaü. 30 Ah nih nih-e noh Booi Jeishüh ah nih man hlü kyo u. Lüphi ah nih-a phäh ksüün am pha ham lü u noh phi am hne yah u. 31 Kyolüphi kkhyaang pä üng ka kho hah kuung noh ah nih sun jum ei ulü “Khrito ah lo üng ahina kkhyaanga poh mün sam kshea kthaka nung bok ktia poh ti kkhai mä” tilü ngthäh ngkhyah ktie.

32 Kkhyaang pä nu noh Booi Jeishüh-a mong ah nih mship mhjop naak u sun Pharishe-e jah khotu ngsiim kdäme noh ah nih ngjaak u üng Booi Jeishüh man kkhaia hjok khah im nu mtät kti ngtuk kpoh-e ah nih jah tüih u. 33 Booi Jeishüh noh “Kei hin nah nih hlonga kho vei sa kah vema kkhai ni. Kona joong be tü ngüshe nah tüih lok ktia veei kah sit be kkhai. 34 Nang nih-e noh kei am nah shui hmu-khoh u kti. I lüni ti ta kah ve naaka am phalokhoh u kti” tilü ah jah mtheh. 35 Jüdah khong mange noh “Am nih hmuh yah ua ah nih hin hoa sit hlük kti ni. Jüdah kkhyaangea ve naak Kärih mlüh-ea sit lü Kärih kkhyaange jah msuuk mtheh hü kkhai ve-mä. 36 Jeishüh noh ‘Nang nih-e noh kei nah nih nah shui kkhaie kyo. Kah ve naaka am phalokhoh u kti’ ah ti hin ta i a joong ni” tilü ngthäh ngkhyah ktie.

37 Pooi akpäih naak jah ashü kyüa mhnüüp üng Booi Jeishüh ngdüüi lolü “Tuia khyoot ei naküt kah veeia loshe. Kei noh tui kah tu kkhai ni. 38 Kei nah jum ei kti ta Sangsiim üng ng'yuk ktia kba ah nih-a kkhyüh xün naak tui ksaai loong kkhai ni” tilü ngpyaang kti. 39 Booi Jeishüh noh ah nih jum ei naküt ktia yah vaia Mkhyangsiima mong asun kba ah pyen. I lüni ti ta Booi Jeishüh sun kkhaan khoa ngjäk lü ah jou taai naak am ngshing ngte ham lü Mkhyangsiim am loham. 40 Ah nih noh asun kba ah kkhyü sun ah nih ngjaak u üng kkhyaang pä üng ka akhäk noh “Aana kkhyaang hin asuna shahma ngsiim ksang ni” ah nih ti u. 41 Akhäk noh “Ah nih hin Khrito ni” ah nih ti u. Akhäk noh ta “Khrito hin Kalile hnea kkhyüh pou lokhoh kkhai mä. 42 Khrito hin shang phuhlang Davita mjü mjoonga thoon kkhai ni. Davita mlüh Pet Leema kkhyüh ngtüüi kkhai ni tilü Sangsiim üng ng'yuk kti am ni bä” tilü ah nih pyen u. 43 Asun üng kkhyaang päe noh Booi Jeishüh-a mong ahnga hnga-a ah nih ngngaih lo u. 44 Akhäk noh ah nih sun man hlü kyo ulüphi u noh am hne u.

45 Asun üng hjok khah im nu mtät kti ngtuk kpoh-e noh khotu ngsiim kdäme jah Pharishe-ea veei ah nih seh be u üng “I lü ah nih am nah nih khü lo ja” tilü ah nih jah nah kthäh u. 46 “Asuna kkhyaanga kba u phi am kkhyü kkou khoi” tilü ngtuk kpoh-e noh ah nih jah mshak be u. 47 Pharishe-e noh “Nang nih-e phi lam nah nih hmü lo-hnüh ktoih ktie mä. 48 Kei nih khong mange jah Pharishe-e üng ka mat bang hngoh noh ah nih sun jum kti tia nah nih ngjaak khoi u mä. 49 Ahina kkhyaange noh Mosheia thuum am hmat ulü Pangsiima she sham khaam ei yah kkhaie ni” tilü ah nih pyen u. 50 Pharishe-e üng Niko Teimüh ah nih tia kkhyaang mat vek kti. Ah nih sun mthan mat üng Booi Jeishüh-a veei sit khoi kti. 51 Ah nih noh “Kkhyaang mat sun kshü kset lü ah mkhye hmuh hlaana si jaang ta nih thuum üng am ngkäih kti am ni bä” ah ti. 52 Ah nih nih-e noh “Nang hin phi Kalile hnea kkhyüh nah lok kti mä. Sangsiim mseei lü bük ma tu. Kalile pea kkhyüh shahma ngsiim mat laang phi am pou lo atia nah hmuk kkhai ni” ah nih ti u. 53 Kona abäng ah nih ima sit hü be ktie.