JÜDAH
Jüdah noh jum ei ktie üng ah jah kbia sa
1
1 Kei Jüdah hin Jeishüh Khritoa xüh shoh jah Jakopa na-a kah thoon kti. Pa Pangsiim noh jah xü lü ah kphya naak jah Jeishüh Khritoa jah mshüüm mseeia kkhyaange üng sa kah ning jah yuk lok kti ni.
2 Mpyeen ei naak, diim deih naak jah mhlä kphya naak sun Pangsiim noh küm seei ktia ning jah peshe.
3 Kah kphya naak kah püieo, nih nih-e üng vek kti kuum kyan naaka mong nah nih veeia sa kah yuk lo hlü kkhüt kti kyo. Ah nih-a ngsiim ngsaih kti kkhyaange üng Pangsiim noh ahunata ah jah ap jum ei naak sun nah nih shung khaam yah kkhaie ni. Ahina phäh-a ktha ning jah peet naak vai sa yuk lo vai hlü ve ati sun kah kshing lok kti.
4 I a thoon lüni ti ta Pangsiim am kshing kti akhäke nih kshuunga ampyua vaang lok ktie. Asuna kkhyaange noh Pangsiima bä naaka mong khye shoh ktia jah msuuk mtheh ktie ni. Asun hin Pangsiima kkhyü ah nih lüüm kkaan naak jah ah nih boh bah naaka ah nih shum ei u ni. Nih Booi Pa Pangsiim mat däk jah nih Booi Jeishüh Khrito sun kpet mjak ktie ni. Asuna kkhyaange üng mtaam jah peet vaia Pangsiim noh ahlaan nua kkhyüh ah mkhyah pääng ni.
5 Nih Booi Pa noh Ekip pea kkhyüh ah kkhyaange jah mhlät kyo lüphi hnua ta am üm nak ktie sun ah jah ksim kpyak ni. Ahina mong abäng kshing kyo u kti lüphi kah ning jah shüüm hlü shak be ktie.
6 Pangsiim noh kkhaan kho ngshäe üng ah jah peeta hiit sun mshit ei ulü ah nih hnün sun ah nih seh taak u. Asun kkhaan kho ngshäe sun si jaang naak mhnüüp nu ktung veia mthi yüüi üng ngkhit ei lä ktiea anghmüp naaka ah jah pheh.
7 Asun kba Sotom jah Komo Rah mlüh jah ah nih pi pei mlüh ngname üng kae sän ngkhyu ngla thuum hoih lü akshe hleena boh bah ktie ni. Pangsiim noh ah nih mlüh ngname mei üng ah jah ksim kpyak. Asun hin Pangsiim noh mkhye mshoh naküt ktie i tüh-a phi am thik kti mei üng mtaam jah pek kkhai ati sun ah jah msing msääi naak ni.
8 Asun kba ni. Asuna kkhyaange noh phi “Mhnüh mdan kah hmuh ni” ti-ulü boh bah naak üng ah nih puum sha sun bäü hma nak ktie. Pangsiima hiit kpet mjak ulü jou taai mah kti kkhaan kho ngshäe jah thang mseh ei ktie.
9 Lüphi kkhaan kho ngshä khong mang kdäm Mikha Elah hngoh noh Mosheia yooka phäh Shatan yaai pa-a dä ah nih ngvook üng ahin kba ta am poh. Mikha Elah noh Shatan yaai pa sun am kshe na. Am kbäü ei. “Pangsiim noh mtaam ning peshe” ah ti.
10 Asuna kkhyaange noh ta am ah nih ngjaak kkya naküt phi thang msheet ktie. Kkhyüng kshei nghmonga kba akho hlüa ve soh-a mong ah nih kshing naak üng sim pyak hnüh kkhaie ni.
11 Ah nih-ea phäh khui kha kshea thoon kkhai. Asune noh Kaaina lam läk ktie. Shahma ngsiima hana som kti Palaama kba nguia phäh kkhyaange lam jah hmü shak ktie. Khorah jah ah püie noh Moshei jah Aron ah nih jah kpet mjak ua kba ah nih-e noh phi shaang ngsiim khonge jah kpet mjak ktie ni. Khorah jah ah püiea kba sim pyak kkhaie ni.
12 Nglooi ngtheeng naak pooi pyang nah nih poh u üng ah nih-e nah nih kshuunga ngke ei kshea vek ktie. Ah nih päta phü vai sho xat ngngaai ulü ei o kolaih ktie ni. Asune hin kho khi noh ah joon pyaai ei hü yoh tui kka kho ngmei üng täng ktie ni. Käh ngthei paai kti thing dung üng täng ktie. Kphyooi lam pha lolü ta kkhyaange noh ah pya phi nghloom-in lopeh ktia ah nih phuk ng'yong-in kti thing dung üng täng ktie ni.
13 Ah nih nih-e hin kyüh shek kti mpang lai tui ngnook üng täng ktie. Ngke ei kshe ah nih poh mshah hin tui ngnooka mpoona kba vek ktie. Ah nih-e hin aai shi joong kti üng täng ktie. Asuna thoon lü Pangsiim noh ah nih nih-ea phäh anghmüp mthan naak bok boka hnün jah pyaan peet kti ni.
14 Atama kkhyüh tui kyum lok kti akshoon kkhyüh naak Enok noh asunea mong malam ah pyen ni. Enok noh “Bük ua. Booi Pa sun ngsiim ngsaih kti ah kkhaan kho ngshä thoong kho hah mah mah kyum lok kkhai.
15 Ah nih noh kkhyaang naküt si jaang kkhai ni. Pangsiim am kshing ktie abäng sun mpyü shek kti ah nih mkhye mshoh naak jah Pangsiim ah nih thang msheet naaka mtuih mleh kti ah nih kkhyü mpyonga phäh mtaam jah pek kkhai” tilü ah pyen.
16 Asuna kkhyaange hin anghläia mship mhjop ulü ah nih püi jah kbäü ei ktie. Am do kti ah nih kpaam ei naak sun läk ulü sam sah nak ktie. Ah nih päta do naak vaia mpyong ktui üng ng'jo ngphah lü kkhyaang jah ngthuh ngmin püi ktie.
17 Lüphi kah kphya naak kah püieo, nih Booi Pa Jeishüh Khritoa ngshäea malam pyen shüüm lä ubä.
18 Asune noh “Akpäih naaka ksüün üng ning jah yaih ei ktie, am do kti kpaam ei läk kti kkhyaange pou lok kkhaie ni” tilü ning jah na-mtheh ktie ni.
19 Asune noh nah nih shaang ngsiime ning jah ngphyü ngpa shak kkhaie. Ah nih mlung loa kba poh mshah ulü Mkhyangsiim am yah ei ngtu u.
20 Kah kphya naak kah püieo, nang nih-e ta ngsiim ngsaih ktia nah nih jum ei naak angkhääng ngpaang vaia mtun ei kkhüt ubä. Mkhyangsiima hiit üng tä sham ubä.
21 Nah nih xün shei naak üng Pangsiima mhlä kphya naak pou dang ktia ve ua. Nih Booi Jeishüh Khrito noh angshääia xün naak ah jah peet ääp ei lü mtät ua. Booi Jeishüh noh ah ning jah mpyeen eia phäh shak ngshääi ning pe ksang kkhaie ni.
22 Ah nih mlung up lat ktie sun ah nih jum ei khoh vaia jah mpyeen ei lü jah ku ei ua.
23 Pangsiima mtaam peet naak mei üng käh ah nih pha vai ua, kkhyaang akhäk man lü jah kaih vaia mtun ei ua. Kkhyaang akhäk mpyeen ei lü nah nih ku ei üng ah nih mkhye naak üng nah nih pät käh nah nih ngpüi vaia mseei ua. Asuna kkhyaangea boh bah naak üng mtuih mleh kti ah nih shui shak hngoh thi-na ua.
24 Ngshuk ei lü mkhye käh nah nih poh vai ua nih Booi Pa Pangsiim noh ning jah ku ei khoh kti ni. Bäü hma naak üng ngsiim lü jou taai mah ktia ah hmaai ma-a je kyai naak üng ning jah pha shak khoh kkhai.
25 Nih Booi Pa Jeishüh Khrito üng jah thoong khyah kti Pangsiim mat däka ah jou taai, däm duh naak, ngjung ktha jah ah hiit sun nih bäng noh nih mküüi mtou vai u. Nih Pangsiim noh ahina kho mdek am ah mhnün mseng hama kkhyüh ni, tuh-a ksüün üng phi, ngooia lok kkhaia aksüün tä lüphi ngthu nghlai naak am velaang. Amen.