JOHAANA SA AKTHUM NAAK
Johaan noh Kaai Jüh üng ah kbia sa
1
1 Shaang ngsiim sanga thoon kti kei Johaan noh kah looi püi kah kphya naak nang Kajüh-a veei sa kah yuk lok kti ni. Angseeia kah ning kphya nak kti ni.
2 Kah püio, nah ve soh xün sheei naak üng nah phyong vaia, nah mya shat ei vaia kah ning tä sham peet kti ni. Diim ye naaka mlung üng nah vek kti ati sun phi kah kshing ni.
3 Khritjaan be na akhäk lo-ulü nah mong ah nih nah mtheh üng kah je kyai kkhüt kti ni. Nang hin Pangsiima kkhyü ksanga kba nah ve soh kti atia nah mtheh ktie ni. Pangsiima kkhyü ksang anghläia nah nih läk lam sang kti ni.
4 Kah sa nae noh Pangsiima kkhyü ksang nah nih läk lam kei noh kah ngjaak hin kah je kyai naak bok bok ni.
5 Kah kphya naak kah looi püio, nang noh Khritjaan be nae jah am nah kshing xa Khritjaan be nae phi nah jah ku ei sän do pi pi kti ni.
6 Ah nih nih-e noh shaanga ma-a nanga kphya naaka mong shak shi ktie ni. Ah nih nih-e sun mshu lü lam ah nih seh naak khoh vaia Pangsiima hlü eia kba jah ku ei bä.
7 I lüni ti ta Booi Jeishüh Khritoa phäh-a sut ei lü lam sit ktie. Ah nih nih-e sun noh Pangsiim am jum ei ktiea kkhyüh ku ei naak i phi am dou ei u.
8 Nih nih-e hin noh asu banga kkhyaange sun jah kpüi kpak vaia do kti ni. Asun üng ah nih nih-e noh Pangsiima kkhyü ksanga khuut ah nih poh naaka nih nih-e phi nih ngpüi ktie ni.
9 Kei hin noh shaanga veei sa yuk kyo ngüshe phi ah päta tia shaang khong poh hlü kti Tioh Terep noh kah pyen am suh lih ei.
10 Asuna thoon lü kah lo üng ah thoon hlok sun shaanga ma-a kah phyeh kkhai ni. Ah nih noh keia mong am do ktia am nih ngtu ktia pyen kti ni. Asun däk am ni. Kdung long kti Khritjaan be nae phi am jah dou. Asuna Khritjaan be nae jah kkhin na-hlü ktie phi jah ngya lü shaanga kkhyüh jah mshot kti ni.
11 Kah looi püio, am do ktia thoon hlok üng käh nghju bä. Do ktia thoon hlok däk jah hju bä. Do ktia khuut poh kti hin Pangsiim üng shääng ei kti ni. Mkhye poh ktia kkhyaang noh ta Pangsiim am hmuham.
12 Teme Tirüh adoa mong kkhyaang naküt noh pyen ktie ni. Aksanga thoon kti Mkhyangsiim hngoh noh phi ah nih-a mong shak shi kti ni. Kei nih-e noh phi ah nih adoa mong kah nih pyen ktie. Kah nih pyen hin sang kti ni ati sun nah nih kshing ktie ni.
13 Kei noh nah veeia sa kah yuk vai kho hah pa veham kti ni. Lüphi sa üng am pyen hlü ti ngü.
14 Kah pät kuung lo ngüshe nih nghmu ulü nih ngthäh ngkhyah yah kkhaiea kah ngngaai kti.
15 Diim deih naak nang üng veshe. Nah looi püie noh phi ning shüüm ktie ni. Nah veeia vek kti kah nih looi püie phi mat siim mat siim kah nih jah shüüm ktie ati jah mtheh bä.