MALAM PYEN
Pangsiim noh Johaan üng ah mhnüh-a malam pyen
1
1 Ahin mhnüh mdan hin Pangsiim noh ah xüh shoh-e üng ah jah mdan vaia Booi Jeishüh üng ah mtheh-a kyak kti. Asune sun i vei am lo thoon hlok lok kkhaie. Booi Jeishüh Khrito noh ah xüh shoh Johaana veei kkhaan kho ngshä tüih lolü asun sun ah jah kshing shak ni.
2 Johaan noh mhnüh mdan ah hmuh-a mong abäng shak shi nak kti. Pangsiim noh ah kshing shak kkhyü ksang jah Booi Jeishüh noh ah mhnüh mdana mong abäng ahina sa up üng ah yuk ni.
3 Ahina malam pyen sa up phat kti naküt noh do kya naak yah kkhai. Ahina sa upa kkhyü ngjak kti jah mseei kti noh phi do kya naak yah kkhai. I lüni ti ta asue ah nih bäng athoon lo vaia ksüün pha lo hnüh kti ni.
4 Kei, Johaan noh Asha hnea vek kti shaang kkhyüh üng sa kah ning jah kbi lok kti. Tuh hi ni, ahlaan üng ni, ngooi khoa phi ve-ei lä kti Pangsiim jah ah Booi ngoh naaka ma-a vek kti ngmüi mkhya kkhyüh noh bä naak jah diim deih naak ning jah peshe.
5 Kho mdeka ve naküt kti shang phuhlang jah up kti Booi Jeishüh Khrito noh phi bä naak ning jah peshe. Ah nih hin kkhyü shing üng Pangsiima shak shia thoon kti. Pangsiim noh ah nih sun thih naaka kkhyüh aksük dä däa ah mthoh bea ah sa ni. Khrito noh jah kphya nalü ah thi üng nih mkhye naak jah mthih peet kti.
6 Ah Pa Pangsiima khuut poh kkhaia ah nih noh nih nih-e sun shang phuhlang jah khotu ngsiima jah thoon shak kti. Ah nih hin anghläia jou taai mah she. Anghläia ah nih noh up she. Amen.
7 Bük ua, Khrito sun kho ngmei üng lok kti ni. Kkhyaang mjü naküt noh ah nih mik üng hmuk kkhaie. Ah nih shun kti naküt noh phi ah nih hmuk kkhaie. Kho mdek kkhaana vek kti kkhyaang mjü kküme phi kyüh ei lü sääi ulü ngpyaang lü kyap kkhaie ni. Aksang ksanga asun kba thoon hlok lok kkhai ni. Amen.
8 Tuh-a ni, ahlaan üng ni, ngooi khoa ni, velä kti akve naküta kthaka ngjung ktha mah bok kti Booi Pa Pangsiim noh “Kei hin Alapha jah Omeka, aksük jah akpäih naaka kah thoon kti” tilü ah pyen.
9 Kei, Johaan nah nih nah bea kah thoon kti. Booi Jeishüh Khritoa phäh mkhuh mhlih nah nih khaam naak u üng kei phi kah ngpüi kti. Khritoa upa pe jah Khrito noh ah ning jah peeta mlung mshaaü naak üng kei phi kah ngpüi kti ni. Kei noh Pangsiima kkhyü kpyaü lü Khritoa mong kah shak shia phäh üng Patamo ah nih ti tui shonga kah veyah kti ni.
10 Mkhyangsiim üng Khritoa lo be vaia mhnüüp mhnüh mdan üng kah hmuk kti. Kpuung tum kthaia kba ng'yüng kti kah hnu da kah ngjaak.
11 Asuna kthai noh “Nang noh nah hmuh naküte hin sa up üng yuk kti lü shaang kkhyüh üng jah kbia. Ephet mlüh, Samüna mlüh, Peka Muum mlüh, Thia Tira mlüh, Satih mlüh, Phila Tephi mlüh, Lotih Ke mlüh-ea vek kti shaangea veei jah kbi bä” tilü ah pyen.
12 Asun üng nah ngthuh ei püi kti sun hmuhlü ngüshe kah hnu da kah va mang kti. Asun üng mei phäih taak naak vai xüi üng ah nih pyaan ktung kkhyüh kah hmuh.
13 Xüi ktungea kshuunga kkhyaanga mäi mat kah hmuh. Ah nih noh phyang kkyu nu jih lü xüi üng ah nih pyaan ksooi süüp üng ngsüüp ei kti.
14 Ah lu jah ah lu sham phi phai kpea kba book kti. Kkhui tooia kba book kti. Ah mik phi mei kdääia mäi ni.
15 Ah kho phi mei üng ah nih kphuum dääi kti ke üng täng kti. Ah kthai ta nga shüh ksheng üng ngshooi lok kti tui nua lun mana kba ni.
16 Ah kkheet kut üng aai shi kkhyüh ah bi. Ah mpyong üng hnu ma kxaat ksim kshaaü lut lok kti. Ah hmaai phi mhnüüp ngshuunga kho mika kba vaai kti.
17 Kei noh ah nih kah hmuh jah ta akthia kba ah kho kuunga kah ngjaih-in kti. Ah nih noh ah kkheet kut kah kkhaana mtaih lü “Käh kyüh eia, kei hin aksük jah akpäih naak ni.
18 Kei hin xüng kti kah pät kuung ni. Kei hin thi khoi ngü she phi angshääia kah xüng kkhai. Kei üng kkhyaanga shak mthih naak jah mphyün naak khoh-a hiit vek kti ni. Mo Pi kshoh nghmon naak khoh jah khaih naak khoh-a hiit kei üng vek kti.
19 Nah hmuh naküt jah yuka. Tuh hi thoon hlok kti phi nishe, ngooia thoon hlok lok kkhai phi nishe jah yuka.
20 Kah kkheet kut üng kah bi nah nih hmuh aai shi kkhyüh jah xüi mei ktung hin ngthup ktia monge ni. Ahin aai shi kkhyüh-e hin shaang kkhyüh-ea ngshäe ni. Nah hmuh xüi mei ktung kkhyüh hin phi shaang kkhyüh-e ni.