1 Pangsiima ngxü ngkou ei naak hin pha khoh vaia kkhyü taam nih nih-ea phäh tuh vei säpa veham kti ni. Asuna thoon lü ngxü ngkou ei naak sun am pha kti nang nih-e üng ka käh ave vaia nih mseei vai u hlü kti ni. 2 I lüni ti ta Mosheia kha üng kaea kba nih nih-e noh phi thang kdo kkya nih ngjak ktie ni. Lüphi thang kdo kkya ah nih ngjaak üng am jum ei ulü ah nih phäh i a phi am kyah. 3 Nih nih jum ei ktie ta Pangsiima dä nih ngxü ngkou ei vaai ktie ni. Pangsiim noh ah pyen ta “Kei nah mlung kshou ei ktia thoon lü ‘Kah ngxü ngkou ei naaka ah nih nih-e i tüh-a phi am vaang lo-yah u’ tilü kah mkhyah ni” tilü ah pyen. Ah nih noh kho mdek ah mhnün msenga kkhyüh lü ah khuut ngpääng kyo lüphi ahin kba ah pyen ni. 4 I lüni ti ta Sangsiim üng kho mhnüüp kkhyüh-a mong hin kba ng'yuk kti ni. “Pangsiim ta amhnüüp kkhyüh üng ah khuut poh ngpääng lü ngxü kti ni” tilü vek kti. 5 Ahina ngkho Sangsiim üng ah pyen be tü ta “I tüh-a phi ah nih nih-e hin vaang lo-ulü keia dä am ngxü ngkou ei yah u” tilü ni. 6 Aksük dä däa thang kdo kkya ngjak ktie noh am jum ei ulü am pha u. Pangsiima dä am ngxü ngkou ei yah u. Asuna thoon lü akhäkea phäh ta vaang ulü Pangsiima dä ngxü ngkou ei naak vai mkot veham kti. 7 Pangsiim noh hleh be tü lü kho mhnüüp mat xü lü “tuh ngooi” ah ti ni. Mosheia kha päih lü kho kum kho vei anghjook kona akkhaana ng'yuk pääng ktia kba Pangsiim noh shang phuhlang Davit üng “Tuh ngooi Pangsiima kthai nah nih ngjaak üng käh nghnga ngsang ua” ah ti. 8 Pangsiim noh Isare kkhyaange ah jah pha hlü shak ngxü ngkou ei naak su Mosheia hnua ah nih khong Joshüh noh Isare-e ah jah seh püi ksang ta Pangsiim noh kho mhnüüp ksea mong pyen ham kkhai am ni. 9 Asuna thoon lü Pangsiim ngam püi mhnüüp üng Pangsiima kkhyaangea phäh ngxü ngkou ei naak vai veham kti. 10 I lüni ti ta Pangsiima ngxü ngkou ei naaka vaang ktia kkhyaang sun Pangsiim ah khuut üng ah ngxüa kba ah khuut üng ngxü yah kkhai ni. 11 Asuna thoon lü nih vaang lü Pangsiima dä nih ngxü ngkou yah vaia nih mtun ei ksang kom u. Isare kkhyaange noh Pangsiima pyen am ksang na-ulü am ah nih vaan khoh-a kba nih nih-e ta käh nih thoon kom u.

12 Pangsiima kkhyü hin xüng lü khuut poh kti ni. Pangsiima kkhyü hin hnu ma kxaat ksim kshaaüa kthaka xaat kti. Yuh ngmik jah yuh-a k'uma vek kti kkhiing säpa shun khya ktia kba Pangsiima kkhyü noh kkhyaanga mlung kkyoong jah Pangsiima peeta Mkhyangsiim phi jah mkhya-in kti ni. Mlung kkyoonga su ngngaih jah nüt yaan phi jah yü khya kti ni. 13 Pangsiim noh käh ah hmuh-a i sa phi thuh vih lü am ng'yah. Ah mhnün mseng naküt hin ah hmaai ma-a pou dang päih kti. Ah nih-a veei nih phyeh pyen be päih yah kkhaie.

14 Asun kba ta nih kpyaü hü jum ei naak säm ktia nih hjuum kyet kom u. I lüni ti ta nih nih-ea phäh kkhaan khoa sit lü Pangsiima hmaai ma-a vaang kti khotu ngsiim kdäm bok vek kti ni. Asun hin Pangsiima sa kpa Booi Jeishüh Khrito ni. 15 Nih nih-ea khotu ngsiim kdäm bok sun noh nih ktha-a ngseek naak jah su ngngaih peet thei kti ni. Mkhye kkhai hlo hleep naak naküt nih shoong eia kba nih khotu ngsiim kdäm bok noh phi khaam ei päih kti. Lüphi ah nih noh mkhye naak am poh laang. 16 Asuna thoon lü käh kyüh kyook ngke ei laang lü nih Pangsiima Booi ngoh naak üng nih säh seng vaai lü ah bä naak hin nih dou ei vai u. Asun kba nih thoon ta Pangsiim noh jah mpyeen ei lü nih hlü ko ei loa ksüün üng Pangsiim noh ah bä naak üng jah ku ei kkhai ni.