1 Khotu ngsiim kdäm bok naküt sun kkhyaange üng xü lü kkhyaanga phäh Pangsiima hmaai ma-a jah pyen peet kkhaia ah msoon ni. Ah nih noh kkhyaangea mkhyea phäh külak jah khah naak sun üng Pangsiim jah khah peet kti ni. 2 Ah pät kuung phi ahlü naak amjü mjü vek ktia thoon lü mkhye naak poh yot ktie jah lam hmü ktia kkhyaange sun hnip hnooi lü jah non ei khoh kti. 3 Ah pät kuung ahlü naak vek ktia thoon lü kkhyaangea mkhyea phäh däk jah khah peet kti am nilü ah päta mkhyea phäh phi khah yah kti ni. 4 U noh phi hlüng taai kti khotu ngsiima khuut poh kkhaia ah pät noh ah pät am msoon ei khoh. Pangsiim noh Aron ah msoona kba khotu ngsiim kdäm naküt ah jah msoon ni. 5 Asun kba Khrito noh phi khotu ngsiim kdäm boka ah thoon vaia ah pät noh ah pät am msoon mtaai ei. Pangsiim noh “Nang hin keia ning sa ni, tuh ngooi kei phi nanga pa-a kah thoon kti ni” tilü ah nih sun ah msoon ni. 6 Pangsiim noh phi “Nang hin Meilik Sedeka kba angshääi kuunga khotu ngsiim kdäma nah thoon kti ni” tilü ah pyen. 7 Booi Jeishüh nghngi siima thoon lü kho mdeka ah ve k'um üng ah nih sun thih naaka kkhyüh kuum kyan khoh kti Pangsiima veeia ngpyaang lü ah kphyü tui üng tä sham lü nghui nak kti. Ah mlung mhneem lü Pangsiim phi lei shong lüta Pangsiim noh ah tä sham ah ksang naak ni. 8 Ah nih hin Pangsiima sa-a thoon kyo lüphi khui kha khaam naak üng Pangsiima pyen ksang naak vaia ngthei yah kti. 9 Ah nih sun ah küm seei lo kona ah pyen ksang nak kti abänga phäh angshääia kuum kyan naaka phung nua thoon kti. 10 Pangsiim noh “Ah nih sun Meilik Sedeka kba khotu ngsiim kdäm bok ni” tilü ah mhlüng mtaai ni.

11 Asuna ngkho kho hah kah nih pyen vai veham kti. Lüphi nghmoong lü am nah nih dang yah to ktiea thoon lü ning jah msuh mtheh vai khak kti. 12 Tuh vei hnüh üng ta jah msuuk mtheh kkhaia nah nih looi ngkäih hnüh kyo ktie. Lüphi Sangsiima k'uma aksüka ngthei naake ning jah mthei be vai hlü ham kti ni. Nang nih-e hin noh atak am ei khoh ham u kti lü sih tui ni nah nih ook khoh ham u. 13 Sih tui o ham kti ta hnashen ham ni. Sang kti msuh mtheh naak jah khye kti msuh mtheh naak am yü khya thei ham u kti. 14 Atak ta akdäma ei koong ni. Asune hjum msih thei leh lo-ulü theem ngvaai lo-ulü akdo jah akshe yü khya lo thei hnüh ktie.