1 Ngsiim ngsaih kti kah be naeo, nang nih-e phi Pangsiim noh ning jah khü kti ni. Nih jum ei naak ngshä jah khotu ngsiim kdäm boka thoon kti Booi Jeishüh Khrito hin aläa shüüm kyet ua. 2 Ah nih msoon kti Pangsiima kkhaana kkhyü shing üng vek kti ni. Asun Moshei üng va täng kti. I a thoon lüni ti ta Moshei phi Pangsiima kkyoong üng kkhyü shing lü khuut poh kti. 3 Lüphi Booi Jeishüh Khrito hin Mosheia kthaka jou taai mah kti. I lüni ti ta im ksha hin ima kthaka jou taai mah kkhaia looi ngkäih kti ni. 4 Im naküt hin mat mat noh ah nih shak ni. Akve naküt tüüi mdoong kti ta Pangsiim ni. 5 Moshei ta Pangsiima kkyoong long abänga phäh xüh shoh-a thoon lü kkhyü shing üng vek kti ni. Pangsiim noh malama thoon lok kkhai ah pyen naak üng Moshei hin shak shi kti ni. 6 Khrito ta Pangsiima sa-a ah thoona kba ah kkyoong long üng kkhyü shing üng vek kti. Nih nih-e ta nih ääp ei u sun akpäih naak säpa käh kyüh kyook ei lü nih ksün ei kyet u ta Pangsiima kkyoonga nih ngpüi ktie ni.

7-8 Asuna thoon lü Mkhyangsiim noh “Tuh ngooi nang nih-e noh Pangsiima kthai nah nih ngjaak üng nah nih nghnga käh ngsang shak ua. Ahlaan üng nah nih mah püi mah pooke moa kah jah kshü kset üng asun kba nah kpet mjak khoi ktie ni. 9 Asun üng nah nih mah püi mah pooke noh kho kum kphyü kip ah nih phäh-a kah khuut poh hmuh kyo ulüphi nah ngnüt ngheih püi ktie. 10 Asuna thoon lüni kei hin asuna kkhyaangea kkhaana kah thüi ta. Ah nih nih-e hin ah nih mlung kkyoonga anghläia lam hmü ktie ni. Ah nih nih-e kah jah tüih naak hlüa lam am läk hlü u” tilü kah pyen ni. 11 Pangsiim noh “Kei thüi ngüshe asue sun kah jah peet hlüa ngxü ngkou ei naak i am yah u tia kah mkhyah ni” tilü ah pyen. 12 Kah be naeo, nah nih kshuunga u noh phi asun kba käh jum ei hlü lü nghnga ngsang kti käh ah ve vaia mseei ei u bä. Asun kba thoon kti ave ta ah nih noh xüng kti Pangsiima kkhyüh nglat be to kkhai 13 Ksüün ave ham hin üng mat noh mat jum ei naak angkhääng vaia nah nih püi ktha pe ua. Mkhye noh ah ning jah mhleei naak üng u phi nghnga käh angsang vaia mseei u bä. 14 Asun kba Khrito nih üm na lo-ulü akpäih naak säpa ngkhääng ktia nih üm naak u ta nih bänge hin Khritoa looi püia nih thoon kkhaie ni. 15 Sangsiim üng hin kba ng'yuk kti ni “Nang nih-e noh tuh ngooi Pangsiima kthai nah nih ngjaak lo hin üng ahlaan üng Pangsiim nah nih kpet mjaka kba käh nghnga ngsang ti ubä” tilü vek kti. 16 Pangsiima kthai ngja-ma lü Pangsiim kpet mjak ktie ta ue ni. Moshei noh Ekip pea kkhyüh ah jah khü lo Isare kkhyaang abäng, am ni bä. 17 Pangsiim u a kkhaana kho kum kphyü kip ah mlung shou kti ni. Mkhye ulü moa kyutong lü thik ktiea kkhaana Pangsiim ah mlung shou kti, am ni bä. 18 Pangsiim noh “Kah jah peet hlüa ngxü ngkou ei naaka i tüh-a phi am lai u” tilü ah mkhyah üng ue ah jah pyen ni. Ah nih kpet mjak ktia kkhyaange ah jah pyen, am ni bä. 19 Asun kba ani ta am ah nih jum ei ua phäh üng Pangsiima ngxü ngkou naak am pha khoh u atia nih hmuk ktie ni.