1 Asuna thoon lü nih ngjaak ua kkhyü ksang hin sha lü nih mseei kyet vai u. Am ani ta lam nih hmü khoh ktie ni. 2 Pangsiim noh kkhaan kho ngshäe üng ah jah pyen shak kkhyü üm naak vai vek kti. Asuna kkhyü lüüm kkaan ktia kkhyaang, käh ksang nak ktia kkhyaang naküt Pangsiim noh looi ngkäih ktia mtaam ah peet ni. 3 Asun kba ani ta Booi Jeishüh Khrito üng Pangsiim noh ah jah peet hlüa däm duh kti kuum kyan naak am nih suh lih ei ta Pangsiima peet mtaam üng i hok kba nih lät khoh kkhai ni. Asuna kuum kyan naak aksük dä däa Booi Pa noh ah kpyaü ni. Ah nih-a pyen ngjak ktie noh nih nih-e üng “Aksang ni” tilü ah nih jah shak shi ni. 4 Pangsiim noh ah hiit üng ngshing ngte naak, mün sam kshe amjü mjü poh kti Mkhyangsiim üng phi ah päta mlung hlüa khyaih naak khoh-e jah pek kti. Asune üng kuum kyan naaka mong hin sang kti atia Pangsiim kuung phi shak shi kti.

5 Tuh-a kah pyena kho mdek hin Pangsiim noh akthaaia ah mhnün mseng vaia kho mdek ni. Ahin kho mdek up kkhaia Pangsiim noh kkhaan kho ngshäe am jah msoon. 6 Sangsiim üng ng'yuk kti ta “O Pangsiimo, kkhyaang hin i kshük phi am ni xa kti nah shüüm kyet ni, kkhyaang sa hin i lü nah mseei kyet ni. 7 Nang Booi Pa noh kkhyaang sa hin kkhaan kho ngshäea kthaka noong vei nah neem shak ni. Tuh-a ta kkhyaang sa sun jou taai jah hmaai mah kkhaia nah msoon ni. 8 Nang Booi Pa noh ah nih sun akve naküt up kkhaia nah msoon” tilü vek kti. Pangsiim noh akve naküt hin kkhyaang sa-a mkha kkea ah taak ta am ah up i sa phi am ve ti. Lüphi tuh-a ta akve naküt ah mkha kkea vek kti ati sun am nih hmu-yah ham. 9 Lüphi nih nih-e noh ta Booi Jeishüh hin nih hmuh u ni. Pangsiim noh ah nih sun kkhaan kho ngshäea kthaka noong vei aneem shak ni. Ah nih noh khui kha naak jah thih naak ah khaam eia phäh üng Pangsiim noh tuh ta lu ngbüna kba jou taai jah hmaai mah naak ah peet ni. Asun kba Booi Jeishüh hin Pangsiima bä naak üng kkhyaang naküta phäh thih naak khaam ei kti. 10 Booi Jeishüh Khritoa phäh jah Khrito üng Pangsiim noh akve naküt jah mhnün mseng lü jah shääm kyet kti. Booi Jeishüh noh ah jou taai üng kkhyaang kho hah jah ngpüi shak lü kuum kyan naak ah nih yah vaia lam jah mshüüm kti. Asuna thoon lü Booi Jeishüh khui kha ah khaam naak üng ah küm seei vai hin looi ngkäih ktia Pangsiim noh ah mkhyah ni. 11 Ah nih noh kkhyaange sun ah nih mkhye naaka kkhyüh ah jah ngsiim ngsaih shak. Jah ngsiim ngsaih shak kti jah ngsiim ngsaih lok kti ah nih bäng sun ah nih pa mat däk vek kti. Asuna thoon lü Booi Jeishüh noh kkhyaang sae sun “Kah be naeo” ah ti vai am jah ngke ei na. 12 Ah nih noh “Pangsiimo, kah be nae hin nah mong kah jah mtheh kkhai ni. Ah nih ngkhääm naaka phi kah ning mküüi mtou kkhai” tilü ah pyen. 13 Ah nih noh “Kei noh Pangsiim kah üm nak kkhai” ah ti ni. Ah pyen be tü ta “Bük ua, kah pät jah Pangsiim noh ah nah peeta sa nae hia kah nih vek ktie ni” tilü ah pyen. 14 Ah nih noh “Kah sa nae ni” ah tia kkhyaange hin mti sha üng vek ktiea thoon lü ah nih phi kkhyaang saea kba mti sha üng nghngi siima thoon lok kti. I lü asun kba thoon kti ni ti ta ah nih-a thih naak üng thih naaka hiit ka nak kti Shatan yaai pa ah sim pyak vaia phäh ni. 15 Asun kba thih naak kyüh ulü ah nih shak nu üng mpya-a kba vek ktie sun ah jah mhlät ni. 16 Aksanga ta kkhaan kho ngshäe jah ku ei hlü kti am ni. Apyahama mjü mjoonge jah ku ei hlü kti ni. 17 Asuna thoon lü i k'eih luum üng ah nih sun ah be naea kba thoon lo yah kti. Asun üng ah nih sun mpyeen ei naak jah kkhyü shing üng vek kti khotu ngsiim kdäma thoon lü Pangsiima khuut ah poh-a phäh üng Pangsiim jah kkhyaange jah ng'ye shak kti. 18 Ah pät kuung noh mkhye kkhaia hlo hleep naak khaam lü mkhuh mhlih suun ei ktia thoon lü tuh-a hlo hleep naak khaam ei ktie jah ku ei khoh kti.