1 Jüdah-ea thuum hin anghua mäi ni. Pangsiim noh ngooia phäh ah poh pyaan hin do bok kti. Asuna Jüdah-ea thuum sun kkhaan khoa vek kti hjok khah naak aksangea ajoong shang am ni ham. Akum tä lü kho mdeka khah naak alang lang üng Pangsiim khah ktie. Asuna khah naak üng Pangsiim üng säh lok ktie am küm seei khoh u. 2 Pangsiim noh asun kba hjok khah ktia kkhyaange ah nih mkhye naak jah ngsiim shak kti ani ta ah nih khah be be vai am hlü ti. Asun kba athoon ta “Mkhye naak ve ham kti” tilü ah nih mlung kko noh am jah kbäü ei ti. 3 Lüphi asuna khah naak noh akum tä lü ah nih mkhye naak jah shüüm ei shak kti. 4 I lüni ti ta she shang jah mea thi noh kkhyaangea mkhye sun am jah mthih peet khoh laang. 5 Asuna thoon lü Khrito kho mdeka ah lo üng ah nih noh Pangsiim üng “Booi Pao, nang noh hjok mkhäh jah khah naake am hlü ei kti. Lüphi keia phäh kah puum sha hin nah nah piit pyaang peet ni. 6 Kkhyüng kshei mei üng mkhih lü mkhyea phäh khah hin Booi Pa nah mlung am je. 7 Asuna thoon lü kei noh ‘O Pangsiimo, keia mong Sangsiim üng ng'yuk ktia kba hia kah vek kti ni. Nah mlung hlü kah poh kkhaia kah lok kti ni’” tilü ah mtheh. 8 Aksüka ah pyen ta “Booi Pao, nang noh kkhyüng kshei mei üng mkhih jah mkhyea phäh khah naak jah hjok mkhäh naake hin am hlü ei kti. Nah mlung am je” tilü ni. Asuna khah naake abäng thuuma kba poh ulüphi ah nih noh asun kba ah pyen ni. 9 Ah nih noh “Pangsiimo, kei hia kah vek kti. Nah mlung hlü kah poh kkhaia kah lok kti” tilü ah pyen. Asun kba ni Booi Pa noh khah naak kphyüm not lü asuna ksah-a Khritoa khah naak kthaai ah taak ni. 10 Booi Jeishüh Khrito noh Pangsiima mlung hlüa poh mshah ktia thoon lü ah nih mkhye naak abäng jah ngsiim ngsaih shak kti ni. I lüni ti ta ahun däk üng angshääia phäh ah puum sha ah khah ni. 11 Jüdah khotu ngsiim naküt noh amhnüüp tä lü ah nih khuut poh ktie. Ah nih nih-e noh khah naak atäng üng anghläia khah ktie. Lüphi asuna khah naak naküt noh mkhye naak am ngsiim shak khoh laang. 12 Lüphi Khrito noh mkhye naaka phäh ahun däk üng anghläia phäh khah ma lü kona Pangsiima kkheet da ngshut kti. 13 Pangsiim noh Khritoa ye-e sun ah mkha kkea ah taak vei säpa asua ngshut lü mtät kti ni. 14 I lüni ti ta khah naak mat däk üng angshääia phäh-a ah nih noh Pangsiima kkhyaange jah küm seei shak kti. 15 Mkhyangsiim noh phi asun kba shak shi kti. 16 Ah nih noh “Booi Pa noh ‘Ahina be khüt hin ah nih nih-e üng kah jah taak püi kkhai ni. Keia thuum ah nih mlung kkyoong k'uma xon ngüshe ah nih su ngngaih naak k'uma kah yuk kkhai ni’” ah ti. 17 Kona ah nih noh “Ah nih mkhye jah thuum lüüm kkaan naake am shüüm ti laang ngü” tilü ah pyen. 18 Asun kba Pangsiim noh kkhyaangea mkhye mshoh ah mhlät pääng ta mkhyea phäh khah vai am hlü ti.

19 Kah be naeo, nih nih-e hin Booi Jeishüh Khritoa thia phäh üng angsiim ngsaih boka hnün nih vaan khoh vaia nih mlung üp kti. 20 Booi Jeishüh Khritoa puum sha ti naak hlü jih kda k'uma nih luh khoh vaia lam akthaai jah nghmon peet kti. Asuna thoon lü angsiim ngsaih boka hnüna nih lut khoh kti. 21 Pangsiima im up kti khotu ngsiim kdäm bok phi nih nih-ea phäh vek kti. 22 Asuna thoon lü mlung kkyoong ksang jah jum ei naak üng mkhüh üp lü Pangsiima veei nih säh vai u. I a thoon lüni ti ta mkhye naak üng nih ngsiim ngsaih lolü nih mlung kkyoong noh am jah kbäü ei ti. Nih puum sha phi tui ngsiim üng mthih pääng ni. 23 Nih kpyaü hü ääp ei naak sun ngkhääng ktia nih bikyet kom u. I lüni ti ta kkhyü taam jah pek kti Pangsiim hin kkhyü shing üng vek kti ni. 24 Mhlä kphya naak däm lolü do ktia khuut nih poh vaia mat noh mat nih püi mthü mhlet vaia nih mtun ei kom u. 25 Kkhyaang akhäka kba hjok khah ngkhääm naaka käh sit lü käh nih ve kom u. Booi Jeishüh ah lo naak be vaia mhnüüp säh hnüh ktia thoon lü mat noh mat sha lü ktha nih pe kom u. 26 Nih nih-e hin Pangsiima aksang theem naak dou daang lü nih mkhye nih kshing ei mah mah lü mkhye nih poh ei lä ta nih mkhye msiim naak vaia khah naak i am ve ti laang. 27 Pangsiima mtaam peet naak ni, Pangsiima ye-e jah ksim kpyak kkhai mei ngphyüi sun kyüh ei vai ni ave ti. 28 Kkhyaang mat hin noh Mosheia thuum lüüm kkaan kti ni atia kkhyaang nghngih, kthum ah nih shak shi ta asuna kkhyaang sun mpyeen ei naak käh ve laang ktia thi yah kti. 29 Kkhyaang mat hin noh Pangsiima sa kpa sun hmu mshit lü ah nih-a mkhye mthi kti Pangsiima be khüt üng shääng kti Khritoa thi sun am ah suh lih ei ngtu ta Mkhyangsiima bä naak sun ah thang mseh ta asuna kkhyaang sun Pangsiim noh kshe hleen bok ktia mtaam pek kkhai tia am nah nih ngngaai ktieo. 30 Pangsiim noh “Kei noh kah thung ei be kkhai ni. Nah nih mkhye naaka kheen kah ning jah pek kkhai ni” ah ti. Asuna Pangsiim sun nih hmat ktie ni. Kona Pangsiim noh phi “Booi Pa noh ah kkhyaange jah si jaang kkhai ni” tilü ah pyen. 31 Nih mkhye naak käh ngsiim xa lü xüng kti Pangsiima kut k'uma nih lai vai kyüh ei shebok kti. 32 Ahlaan üng nah nih thoon ve sun shüüm ei be ua. Aksüka Pangsiima akvaai nah nih hmuh kona khui kha mkhuh mhlih amjü küm nah nih khaam ei ktie ni. 33 Kkhyaangea ma-a ning thang msheet ulü mkhuh mhlih nah nih khaam ei khoi ktie. Nah nih püiea mkhuh mhlih khaam ei üng phi nah nih jah kpüi ktie. 34 Nang nih-e noh khup üng kyum kti nah nih püie sun jah mpyeen ei lü nah nih jah ku ei kti ni. Nah nih khoh kkhyam ah ning jah huh ei üng phi je kyai lü nah nih suun ei ktie. I lüni ti ta asuna kthaka do ktia khoh kkhyam, i tüh-a phi am khyük ti kkhaia khoh kkhyam nah nih phäh-a vek kti atia nah nih kshing ei ktie ni. 35 Asuna thoon lü tuh-a ksüün üng phi ktha käh jai ubä. Pangsiim anghläia nah nih üm naak lä ta kheen akdäm nah nih yah kkhaie ni. 36 Nang nih-e hin Pangsiima mlung hlüa ve soh poh mshah lü ah nih-a kkhyü taama kba nah nih yah khoh vaia mlung nah nih mshaaü vai hlü kti. 37 Sangsiim üng ng'yuk kti ta “Noong vei sa mtät ua. Lobe kkhai sun käh sü soon lü aksanga lobe kkhai ni. 38 Ngpyuun kti keia kkhyaange ta jum ei naak üng xüng kkhaie ni. Lüphi mat mat hin ah nglat be ta kei noh am je na ngü” tilü ni. 39 Nih nih-e ta nglat be lü sim pyak kkhaia kkhyaanga am nih thoon u. Nih nih-e hin nih jum ei kyet lä lü kuum kyan naak nih yah kkhaie.