1 Be khüt ksük üng Pangsiim noh kkhyaange üng hjok khah naak thuume ah jah peet. Kho mdeka hjok khah naak vaia hnün phi jah piit pyaan shak kti. 2 I lüni ti ta Pangsiim noh ah nih hjok khah naak vai jih shung müüp sun ah jah pyaan shak ni. Asuna müüpa akhan ksüka mei ktung vek kti. Pangsiima kkhaai kpeh taak naak kyäng phi vek kti. Asuna khaan sun ngsiim ngsaih ktia hnüna ah nih shui ni. 3 Anghngih naak jih angda naak ta angsiim ngsaih naak boka hnüna ah nih shui ua khaan ni. 4 Ang'uui mei üng ah nih shi naak xüi üng ah nih poh u khah naak xüi kooi vek kti. Kona Pangsiima be khüt shüüm naak vai teta vek kti. Asuna teta sun aleng suuma xüi üng ah nih hloop u ni. Ak'uma Mana kkhaai kpeh taak naak xüi uum ni, Arona ka angpyü mah kshong khe phi vek kti ni. Pangsiima thuuma ng'yuk naak lung pelepe phi vek ktie. 5 Asuna be khüt teta-a kkhaan su Kherupina ah nih shui jou taai mah ktia kkhaan kho ngshä xooia lup vek kti xooi. Kherupin xooi sun Pangsiim ahia aksanga vek kti ati sun mik üng hmuh yah-a angshing ngte naak ni. Kherupina ah ning ngphyae sun noh Pangsiima mpyeen ei naak ngoh naak sun kduum kti xooi ni. Lüphi tuh-a asu bang khäk kheh lü abäng jah pyen kshak naak vaia ksüün am ve. 6 Nih jah pyen kshak naküte sun ah nih jah piit pyaang pääng kona khotu ngsiime noh akhan ksüka amhnüüp tä lü lut ulü Pangsiima khuut üng shääng ei ktia ning sho poh ktie. 7 Lüphi angsiim ngsaih naak bok anghngih naak akhana ta khotu ngsiim kdäm bok däk ni kum mat üng ahun ah vaan yah. Ah nih sun noh thi seh püi lü apäta mkhyea phäh jah kkhyaanga poh yot mkhyea phäh Pangsiim khah kti. 8 Akhan ksüka ah ve ham üng angsiim ngsaih naak boka khaan luh naak vai lam am nghmong loham atia Mkhyangsiim noh asun üng kkhyaange üng jah mdan kti. 9 Asun hin tuh-a ksüün üng shääng ei kti pum msäp naak ni. I ti hlü ni ti ta Pangsiim sun külak üng hjok mkhäh jah kkhyüng ksheie üng khah naak däk hin üng hjok khah ktia mlung kkyoong hin am ngsiim khoh. 10 Ei ook jah mthih kphaih naak amjü mjü üng shääng ei kti ning sho phi vek kti. Asue sun puum sha-a kho kpung üng shääng ei ktia thuume ni. Pangsiim noh abäng akthaaia ah pyaan be vei säpa ni asuna thuume sun ah jah peet. 11 Lüphi khotu ngsiim kdäm bok Booi Jeishüh Khrito üng do bok ktia ning lam pha lo pääng kti ni. Ah nih sun sha lü hlüng taai küm seei bok ktia jih shung müüpa Pangsiima khuut poh kti. Asuna jih shung müüp ta kkhyaanga poh mshah am ni. Kkhyaanga mik üng hmuh khoh-a kho mdek üng am shääng ei. 12 Booi Jeishüh ahun däk angshääia phäh asuna angsiim ngsaih boka hnün sun vaang pääng kti ni. Ah nih noh Pangsiim khah naak vaia mea thi jah she msea thi seh püi kti am ni. Ah päta thi seh püi ktia thoon lü nih nih-ea phäh angshääia kuum kyan naak yah kti. 13 Jüdah-ea thuuma kba khotu ngsiim kdäm noh am ngsiim ngsaih kti kkhyaangea kkhaana mea thi jah she shanga thi ah kshaih ni. She shang sa mkhih naaka kuuk phi kkhyaangea kkhaana ah kthüih ni. Asun kba poh üng Jüdah-ea thuuma kba kkhyaange ngsiim ngsaih lok ktie. 14 Asun kba ani ta Khritoa thi noh nih nih-ea phäh sha lü do ktia jah poh peet khoh kti ni. Khrito hin küm seei kti khah naaka thoon lü angshääia vek kti Mkhyangsiim üng Pangsiima veei apät kuung noh khah kti. Ah nih-a thi noh nih nih-ea mkhye mthi kti ni. Ah nih noh ah thi üng i am kyah ktia ning sho üng jah mhlät kti. Asun üng nih päta mlung kko noh am jah kbäü ei ti. Asuna thoon lü xüng ktia Pangsiima khuut nih poh khoh hnüh kkhai. 15 Asun kba Khrito noh asuna be khüt kthaai üng Pangsiim jah kkhyaanga kkeh-a jah kphye be kti. Pangsiima khüa kkhyaange ta ah kkhyü taama kba angshääia khoh kshäänga ah nih thoon yah vaia phäh ni. Nih nih-e noh be khüt ksüka kkea nih ve k'um üng mkhye nih poh ktie. Lüphi mata thih naaka phäh üng asuna mkhye naaka kkhyüh nih ngsiim ngsaih lo-ulü asun kba nih thoon lokhoh ktie ni. 16 Kkhyaang mat noh ah thih hlaana ah tu sae üng khoh ah nih ngküh vai sa khyup jah poh peet kti. Asuna kkhyaang angshing ngtea ah thih kona va sa khyupa kba khoh sun yah ei kkhaie. 17 Ah xün ham üng ta asuna sa khyup sun shum ei lü am ng'yah ham. Ah thih kona va sa khyup sun shum ei ulü khoh sun shääng na-khoh ktie. 18 Asuna thoon lü Pangsiim noh aksüka ah poh-a be khüt phi thi am ah ngpüi ta i a phi am kyah. 19 Aksüka Pangsiim noh thuum ah jah peeta kba Moshei noh Pangsiima mkhyah-e abäng ah jah mtheh. Kona ah nih noh she msea thi jah mea thi tui üng jah kso ma lü toa mu ashen jah thing hnah mdong üng Pangsiima thuum sa ktoome jah kkhyaange abäng ah jah kshaih naak. 20 Moshei noh “Ahina thi hin sun Pangsiim noh nang nih üng ah ning jah läk shaka be khüta ngshing ngte naak ni” tilü ah pyen. 21 Asun kba Moshei noh jih shung müüpa kkhaana ni, hjok khah naaka shum ei vaie abängea kkhaana thi üng ah jah kshaih. 22 Aksanga ta thuuma kba akve naküt aknung bok hin thi üng ngsiim ngsaih shak ni. Thi am ah mshooi ta Pangsiim noh mkhye mshoh am jah mhlät.

23 Asuna hjok khah naak üng shääng ei ktie hin kkhaan khoa vek ktiea nghu ni. Hjok khah naak vaia shum ei kho mdeka vek kti abänge sun asuna ning lam üng jah ngsiim ngsaih shak vai hlü kti. Lüphi kkhaan khoa shum ei vai vek kti hjok khah naak ksanga phäh ta do bok ktia khah naake hlü kti. 24 I lüni ti ta Booi Jeishüh hin kkhyaanga kut üng shaka hjok khah naaka vaang kti am ni. Ah nih sun hjok khah naak ksanga nghu üng phi am vaang. Ah nih sun kkhaan kho kuung kuunga vaang lü nih nih-a phäh Pangsiima hmaai ma-a vaang vaai kti. 25 Jüdah-ea khotu ngsiim kdäm bok kum mat üng ahun va angsiim ngsaih naak bok sua thi seh püi lü vaang vaai kti. Khrito ta ah pät kuung sun üng anghläia ah khah vai am hlü. 26 Am ani ta aana kho mdek ah mhnün msenga kkhyüh lü anghläia khui kha khaam vai shü kyo. Asuna ksah-a tuh-a kha akpäih naaka ksüün apha lo üng ah nih sun ahunata anghläia phäh-a lolü ah pät noh ah pät khah lü kkhyaangea mkhye ah jah msiim peet ni. 27 Kkhyaang naküt ahun däk thi yah kkhai. Kona Pangsiim noh ah nih sun si jaang kkhai. 28 Asun kba Khrito hin kkhyaang kho hah-a ah mkhye jah msiim peet kkhaia thih naak khaam ei kti. Ah nih sun anghngih naak ah lo be tü üng ta kkhyaangea mkhye jah msiim peet kkhai am ni. Ah nih ah namtät ktie küm seei ktia kuum kyan naak jah pek kkhaia lok kkhai ni.