1 Jum ei naak hin i ni ti ta nih ääp ei hin aksanga thoon lok kkhaia mkhüh üp naak ni. Nih mik üng am nih hmuh yah hin angshaaia vek kti ni tilü mlung üp naak hin jum ei naak ni. 2 Pangsiim noh ahlaan üng nih pu pae asun kba ah nih jum eia phäh jah mküüi ei kti. 3 Pangsiim noh kho mdek hin ah kkhyü üng ah mhnün mseng ni atia jum ei naak üng nih ngja-kya ktie ni. Pangsiim noh mik üng nih jah hmuh yah-e sun am nih hmuh yah üng ah jah tüüi pyaan ni. 4 Apel noh jum ei naak üng Kaaina khah naaka kthaka do bok kti khah naak Pangsiim üng khah kti. Asun kba ah jum eia phäh üng Pangsiim noh Apel sun ngpyuun ktia ah mkhyah ni. Pangsiim noh Apela khah naak ah dou eia phäh üng Apela ngpyuun naaka mong shak shi kti. Asuna thoon lü Apel thipääng kyo lüphi ah jum ei naak üng ngthu ei ham kti. 5 Enoh ta ah jum ei naaka phäh üng käh thi xa lü Pangsiim noh ah jäh shoon ni. Pangsiim noh ah seh püi päänga thoon lü kkhyaange noh shui hü ulü am hmu-u. Pangsiim noh Enoh ah jäh shoon hlaana ah nih sun Pangsiima hlü eia kba vek kti ni atia Sangsiim üng ng'yuk kti. 6 Jum ei naak käh ngpüi xa ktia Pangsiima hlü eia u phi am ve khoh. I lüni ti ta Pangsiima veei säh lo hlük ktia kkhyaang noh Pangsiim vek kti atia ni, ah nih shui hjap ktie do naak jah pek kkhai atia jum ei vai hlü kti. 7 Pangsiim noh ngooia thoon velok kkhaiea mong ah msääi üng Noah noh jum ei naak üng ksang nak kti. Thoon velok kkhaie am jah hmuh ham kyo lüphi Noah noh mhlüüi kdäm nu ah shak. Asun üng ah pät jah ah kkyoong long noh kuum kyan naak yah kti. Asun kba ah poh-a phäh kho mdek kkhyaange abäng ah nih mkhye naak jah ngshing ngte shak kti. Kona ah jum ei naaka phäh üng ngpyuun lolü Pangsiima khoh shäänga thoon lok kti. 8 Pangsiim noh Apyaham ah khü üng jum ei naak üng Apyaham noh ksang nak kti. Hoa ah seh vai phi käh kshing ei xa lü ah khyong pea kkhyüh shot kti. Pangsiim noh ah van vai kho mdek ah peet hlü sun ngooia pek kkhai atia jum ei kti. 9 Pangsiim noh ah van vai kkhyü taam ah peeta pe sua jum ei naak üng Apyaham kho kpyonga kba vek kti. Isak jah Jakop phi kho kpyonga kba jih shung müüpa k'uma vek kti xooi. Isak jah Jakop phi Apyahama kba asuna pe van nak kkhaia Pangsiim noh kkhyü taam ah jah peet. 10 Apyaham noh ta Pangsiima shong shaka mlüh sun ääp ei kti. Asun sun anghläia vek kti, ngkhääng kti mlüh nu ni. 11 Sarah sing lü sa na am kkhyüi sho khoh. Apyaham am ah sa na khoh ti vai üng sa mäh na kpom kkhaia jum ei naak üng Pangsiima veei ngjung ktha yah kti. I lüni ti ta Apyaham noh kkhyü taam jah pek kti Pangsiim sun üm naak vaia ngkäih ktia ah ngngaih ni. 12 Apyaham sun pa kshe kolaih lü am sa na khoh ti lüphi ah nih-a koon shaang ta kkhaan aai shia kba nung mja lü long mdih heena kba pung pyah kti ni. 13 Ah nih nih-e sun ah nih bäng noh Pangsiima kkhyü taam jum ei kyo ulüphi kkhyü taama kba am yah ham ulü thik ktie ni. Lüphi Pangsiim noh kkhyü ah jah taam peet sun jum ei naak üng kho shanga kkhyüh hmu-ulü Pangsiim noh jah pek kkhai atia ah nih mkhüh üp kti. Asuna thoon lü “Kei nih-e hin ahina kho mdeka kho kpyonga kba ngpyot hü hü lü ni kah nih vek ktie” tilü shak shi ktie. 14 Asun kba tik ktia kkhyaange hin noh ah nih pi ngnam vai shui hjap ham ktie atia ngshing ngte kti ni. 15 Ah nih shot naak loa pe sun ah nih pi ngnama ah nih ngngaih ta ah nih nglat hlü be üng nglat be khoh ktie ni. 16 Lüphi asuna kthaka do ktia pe, kkhaan kho pe ääp ei ktie. Asuna thoon lü ah pät Pangsiim kuung noh “Kei hin ah nih nih-ea nah Pangsiim ni” ah ti vai am ngke ei. I lüni ti ta Pangsiim noh ah nih ve naak vai pi ngnam ah piit pyaan peet pääng ni. 17 Pangsiim noh Apyaham ah kshü kset üng Apyaham noh jum ei naak üng Pangsiim khah naak vaia ah sa Isak am kpaam ei. Apyaham noh Pangsiima kkhyü taama kba Isak sa na-kyo lüphi ah sa kpa mat däk sun Pangsiim khah naak vaia ah mshääm ni. 18 Pangsiim noh ta “Isak üng nah koon shaang kyum kya lok kkhai ni” tilü Apyaham üng ah mtheh. 19 Apyaham noh ta “Pangsiim noh Isak hin thih naaka kkhyüh phi mthou be khoh kti ni” tilü ngngaai kti. Apyaham noh ah sa Isak ah dou be hin Pangsiim noh Isak sun thih naaka kkhyüh ah thoh shak be üng täng kti ni. 20 Pangsiim noh Jakop jah Esaau üng malama do kya naak jah pek kkhai ni atia Isak noh jum ei naak üng tä sham kti ni. 21 Jakop noh ah thih hlü ksok ksok üng Joshepa sa xooi üng “Pangsiim noh do kya naak jah pek kkhai ni” tilü jum ei naak üng ah pyen. Ah nih sun ah kshong khe üng ngsho ei lü ngmüm lü Pangsiim hjok khah kti. 22 Joshep noh ah thih hlü hnüh üng Isare-e Ekip pea kkhyüh shot kkhaie ni tilü jum ei naak üng shahma kti. Kona Ekip pea kkhyüh ah nih shot üng Joshepa yuh i hok kba seh püi lü, hoa ah nih msüm vai atia ah jah sük hüt ni. 23 Moshei ah hmi kona ah nu pa noh jum ei naak üng khya kthum ah nih süm ni. Moshei sun hnashen ngtou sa-a ah thoon sun ah nu pa noh ah ni hmuh. Ekip shang phuhlanga mkhyah lüüm kkaan vai phi am kyüh ni. 24 Moshei songpyang lolüta jum ei naak üng Pharoh shang phuhlanga sa nghnua sa kpa-a am ngshui lo hlü ti. 25 Mkhye naak üng shääng ei kti noong vei xe xok naaka kthaka Pangsiima kkhyaangea khaam ei mkhuh mhlih naak üng ngpüi vai ah xü ei ni. 26 Khrito da ngpüi lü thang msheet khaam ei vai sun Ekip pea vek kti ngui xüi külak abänga kthaka phu mah bok kkhaia ah ngngaih ni. I lüni ti ta ngooia yah vaia kheen sun ah ääp eia phäh ni. 27 Moshei hin Ekip pea kkhyüh lü jum ei naak üng shot lü Pharoh shang phuhlanga thüi shei phi am kyüh ei. I lüni ti ta ah nih noh am hmuh yah-a Pangsiim sun jum ei naak üng hmuk ktia thoon lü khui kha khaam ei kti. 28 Jum ei naak üng Phyong Pooi poh lü Isare-ea mkot ktung üng toa thi ah jah jeek shak. Pangsiim noh jah hnim kkhaia ah tüih lo kkhaan kho ngshä noh Isarea sa kpa ksük käh ah hnim vaia asun kba ah jah poh shak ni. 29 Jum ei naak üng Isare kkhyaange noh kkong khoa seh-a kba Mlik Tui Shen sun ah nih kkah u. Ekip kkhyaange noh phi asun kba kkah hlü hnga ulü tui üng ngsum päih ktie. 30 Isare kkhyaange noh Jeirih Kho mlüh nu jum ei naak üng mhnüüp kkhyüh leng ulüta lung üng ah nih ngvoon naak daai kyong phi jaam ei kti ni. 31 Rahapa ah nih shui nghnu mi sun kpa mie jah ve püi lü kheen dou kti. Ah nih ta jum ei naak üng Pangsiim am ksang nak kti ah püiea hlonga am thi yah. I lüni ti ta Isare mjü üng kae Jeirih Kho mlüh ampyua bük vaai ktie sun jah dou lü ah jah ku eia phäh üng ni. 32 Kei noh sha lü kah pyen ham kkhai mä. Kite Oom, Parah, Sham Shoon, Jepatah, Davit, Shamui Lah jah shahma ngsiimea mong pyen naak vai ksüün am veti. 33 Ah nih nih-e noh jum ei naak üng pe kse-e jah tuk lü ngnääng ktie ni. Pangsiima thuuma kba Isare kkhyaange jah up ktie. Pangsiim noh kkhyü taam ah jah peeta kba küm seei lok kti. Ah nih jum ei naaka phäh hleeng shih noh am jah mhleem kshou. 34 Dääi ktia mei mdiim kti. Ksim kshaaü üng thih naaka kkhyüh lät ktie ni. Ah nih ktha-a ngseek ktha phya naaka thoon lok kti. Ngtuk ngshah naaka phi nglou ngthang lok ktie. Kkhyaang mjü kse-ea ngtuk kpoh-e sen kkhaia jah shun kaap ktie. 35 Jum ei naak üng nghnu mie noh thipääng kti ah nih sa na khong pa phi xüng lobe lü yah ei be ktie. Akhäke noh ta mkhuh mhlih khaam ulü sen ei lü ng'yah kyo lüphi am sen ei u. I lüni ti ta do bok kti shak üng thoh lo be vaia phäh ni. 36 Akhäk noh ta yaih yün ei jah te kpaai khaam ktie. Akhäke ta mthi yüüi üng jah khit lü khup üng ah nih jah taak u ni. 37 Akhäke ta thih onga lung üng ah nih jah khoong tong u. Akhäk ta ah nih puum jah kkyük lü ah nih jah hnim. Akhäk ta ksim kshaaü üng ah nih jah sap tong. Akhäk ta to jah mea vun ngvaih lü ngvaak-in hü yah ktie. Ah nih ve soh naak vai im phi käh ve lü khui kha jah mkhuh mhlih khaam ei yah ktie. 38 Kho mdek hin ah nih nih-ea phäh am looi ngkäih tilü mkyaang jah msuunga ngvaak hü lü mdek khuuia veyah ktie ni. 39 Asunea jum ei naak sun Sangsiim üng ng'yuk kyo lüphi Pangsiima kkhyü taama kba kho mdeka am yah u. 40 I lüni ti ta Pangsiim noh nih nih-ea phäh asuna kthaka do kti ah nüt yaan vek kti. Pangsiima nüt yaan ta asuna kkhyaange sun nih nih-e mah mah küm seei lok kkhaia ni.