5
1 Booi Jeishüh Khrito noh nih nih-e ah jah mhlät ni. Ah jah peet lät lang naak üng ve-ei kyet ubä. Jüdah thuum üng ng'ääi kyet lü käh mpya ti ubä.
2 Ngngaai ua, kei Polüh noh kah pyen ma kkhai. Vun moih nah nih khaam ei u ta Khritoa thih naak nang nih-ea phäh i a am kyah ktia thoon kkhai ni.
3 Angtea kah ning jah mtheh be tü ma kkhaie ni. Kkhyaang mat noh vun moih ah khaam ei ta Jüdah thuum abäng sun mseei kuung lü läk yah kkhai.
4 Thuum läk naak üng Pangsiim üng ng'ye vai mtun ei kti nah nih bäng sun Khrito üng nah nih ngkya pääng ktie ni. Pangsiima bä naak hin nang nih-ea phäh am ni ti.
5 Kei nih-e noh ta Pangsiim mah mah ng'ye vaia kah nih ääp ei ktie. Kah nih jum eia phäh Pangsiim noh Mkhyangsiim üng asun kba ah jah poh peet vai sun kah nih mtät ei ktie.
6 Nih nih-e hin Khrito üng nih nglooi ei ta vun moih am khaam ei jah khaam ei sun lang lang kti. Jum ei naak jah mhlä kphya naak üng ve soh poh mshah vai aktung boka kyak kti ni.
7 Aksüka jum ei naak lam üng akdoa nah nih sit ktie kyo. Tuh ta lam ksang sun käh nah nih läk ti vai ua u noh ah ning jah makham u ja.
8 Asun kba hlo hleep naak hin ning jah xü kse kti Pangsiima kkhyüh lok kti am ni.
9 “Kkhaai kso kho hah sun kkhaai phoom amte sa noh kho teh-a phoom shak khoh kti” tilü pyen ei khoi vek kti. (Ti hlü ta khye kti msuh mtheh alääm avaan lo üng Khritjaan kho hah kuunga jum ei naak lam hmü shak khoh kti.)
10 Lüphi Booi Jeishüh Khritoa jah kpüi kpak naak üng tuh vei nah nih phäh-a kah mlung üp kti ni. Aksea msuh mtheh i am nah nih läk khü vai u. Nah nih mlung ning jah up lat shak ktia kkhyaang a u phi Pangsiima mtaam khaam ei yah kkhai.
11 Kah be naeo, kei noh kuum kyan naaka phäh vun moih hlü kti ati sun kah jah msuh mtheh ktia athoon ta i vai mkhuh mhlih kah khaam ei yah ti kti laang ni. Asun sun sang ktia athoon ta Khrito baan lam ktung üng ah thih-a mong kah kpyaü hü üng u noh phi i am kpet mjak kyo u.
12 Nah nih mlung ning jah up lat shak ktie sän vun moih däk käh nik ktia ah nih jah kphyat-in ua ta do bok kkhai shü.
13 Kah püieo, lät naak üng nah nih ve ei yah vai ua Pangsiim noh ah ning jah khü u ni. Lüphi Pangsiima ning jah peet lät naak sun mkhye poh naak vaia mkota käh thoon she. Mhlä kphya naak üng mat jah mat nah nih püi üng ado vai poh peet ua.
14 “Nah pät noh nah pät nah kphya naaka kba nah püi po phi mhlä kphya na-a” tia kkhyü mat thak üng thuum naküt küm seei lok kti.
15 Nang nih-e hin ngtuun ngvook lü nah nih püia mlung nah nih mneh shak ta nah nih pät noh nah nih pätea jum ei naak nah nih kpyak be ktie ni.
16 Kei noh kah ning jah mtheh ma kkhai ni. Mkhyangsiima lam mshüüma kba nah nih ve soh poh mshah ta mlung loa kba kpaam ei am ve ti.
17 Nih mlung lo noh Mkhyangsiima hlü ei sun ah nääng vaia mtun ei kti. Mkhyangsiim noh phi nih mlung lo sun ah nääng vaia mtun ei hnga kti. Mkhyangsiim jah nih mlung lo sun ngshun poh kti ye xooi ni. Asuna thoon lü nah nih hlü eia kba am poh mshah khoh u kti.
18 Mkhyangsiima lam mshüüma kba nah nih ve ksang u ta thuum üng am shääng ei ti u kti.
19-20 Mlung lo üng thoon hlok ve soh ta angte nu ni. Asune ta ngla shui, kkhyaangea nghnu mi, kpa mi üng mkhye mshoh, shik hnak düih jaih, ngto ngbaai ni. Mhnama lup hjok khah, kho yaaia phun üng kkhyaang poh ei, püi mlung naak, ngtuun ngvook, ngkeei ngku, mlunga luh lo, päta phäh däk nghnga naak, shaang ngsiim ngkhoi ngpa, khye kti msuh mtheh jah mthei ni.
21 Kona kkhyaang thi naak, ju mpyüi, ei ook kolaih jah asun üng täng kti mkhye mshoh-e jah mphen vai hlü kti. Ahlaan üng kah ning jah msääia kba tuh phi kah ning jah msääi be tü ni. Asune sun üng mkhye mshoh ei seen kti ta Pangsiima pe üng am shääng ei.
22 Mkhyangsiim üng thoon hlok ve soh-e ta mhlä kphya naak, je kyai naak, diim deih naak, mlung mshaaü, jen je naak, akdo poh, kkhyü shing ni.
23 Kona hnip hnooi jah mlung buh ni. I a thuum noh phi ahin kba akdoe hin am jah shung khaam khoh.
24 Booi Jeishüh Khrito üng shääng ei kti naküt noh ah nih mlung lo ngnei shak jah asun üng shääng ei kti kpaam ei jah hlü ei sun Booi Jeishüh Khrito mah mah baan lam ktung üng ah nih hnim pääng ni.
25 Nih nih-e hin Mkhyangsiim üng angshääia xün naak nih yah ei ktiea thoon lü Mkhyangsiima lam jah mshüüma kba ve soh poh mshah vai hlü kti.
26 Nih nu kkhyap pa kkhyap vai am hlü. Nah nih püia mlung käh kshou shak ua. Ngkeei ngku phi käh poh ua.