4
1 Kah ning jah mtheh ma kkhaie ni. Kkhyaang mata sa hin ah pa-a khoh shääng nak kkhaia kyakyo lüphi kkhyaang kthoia ah ve vei säpa ah nih mpya-a kthaka khoh kkhyam sun am shääng van na-khoh. Lüphi ah pa-a khoh kkhyam jah kho hmün abäng sun aksanga ta ah nih-a van päih ni.
2 Lüphi ah pa noh ah mkhyah-a mhnüüp vei säpa ah sa kpa sun up lü mshui mtääm ktia ti tia veyah kkhai.
3 Asun kba ni nih nih-e phi Khrito am nih jum ei ham u üng hnashena kba nih vek ktie. Kho mdeka thuume noh jah up lü jah mshui mtääm ktie.
4 Lüphi Pangsiim noh ah mkhyah-a mhnüüp üng ah Sa kpa ah tüih lo. Ah nih sun nghnu mi üng hmi lolü Jüdah-ea thuuma kkea vek kti.
5 I lü ah lo vai hlü kti ni ti ta thuuma jah up naak üng nih shuut phyam be ulü Pangsiima sa na-a yah mkäih lät lang naak nih yah vai ua phäh ni.
6 Nih nih-e hin Pangsiima sa na-a nih thoon lo ua phäh Pangsiim noh ah Sa kpa-a Mkhyangsiim sun nih mlung kkyoonga ah vaan shak ni. Nih mlung kkyoonga vek kti Mkhyangsiim noh Pangsiim sun üng “Pa-ääi” tilü ah khü ni.
7 Asuna thoon lü nang nih-e hin mpyae am ni ti. Pangsiima ning sa nae ni. Ah nih ning sa na naak ua phäh khoh shäänga phi nah nih thoon ktie.
8 Ahlaana Pangsiim am nah nih hmat ham üng lung kho tuui yaaia kut üng nah nih vekhoi ktie.
9 Tuh ta Pangsiim hmat lohnüh u kti lü (- aksanga ta nang nih-e sun Pangsiim noh ah ning jah kshing hmat lo ni -) nang nih-e hin va-nglat be lü am jah kuum khoh kti Jüdah thuumea kkea i hok kba thoon lü nah nih vaang hlük ktie ja.
10 Jüdah-ea jeih ei mhnüüp, kum pooi, khya pooi, pooi poh ksüün ta nah nih läk lam kshe kkha tuhan ktie.
11 Kah ning jah pyang ma na-pyei kti ni. Kei noh nah nih phäh-a khuut kah bie i a am suh kyah ktia athoon-in lo vai noh nah mbä khü.
12 Kah be naeo, Jüdah-ea thuum üng käh ng'ääi ei kyet lü keia kba nah nih ve vai ua kah ning jah nghui nak kti. Jüdah-ea thuum kah not üng kei phi nang nih kkhyaang mjü kse-ea kba kah thoon lohnga kti ni. Nah nih veeia kah pha lo ksük sän üng nang nih-e noh am nah bäü hma na-laang u kti.
13 Am khyaih ei ngüshe nah nih veeia om lü aksük ksüka thang kdo kkya kah ning jah mtheh u sän nah nih shüüm ham ktie va, am ni bä.
14 Kei mneh mah sun nang nih-ea phäh mdiim kkhyou ei phyamah mah kyolüphi nah dou daang lü nah nih nah lei shong u ni. Aksanga ta kei sun kkhaan kho ngshäa mäi am ani üng ah pät Booi Jeishüh Khritoa kba kuunga nah nih nah dou daan u.
15 Asän üng ta am nah nih je kyai tong u-shü. Tuh ta i a nah nih thoon lok ktie ja. Nah nih khyaih khoh-a ta nah nih mik hngoh phi kkoih lü nah nih nah su ap hlük kkhaie ni ati sun kei noh kah shak shi kti.
16 Tuh-a kei noh nang nih-e üng aksang sun angte yääta kah ning jah mtheh ua phäh nah nih yea kah thoon-in lok ktio.
17 Sangsiim ning jah mthei ktie joonga thoon ktie sän noh ning mshü mseei tong tuhan ktie. Lüphi ah nih mkhüh ktüüm ta khye kti ni. Asäne noh ah nih nih-ea pyen däk nah nih ngngaih ngjaak vai ua nang nih-e jah kei sun jah ngkya hlüshak ulü thoon ktie ni.
18 Mat mata phäh sang ktia ngnei shak üng mtun ei lü mshü mseei hin aläa do kti ni. Nah nih hlonga kah vea ksüüna kba däk käh nishe.
19 Kah sa naeo, sa mah hlü ktia kkhyüng ksooi ah mshoh mhleei eia kba nah nih phäh-a kah khaam ei yah be tü kti ni. Shak kthaai üng hmi lü Khrito noh ah nih ning up vei säp kuunga kah khaam ei yah lä kti ni.
20 Tuh kuung hi nah nih hlonga kah vehlü pyei kyo kti. Akshou kshata käh ning jah him lü hnip hnooi ktia kah ning jah ngsi ngjaang hlü püi kyo ktie va. I lüni ti ta nah nih mlung ngnei am ning jah hmat khoh ti u ngü.
21 Jüdah thuum läk lam hlük ktieo, i mä kah ning jah kthäh ma kkhai ni. Jüdah thuum laang ta nah nih ngja-kya ktieo.
22 Sangsiim üng ng'yuk kti ta Apyaham sun ah sa kpa nghngih ve mjoh kti. Ah sa kpa mat sun ta mpya-a dä ah nih sa naak ni. Mat ta kkhyaang lät üng ka ah kkhyu üng ah sa naak mjoh.
23 Mpya üng hmi lok ktia sa kpa ta ahmüüna ah sa naak ni. Kkhyaang lät üng ka ah kkhyu sun ah sa mah vai loot hnüh kti. Ah nih üng ah sa naaka sa kpa ta Pangsiima kkhyü taama kba hmi lok kti ni.
24 Ahin bange hin mshuui msäp naake ni. Asuna nghnu mi xooi sun Pangsiim jah kkhyaanga poh be khüt xooi üng mtäng naak ni. Hakah ngming nak kti mpya sun Shih Naai msuunga ka ni. Hakah üng hmi lok kti ta mpya ni.
25 Asuna Shih Naai msuung sun Arap pea vek kti. (Pangsiim noh Shih Naai msuunga Moshei üng Jüdah mjüea phäh thuume ah jah peet.) Hakah nghnu mi mpya sun Shih Naai msuung üng mtäng naak ni. Aksanga ta Jeirüh Shalem mlüh phi mtäng naaka kyak kti. I a thoon lüni ti ta Jeirüh Shalem üng kae sun Jüdah thuumea mshih mpya-a thoon ktie ni. Hakah phi ah sa nae mah mah mpya-a thoon kti ni.
26 Lüphi kkhaan khoa ka Jeirüh Shalem mlüh sun Jüdah thuum üng am shääng ei. Asuna Jeirüh Shalem mlüh sun aläta vek kti nghnu mi üng täng lü nih bängea nu mshinga mäi ni.
27 Sangsiim üng ng'yuk kti ta “Am sa mah kti nghnu mia ksingo, je kyaia. Sa mah kkhon mshoh ei am khaam ei yah ktio, xe xok nalü ng'äi ng'oma. I lüni ti ta ah khong pa noh ah hoih-in nghnu mi sun ah khong pa vek kti ah nih kkhyua kthaka phi ah sa na nung bok kti ni” tilü malam pyen vek kti.
28 Kah püieo, nih nih-e hin Pangsiima sa nae ni. Isak sun ah kkhyü taama kba hmi lok ktia mäi nih nih-e phi Pangsiima sa na-a nih hmi lok ktie ni.
29 Asän üng ahmüüna hmi kti Apyahama sa kpa noh ta kkhyü taam üng hmi lok kti Apyahama sa kpa sun ah mkhuh mhlih ni. Asun kba tuh vei säpa Mkhyangsiim üng nih hmi ktie naküt hin phi Jüdah thuum jah läk lam hlüshak ktiea mkhuh mhlih nih khaam ei yah ktie.
30 Sangsiim üng “Hina nghnu mi mpya jah ah sa kpa jah mshota. Kkhyaang lät üng ka nghnu mia sa kpa-a dä khoh shäänga am thoon yah” tilü Pangsiim noh Apyaham üng ah mtheh.
31 Kah püieo, asun kba ni. Nih nih-e phi nghnu mi mpya-a jah sa nae am ni. Nih nih-e ta kkhyaang lät üng ka nghnu mia jah sa na sing linge ni.