6
1 Kah be naeo, avai shüa nah nih püi noh mkhye poh loyot kkhai. Asun üng ta ah nih sun mkhye üng käh ah ve mhläi vaia Mkhyangsiima lam mshüüma kba nah vek kti noh mlung mhneem lü ku eia. Nah pät phi mkhyea hlo hleep naak üng käh nah vaan yot vaia mseei ei kom kti.
2 Nah püia sääi siing pyaang ma üng ngpüi lü ku eia. Asun kba nah thoon ta Booi Jeishüh Khritoa thuum sun ahlü naak käh vek ktia nah ksang nak kti ni.
3 I am nixa ktia ah pät noh ah pät ashü kyüa hana ngngaai ei kti noh ah pät sun mhleei ei kti ni.
4 Kkhyaang naküt noh ah ve soh poh mshah hju msih be she. Ah ve soh poh mshah sun ado ta ah pät noh ah pät mküüi ei khoh kti. Püi po üng ngtu mtäng vai am hlü laang.
5 I lüni ti ta kkhyaang naküt üng Pangsiim noh mta ah peet vek kti ni.
6 Pangsiima kkhyü ngthei kti noh mthei kti sun üng ah külak naküt üng ka üng shäng dou be she.
7 Nah nih pät noh nah nih pät käh mhleei ei ua. Pangsiim u noh phi mhleei lü am ng'yah. Kkhyaang naküt noh msi ah shoa kba kuunga aktheih sun yah ei be kkhai ni.
8 Kkhyaang mat hin noh ah mlung lo ngnei shaka kba mkhye msi ah sho ta aktheih paai sim pyak naak sun yah ei kkhai ni. Lüphi Mkhyangsiima kba msi ah sho ta aktheih paai Mkhyangsiima peet angshääia xün naak sun yah ei be kkhai ni.
9 Asuna thoon lü “Khäk ma hnüh kkhai ni” käh tilü mhläi lü akdo sun nih poh vai u. Akdo poh sun am nih hoih-in ta aksüün lo üng aktheih paai sun nih yah ei be kkhai ni.
10 Asuna thoon lü amkot ave tä lü kkhyaang naküt nih ku ei vai u. Jum ei kti be naea kkhaana aktung boka akdo nih poh vai u.
11 Bük ua, kah pät noh kah kut üng nah nih veeia sa nglung kdäm kdäm nua kah yuk lo ni.
12 Vun moih nah nih khaam ei vaia ning jah hlo phok ktie sän mlung lo ngnei shaka kba ve soh poh mshah lü kkhyaangea mküüi ei tong vai hlü ei ktie ni. I lüni ti ta Khritoa baan lam ktunga mong sun kpyaü hüa phäh-a mkhuh mhlih am ah nih khaam ei hlüa phäh ni.
13 “Vun moih khaam ei vai hlü kti” tilü jah msuuk mtheh ktie hngoh noh phi Jüdah thuum akhäk bang ta lüüm kkaan ei ktie ni. Lüphi ah nih nih-e sun nah nih jah ksang nak ktie atia kkhyaange noh ah nih jah mküüi ei vai ua phäh vun moih ah ning jah khaam ei hlü shak u ni.
14 Kei noh ta kah pät ah nih nah mküüi ei vai am hlü ei laang ngü. Booi Jeishüh-a baan lam ktung ni kah jah mküüi ei hlü shak. Asuna baan lam ktung üng hina kho mdek üng shääng ei kti akve naküt sun keia phäh akthie ni. Kah pät kuung phi hina kho mdek sho lama ta kah thik kti ni.
15 Mat mat hin vun moih ah khaam ei, am ah khaam ei sun aktung am ni. Booi Jeishüh üng kkhyaang kthaaia thoon va aktung boka kyak kti.
16 Ahina thuuma kba ve soh kti naküt üng Pangsiima diim deih naak jah mpyeen msheei naak veshe. Pangsiima kkhyaang ksang abäng üng phi veshe.
17 Tuh-a kkhyüh ta u noh phi käh nah mkhui mkha ti ubä. I lüni ti ta Booi Jeishüh-a phäh mkhuh mhlih kah khaam eia ngshing ngte naake kah puum sha luum üng vek ktie ni.
18 Kah be naeo, Booi Jeishüh Khritoa bä naak nang nih üng veshe. Amen.