ROMAN
CHANG GUI AM PAUL AH CAGUK
Paul's Letter to The Romans
Paul naw Roman kho ah hteit ne Khrithabum k'süm vai ah pawng püi netah, shin ah ca cu ng'daut ne a guk ah kyak ci. Ani naw cun ah kho ah khrithabum ung a shäng bi bi netah, ngahmi ah m'hteihtang nak awn, Spain kho ah hteit ne bik khai ah ngai ci. Shin ah ca ung ani naw amät ah hmuhmat ah khritha zum nak la a cun ah zum nak awn khritha gui ah ghin nak ung om ih vai gui cu, m'dang ne guk ci. Paul ah guk ah ca gui avan ung shin ah ca cu kümbe pi ciah kyak ci.
Paul naw Roman kho ah om ciah Khrithbum gui am, a zavaih nak gui la ak taigü peit gui ah manwg cu gu maa netah, a pyein hlü ah a mawng ak tung cu tün ne phleh ne guk ci. Cun cu, "Khangpughi naw chang gui ami zum nak awn ang düng sak gui ah mawng, Thu Ni am'dang nak ah kyak ci. (1.17).
Cun kawn ah Paul naw a mawng tung cu m'däm pi ne guk ci. Jew chang gui la chang khui hei gui ung tün ne, hnicim chang ah hta avan cu, kat nak ah hlüngtai nak kaa ah om zawp ci gui ah kya sei, Khanpughi ung ng'düng vai cu hlü ci. Chang gui cu ami zum nak awn Bawi Jesuh Khrit ung Khanpughi naw ng'düng sak gui ci. Cun kawn ah Khanpughi ung düng nak awn Bawi Jesuh Khrit ung ghin nak thai awn kawng ät ah mawng cu guk ci. Zum ci cu Khanpughi ung dimdeeih nak om sei, Khanpughi ah Mumcha Theing naw kat nak, sih nak ah khui ung kaa phiawn sak ci. Ak däm 5-8 ung Paul naw, Khanpughi ah thukhän ah mawng la zum ciah ghin nak ung Khanpughi ah Mumcha ah hlüngtai nak ah mawng cu m'dang ne guk ci. Khanpughi naw hnicim chang ah hmawk ah am hnüt nak ah mawng ung Jew chang gui la khui hei chang gui ah om ih ah mawng cu gu ba ci. Jew chang gui naw Bawipa Jesuh ami hnu ng'tuk püi nak cu, chang ah hta avan naw Bawipa Jesuh ung Khanpughi ah m'gein sei nak cu ami gah vai ah hmawk la Jew chang gui naw Bawipa Jesuh cu ang täi sei kä hnu ng'tuk püi hlawt khai gui ah a zum ah mawng cu ak küm nak ah guk ci. Ak hnu täng ah khritha gui ah om ih vai ah mawng la chang awn ng'hmuh teng nak ung ng'khawtsheng vai ah mawnglam cu m'tung ne guk ci. Cun ah a guk nak ung Khanpughi ah khuut bi ah mawng, bawi ng'vai ah maa ah la mät gui tumat la tumat ah ng'lak ung Khritha gui ah bilawh om ih gui vai ah mawng, la chang naw m'lung kyong ung ngaih tüh khit nak ah mawng gui cu guk ci. Cun kawn ah a zavaih nak la Khanpughi am hlüngtai nak awn phleh ne guk ci.
1
1 Khanpughi naw Thu Ni shäu khai ah ghü ne am'düih, Jesuh Khrit ah chang shäm, kei Paul naw ca ka gu lawk ci.
2 Cau pui ge ung Khanpughi naw, Thu Ni cu a purofet gui ung pek khai ah a shaitaak cu Cacim Theing ung om ci.
3 Cun cu Khanpughi ah Htapa, mi Bawipa Jesuh Khrit ah mawng ah kya ci; Ani cu ak hnicim chang nak ah David ah ng'shon ung ng'tüi lawk ci;
4 Ak khan chang theing nak ah, Khanpughi ah Htapa ah a kiak cu ang dang vai ah Khanpughi naw abämang hlüngtai nak awn sih nak ung kaa thawh ba sak ci.
5 Khanpughi naw ani ung ang düihpüi ah kyak nak vai ah akhin k'ni cu na pe ne, kho avan ung, chang avan naw Khanpughi cu zum ne ami läk vai ah kei cu m'düih ne na tüi ci.
6 Rom gawnu ung nami om ciah nang mi cun phi Jesuh Khrit ah chang gui ah Khanpughi naw a ning khü gui pyi ah ka sei, cun ah chang gui ah k'um ah nami kia pyi ci.
7 Cun ah kia sei Khanpughi naw ning m'hni gui ne aning khü gui pyi ah Rom Khrithabum am shin ah ca cu ka ning guk law gui nei.
Mi Pa Khanpughi la Bawipa Jesuh Khrit naw m'geinsei nak la dimdeeih nak cu ning pe gui sä.
Zeikiai m'Hlüngtai ne Taigü Nak
8 Khomdek khan avan ung nang mi ah zum nak ng'za pyi ci gui ah kia sei, ak htük bäih ah Zesuh Khrit ah ming ung Khanpughi cu kam hlüngtai ci.
9 Ahtapa ah mawng Thu Ni shäu ne pyein ne, kam lung kyong avan ap ne, Khanpughi ah khuut cu ka bik ci.
10 Kei naw ka taigü khin päng ung ka ning shüm gui cu Khanpughi naw hmat ci. Khanpughi naw ang zak hlü a om ung kä shou pha sei nang mi ah om nak ah ka gawk law vai ah ka taigü ci nei.
11 Nami k'thamah nak vai ah mumcha hrilham cu ning pai tu gui hlü ne, ang htei ah ka ning hmu gui hlü khäät ci.
12 Cun ah ka pyein cu nangmi la kei, atäng ah mi ng'hmuh law ung, kei naw ka zum nak awn, nang mi naw nami zum nak awn, mi ng'hteihtang tu vai hmawk ah kyak ci.
13 Nami shüm ba vai nei, phäinau gui aw, nangmi ah om nak ah ka lawk khai ah akda vei ka pawng ci nei, cun ung phi apipi cüngvawn nak om ci, chang pakhui hei gui ah lung ah ka bi nak ung ami ng'hlah law nak a om ah mäih ah nang mi ung phi a om vai ah ka ng'za hlük ci nei.
14 Ng'awigi ci la ghaatghum ci, hmuhmat ci la kä hmuhmat ci, chang avan ah hmawk ah kei naw ka mawng nak ci kia sei;
15 Rom gawnu ung nami om ciah nangmi am phi Thu Ni cu shäu ne ka ning m'thein gui hlü aih ci nei.
Thu Ni ah Hlüngtai Nak
16 Kei cu Thu Ni ung kam lung üp ngaih gep ci; cun ah Thu Ni cu zum ci gui ah, Jew chang gui la chang pakhui hei gui cu, a hun nak ah Khanpughi ah hlüngtai nak ah kia ci.
17 Khanpughi naw chang gui, a i chaa ang düng sak gui ah mawng cu, Thu Ni naw m'dang ci: cun cu tün nak ung kaa naw khüt nak ung phleh khai ah zum nak bäng awn ah kia ci. Cun na kia sei, cacim ung, “Zum nak awn Khanpughi ung düng ciah chang cu ghing ne om khai,” ci ah om ci.
Hnicim Chang ah Cheishoh Nak
18 Düng nak cu chang gui naw kä ami hmat vai ah cheishoh, shetkat nak gui ah khan ah, khankhaw ah khanpughi ah m'lung k'she nak a gawk ah mawng cu dang law pyi ci nei.
19 Khanpughi ah mawng hmat vai gui phung cu, Khanpughi amät naw ahmat sak gui nak awn Khanpughi naw ngahmi cu m'kat gui ci.
20 Khanpughi naw shin ah khomdek khan a tüi pian ung tün ne ani ah ng'täi ciah kä hmuh hningah hlüngtai nak la Khanpughi ah a kiak nak ah ang zung cu chang gui naw ang dang ah hmuk hmat ci gui. Cun ah ami hmuhmat cu Khanpughi ah tüi pian gui ami hmuhmat nak awn ah kia ci. Cun ah kia sei chang gui cu ami kat nak ah hmawk ah kä küi hlawt ci gui.
21 Ngahmi cu Khanpughi hmat ci gui, cun ung phi Khanpughi ah bäkhäk nak m'hlüngtai khin ah kä m'hlüngtai ci gui. Ami m'hlüngtai nak vai sü ung a kholä ah kiak khai gui düt ngaih tüh ci gui, ngahmi ah ghawng ciah m'lung kyong cu hmüp nak naw küp zawp ci.
22 Ngahmi naw ami mät cu hmuhmat ci gui ah ami pyein ung phi, akcang ah a i kä hmuhmat ci gui ah kiak ci:
23 Kä si hning ciah Khanpughi khawihmah nak vai sü ung, si hning ciah chang, ni, k'phyu kha, khisa ni, k'phyu m'khaw ni gui ah müi gup gui düt piang ne khawihnah ci gui.
24 Cun ah a mawng ung Khanpughi naw cun ah chang gui cu, ami m'lung kyong ah ng'zak hlü ah ami kyak nak vai la, tumat la tumat thui hmai nak ami bi nak vai ah nawng gui ci.
25 Ngahmi naw Khanpughi ah ng'düng nak cu ak she awn m'thawng ci gui,ngahmi naw tüi sho ciah Khanpughi cu nawng en u ne, a tüi sho gui düt cu khawihnah ci gui. Cun ah Bawimang cu ang täi sei hlüngtai sä! Amen.
26 Cun ah kya sei Khanpughi naw chang gui cu shekat pi ciah thuihmai nak ung ami hteh vai ah nawng gui ci. Hnumi gui cu pami la hnumi aè ng'zaw ng'koh man ah kä kya u ne, ami mät ng'zaw ng'koh ci gui.
27 Pami gui cun phi hnumi awn ng'zaw ng'koh man ah kä kya u ne, ami htuktui naw ui gui sei, ami mät ng'zaw koh ci gui. Pami gui cu tumat la tumat thuihmai nak vai bi ne ami shekat ah hmawk ah hma m'kat nak cu gah ci gui.
28 Cun ah chang gui cu Khanpughi kä shüm hmat u khätah, Khanpughi naw shekat nak ung nawng gui sei, kä a khin kä ak khaa ah kya lawk ci gui.
29 Ngahmi cu shekat nak ahlühlü bi u ne, ngetngawng nak, shemshai nak, ng'zak hlü aih nak, om k'she nak, m'thüikhang nak, chang ngawn nak, ng'tuk nak, hleeihlak nak, ng'u hngeit nak, gui cu m'chei m'shoh ci gui. Ngahmi cu khleei u ne;
30 chang ah mawng cu ak she ah pyein sak ci gui. Ami mät ng'shedam na tu u ne, chang ah ng'shei ne, khähgah ci gui. Shekha law pi k'täi khai ah ngaih tüh u ne, ami nupa ah thu phi kä ngai ci gui.
31 A mi om she zawp sei, ami shaitaak ah phi kä om ci gui, ami paw chang phi kä chimgein ci gui.
32 Cun ah om ciah chang gui cu sih nak ung hteit khai gui ciah Khanpughi ah thukhän cu ngahmi naw hmat ci gui. Cun ung phi, ami mät naw shin ah shekhaa gui ami bi bäng ah kä kyak ciah, a cun ah mäih bik ci gui cun phi k'cang nak ci gui.