2
Khanpughi ah M'Khoi m'Chaa Nak
1 Cun ah kya sei teihpüi aw, nang naw chang ah kat nak nam khoichaa ung phi, na mät ah kat nak kä nam zih hlawt khai. Nang
cu kat nak bik ciah chang ah kya lang ne, na paw chang cu nam
khoichaa tu ah a kyak ung na mät naw na mät nam kat ciah kyak
ci.
2 Cun ah mäih ah bik ciah chang Khanpughi naw am kat cu, ng'düng ciah mi hmat ci nei.
3 Cun ung phi teihpüi aw, paw chang m'khoichaa nak ah kat nak cu nang na mät naw nam cheishoh pyi ci nei. Nang cu Khanpughi ah
m'khoichaa nak na phiawn nak khai ah na ngai ci maa!
4 Kä cun ung Khanpughi ah chimgein nak, m'lung sau nak la hnimgei nak gui cu a i ah kä na sui ci maa!Khanpughi naw nang cu nang zu ba
vai ah lam ning m'shüm ne, a ning m'gein ah mawng cu, nang naw
akcang ah na hmat ci nei.
5 Cun ung phi nang cu lingkeng ciah nam lung om ci, Cun ah kya sei, Khanpughi ah m'lung she nak la düng ciah m'khoichaa nak a gawk
law hnüüp ung, nang cu nuipai ciah shet m'kat nak na gah khai.
6 A cu hnüüp ung Khanpughi naw chang nüng nüng cu amät ah bi lawh a ci ah, m'khoichaa nak pek khai.
7 Ak ni ah om ne, bämang nak, m'kümtou nak la sih nak kä om ciah ghin nak shui ciah chang gui am, Khanpughi naw ang täi ghin nak
cu pek khai.
8 Amät ah bä nak vai bäng teng ne, ng'düng nak cu hnu na ne, shet nak lam ah läk ciah chang gui cu Khanpughi ah m'lung k'she
nak hmuk khai gui.
9 Shetkat nak bik ci gui ah Jew chang gui ung tün ne, khui hei chang gui van ah khan ah zaica nak la nat nak cu om khai.
10 Cun ung phi ni kiom nak bik ciah Jew chang gui ung tün ne, khui hei chang gui van ah khan ah Khanpughi naw bämang nak, m'kümto
nak la dimdeeih nak cu pe gui khai.
11 Khanpughi naw chang nünç nüng cu, kä m'khoi hnga ne, m'khoi m'cha gui khai.
12 Mose ah thukhän kä hmat ci gui ah chang khui hei gui cu, kat nak ami bi ung thukhän ah k'pung ah dimaih ci gui kyak ci.
Thukhän hmat ci gui ah Jew chang gui cu, kat nak ami bi ung
thukhän ah m'khoichaa nak cu gah ci gui.
13 Chang cu thukhän ng'zak nak düt awn Khanpughi ah ma ah ng'düng ciah kä kyak ci, thukhän ah pyein läk ciah chang cun vah,
Khanpughi ah ma ah ng'düng ciah kyak ci.
14 Chang pakhui hei gui cu ngahmi ung thukhän kä a om ung phi, thukhän awn ng'läk khai ah ami om ih ah a kyak ung, ngahmi cu
thukhän läk ci gui ah kyak ci.
15 Thukhän ah pyein gui cu ami m'lung kyong ung guk ah mäih ah ami om ih naw m'dang ci.Ami m'lung kyong ung phi cun cu ng'düng ci
ciah m'dang ci. Ami m'lung ngaih naw ak hngü ät m'kat gui ne,
ak hngü ät k'bää gui ci.
16 Cun ah kya sei, kei naw ka shäu ah Thu Ni ah pyein ah m'khoichaa nak ah kho hnüüp ung Khanpughi naw, Bawipa Jesuh Khrit awn chang
gui naw m'zih ne ami ngaih tüh gui phung cu, m'khoi m'cha ne
m'dang zawp khai nei.
Jew Chang Gui La Thukhän
17 Nang a i hawkcha ang? Nang cu na mät naw, kei cu Jew chang nei ci ne, thukhän ung khüng ne, Khanpughi awn na
khähgah ci.
18 Nang cu Khanpughi ah ng'zak hlü na hmat ciah kyak ci. Thukhän ah m'theithang nak awn, ng'düng ci la kä cun phi na ghü thei
ciah kyak ci:
19 Nang cu na mät naw na mät, amik m'dauh gui ah lam shüm, hmüp khui ah om ci gui ah ak dei:
20 Chang k'she gui ah lam piang, a i kä hmat ci gui ah ng'thei nak ah ka kyak ci ciah akcang ah na ngai ci. Thukhän cu hmuhmat nak
la ng'düng nak ah küm nak ah kyak ciah phi akcang ah na hmat
ci.
21 Nang naw chang m'theithang lang ne, a i ah kya sei na mät naw na mät kä nam theithang ang! Nang cu chang kä a m'guuk vai ah
m'theithang lang ne, a i ah kya sei na mät nam guuk ang!
22 Nang naw chang kä a plet beng vai ah m'theithang lang ne, a i ah kya sei na mät na plet beng ang! Nang cu a gup m'tüih lang
ne, a i ah kya sei a gup ah om nak ah taigü im cu na ng'guhtep tu
ang!
23 Nang cu Khanpughi ah Thukhän ung khähghah lang ne, a i ah kya sei cun ah thukhän cu m'chei m'shoh ne, Khanpughi ah thang nam
shet ang!
24 Cacim ung, “Jew chang gui ah om ah chang khui hei gui naw, Khanpughi ah ming cu päipih ci gui nei,” ci ne om ciah mäih ah
kya lawk ci nei.
25 Nang cu thukhän na läk ah a kyak ung, vun-ah nak na bi cu ak küikyang ah kyak ci, cun ung phi nang cu thukhän nam shet ciah
a kyak läi ung, vun-ah nak kä na bi tu ling te ung ni pi khai
sü ah kyak ci nei.
26 A vaisü ah vun-ah nak kä bi tuk ciah khui hei chang tumat cu, thukhän ah pyein gui avan a läk tu ah a kyak ung, Khanpughi naw
vun-ah nak bik ciah chang ah mäih ah dou khai ah kä kya ne ang!
27 Nang mi Jew chang gui cu, gu ne tai ah thukhän la vun-ah nak cu gah tu pang u ne phi, thukhän cu nami m'shet ci nei. Chang khui
hei gui cu pumsa awn vun-ah nak kä a mi bi ung phi, thukhän cu
läk ci gui nei.Cun ah kya sei nangmi Jew chang gui cu, chang
khui hei gui naw nami kat nak ning m'khoichaa gui khai gui nei.
28 Cun kawn ah Jew chang ah chang naw ang ngaih phung cu Jew chang ah kä kyak ci.Chang tumat cu vun-ah nak a bi nak düt awn Jew
chang ah kä kya lawk ci nei.
29 Jew chang akcang läi cu am lung kyong ah vun-ah nak bi pyi ciah chang ah kyak ci nei. Cun ah chang Jew chang ah kyak sak ci cu gu
ne tai ah thukhän ah kä kyak ci, Khanpughi ah Mumcha naw vah
chang cu am lung kyong ung Jew chang ah kyak sak ci. Ani cu chang ah
m'hlüngtai nak gah ciah kä kyak ci, Khanpughi ah m'hlüngtai
nak gah ciah kyak ci.