28
Malta Kho Kaung ah Ami Gawk ah Mawng
1 Keimi cu cun ah phiawng ne kaung ah kami gawk awn ah cun ah kho kaung cu Malta ming nak ciah kami hmat lawk ci.
2 A cun ung om ciah chang gui naw keimi cu ang htei ah nam gein gui ci gui. Kho aa ne kho m'zu law khä tah, mei cik ne nam awm gui u
ne, na khin nah gui ci gui.
3 Paul naw sing pawk ät cu la ne mei ung m'sui ci, Sing cu ui law khätah, sing pawk kyong ah kaa phyuu tumat lut law ne, Paul ah
kut ung htui ne ng'bah nak ci.
4 Cun ah htui ne ang bah nak cu, cun ung om ciah chang gui naw hmu u netah, “Shin ah chang cu chang ngawn ciah kiak khai, tuinu ung
kä si ne a phiawn ung phi, ng'düng nak naw ani kä ghin sak
ci” ci ne ami mät ng'htau ci gui.
5 Cun ung phi Paul naw phyuu cu k'thüng ne mei ung k'htawp ne, a i phi kä m'neh ne om ci.
6 Ngahmi naw Paul cu apumsa ng'phling law sei, kiu ne si lawk khai ah ngai ne teng ci gui. A cun ah ak shou ngäng ne teng
u sei phi, Paul cu a i ah phi kä kia law khätah, ngahmi cu ami
m'lung thawng sei, “Shin ah chang cu ng'zou nu kya ci nei” ci ne
kyak ci gui.
7 A cun na pei et ah ami ng'vaipi Publius ah akaa, lai gui om ci. Ani naw keimi gui cu na dou gui ne, hnüüp thum ung na khin nah
gui ci.
8 Publius ah a pa cu a pawi na sei gaw ne ng'zän ci. Paul cu ani ah im kyong ah lut ne taigü ci. Cun kawn ah ani ah khan ah a kut
taih ne gai ba sak ci.
9 Cun kawn ah cun ah tui koi kawng ung kaa gawpai ciah chang gui cu Paul ah lawk ci gui. Paul naw ngahmi cu gai sak gui ci.
10 Ngahmi naw keimi am khawh akda na m'cüm'hnah gui ci gui. Keimi kami hteh law ba vai ung phi kami sho ei vai cu htinpaw khan ah
na thak law gui ne nam sho gui ci gui.
Malta ah Kaa naw Romah
11 Chaa thum lüng khätah keimi cu, cun ah tuikoi ung düm te ciah htinpaw awn kami hteit law ba ci. Cun cu Alexandria ah kaa lawk
ciah, “Hnamnu ng'phi” ming nak ciah htinpaw ah kia ci.
12 Keimi cu Sirakua gawnu ah ng'düm u neh hnüüp thum kami om pah ci.
13 Cun ung kaa naw hteit ba u ne, Rhekium gawnu ah kami gawk ci. Cun ung kaa naw khokhi ni sei hteit ba u ne, hnüüp goi lüng
khätah Puteoli pigaw ah kami gawk ci.
14 Cun ah pigaw ah zum ciah chang gui awn ng'hmuh u ne, kho hnüüp chih kami om vai pyein ne na chou gui u sei, om tu u netah, Romah ah
k'täih ne kami hteit ci.
15 Romah om ciah zum ciah chang gui naw kami gawk cu ng'za u netah, Appius Market ah phi bäi, kami kai nak im tung thum ah
khüt law ne phi bäi, na dou law gui ci gui. Ngahmi cu Paul naw
hmu gui netah, Khanpughi m'hlüng m'tai ne k'tha mah law ba ci.
Rom gawnu ung Bi Abi Nak
16 Romah kami gawk awn ah Paul cu, amät bäng, gaakap tumat naw angäng tu hnga vai ah a khin gah ci.
17 Hnüüp thum lüng khä tah Paul naw cun ah gawnu ung om ciah Judah chang ng'vai gui khü gui ci. Ngahmi cu law ne ng'cut law u
khätah, Paul naw, “Israel chang phäi nau gui aw, kei naw mi
mät ah pakhui ah khan ah phi bäi, mi pupa gui ah thung man gui
ah khan ah phi bäi, m'shetkat ne a i phi ka bi lawh kä
om lang sei, kei cu Jerusalem ah Jew chang gui naw na pha u
netah, Rom chang gui ah kut ung na ap ci gui nei.
18 Ngahmi naw kei cu na cet u ne, kei ah bi nak ung sih nak khin vai ah mawng a i kä hmu u netah na phiawn hlük ci gui.
19 Cun ung phi Judah chang gui naw ke khenggeng u sei, kä ng'näng law netah ghanpughang ah ka ng'paa ah kiak ci. Cun cu mi mät pakhui
chang gui ka hnu ng'tuk püi hlü su ah kä kyak ci.
20 Cun ah kia sei nangmi awn ng'hmuh vai ah ka k'tha nak ah kia ci. Kei shin ah m'si gui, gui awn ami na khih cu, Israel chang gui
naw, mi ngäng ah Bawipa ah hmawk ah kiak ci” ci ne pyein ci.
21 Ngahmi naw, “Keimi naw nang ah mawng, ca tumat phi Judea kho ah kaa kä ka mi gah man ci. Mik mi Judah chang, tumat naw phi law
ne, nang ah mawng kä ak ni ah kä pyein man ci.
22 Cun ung phi chang akda naw, a hawi hawi baw, nang ah pati ah mawng cu hnu ng'tuk püi ne ng'thu ci gui nei. Cun ah kia sei
nang ah pati ah mawng cu keimi naw phi kami ng'za tu hlük ci
nei.” cik ci gui.
23 Cun ah kia sei ngahmi cu Paul awn hnüüp ng'nüt u netah, ami ng'nüt nak ah hnüüp ung chang akda Paul ah om nak ah gawk law
ci gui. Paul naw kho ngawi ah tün ne, mü hun nah khüt khai ah
khanpughi ah uk nak ah mawng Thu Ni cu m'thein gui ci. Bawipa Jesuh
ah a mawng cun phi, Mose ah thukhän la prophet gui ah cacim gui
awn küm khai ah, ngahmi naw ami zum tu vai ah k'tha nah ne
m'thein tu gui ci.
24 Chang am shah gui naw Paul ah thu pyein cu bä ci ci ne zum tu u sei phi, am shah gui naw kä zum tuk ci gui.
25 Paul naw shin ah a mawng tumat cu pyein khä tah, ami mät gui ng'cuh ng'can u ne, ng'düi law ne hteit ba ci gui. Paul naw,
“Mumcha Theing naw, prophet Isaiah ung, nami pupa gui am, am dang
cu ni bä bä ci nei!
26 Cun ah am dang cu;
“Nang cu Judah chang gui ah ma ah hteit netah,
‘Nangmi naw ngai ne, ngai ne, phi kä
nami hmat khai;
Teng ne, teng ne phi kä
nami hmuk khai” ci ne kiak nak gui vai.
27 A i ah kia sei ci ung, shin ah chang gui ah m'lung cu aang ci,
ami k'hnga cu pang ci,
ami mik cu m'shing ci.
Cun ah kä kia ne, akcang ah;
ami mik cu m'dei ne,
ami hnga cu ng'lang ne,
ami m'lung cun naw hmuhmat ne,
a kiak vai sü ung, kei ah ng'hlat law zawp u sei,
Kei naw phi ngahmi cu ka gai sak gui khai,’
ci ne khanpughi naw pyein ci”
ci ne m'thein gui ci.
28 Paul naw a khüüp nak ah, “Cun ah kia sei hun phiawn nak ah mawng Khanpughi ah Thu Ni, chang pakhui hei gui ah ma ah pyein
khai ah chang cu tüih pyi ah kia sei, ngahmi naw ngai zak khai
gui’ ci cu nami hmat vai nei” ci ne m'thein gui ci.
29 (Cun ah Paul naw ng'thu a pyein kawn ah Judah chang gui cu ami mät naw ng'cuh ng'can u ne hteit ba ci gui.)
30 Paul cu cun ah gawnu ah ang vah ah im ung khokum goi ung om ci, ani ah om law tuk ciah chang gui cu ana dou gui ne, ak ni ah khin
chah na gui ci.
31 Ani naw Khanppughi ah uknak kho amawng thu phi pyein ne, Bawipa Jesuh Khrit ah mawng phi abü ang ngaih ah thamah nak awn
m'theithang gui ci.