11
Tuihnim Johan ah Ng'shä Chang Gui
(Luka 7:18-35)
1 Bawipa Jesuh naw cun ah ang düihpüi gha-lei-goi cu m'cäi gui netah, acun ah kho pei zung pigaw gui ah ng'thu pyein ne
m'theithang gui khai ah hteit ci.
2 Bawipa Jesuh ah bilawh gui cu Tuinim Johan naw thawng kyong ah a om nak ah ng'za netah, ang khahpüi gui am shah cu tüi law ne,
3 “Nang cu Johan naw lawk khai, a ci ah Bawipa ang?, kä cun ung a hei Bawipa kami ngäng ba khai ang? ciah ng'shi vä, ci ne,
ng'shi sak gui ci.
4 Bawipa Jesuh naw, “Hteit ba ne nami hmuh nami ng'zak cu Johan-am m'thein ba vä.
5 Amik m'dauh gui, m'dei ba ci gui, shumkhem ci gui hteithon ba ci gui, kheilei ah ei gui theek ba ci gui, akpang ak ang gui ng'lang
ba ci gui. Aksi gui ghing ba ci gui. Chang pyaam gui naw ng'thu
k'ni ng'za pyii ci gui.
Ref 11:5 a Isa 35:5-6; b Isa 61:1
6 Kei ah khan ah ngaih gep ciah chang gui cu zeikiai nak om ci nei” ci ne m'cäi gui ci.
7 Johan ah a tüih law gui ami hteh ba kawn ah Bawipa Jesuh naw Johan ah mawng cu chang gui-am m'thein gui ci.
“Nangmi cu a i vai
Johan ah om nak k'pya lün nu ah nami hteh ang? Kho khi sei hnün
ciah khu m'sai gui nami teng khai ang?
8 Kä cun ung a i vai nami hteit ci ang? Ak kyom suisak ci gui nami teng khai ang? Ak kyom suisak ci gui cu mang im kyong ah nei ami
om.
9 Kä cun ung profet nami teng khai ang nami hteh? Akcang ah nangmi naw profet ah hlüngtai pi ci cu nami hmu pyii ci nei.
10 Johan ah mawng cu cacim ung; ‘Khanpughi naw, nang ah hteh nak vai
ah lam cu pyang khai ah, kei naw ka ng'shä ka tüi law ma
khai,” cik ci ciah om ci. Johan cu a cun ah kiak ci.
Ref 10:10 Mal 3:1
11 Kei naw akcang ka pyein cu, khomdek khan ung Johan ah hlüngtai pi ci, a u kä om ci. Cun ung phi khankho ung akhmaw pibäih cu,
Johan ah mä hlüngtai pi ci nei.
12 Tuihnim Johan naw ng'thu a pyein law ung tün ne, tuhngawi ung khüt sei khankho cu, changshe gui naw ng'tuk ng'ah püi ci gui.
Cun ah kho cu changshe gui naw khäm zawp vai ah k'tha nak ci
gui.
13 Johan ah ng'dang law nak ung khüt lawk khai ah profet gui la Moses ah ng'thukhän naw khankho ah mawng cu pyein pyii ci gui.
Ref 11:12-13 Luk 16:16
14 Ngahmi ah ng'thu pyein cu nami zum ah a kiak ung, Johan cu dang lawk khai ciah Elijah ah kiak ci, ci cun phi nami zum khai.
Ref 11:14 Mal 4:5; Mat 17:10-13; Mak 9:11-13
15 Cun gui cu ak hnga om ci phung naw ngai ne ng'za u sä.
16 ‘Tuhngawi chang gui cu a i awn m'tumtäng gui vai ang? Ngahmi cu sumlei hmun ung ngok ciah akhmaw hta awn täng ci gui. Ak
hmawhta gui am shah naw, ahei am shah-am,
17 Keimi tumkhawng u ngä sei phi, nangmi kä nami ng'lam ci, keimi ng'äi kyap u ngä sei phi nangmi kä nami kyap ci’ ci ne
ng'hawh tuk ci gui.
18 Tuihnim Johan cu ei phi hlawi ne, zu phi kä aw ne, nangmi ah om nak ah gawk law sei, nangmi naw “Shin ah chang cu khoshe ah kai
nei,” nami cik ci.
19 Chang ah Htapa cu ei ne, aw ne law sei phi, nangmi naw, ‘Teng tu vä, shin ah chang cu, ei aih aw aih ci nei. Akhawn look ci gui
la chang she gui ah teihpüi ah kiak ci nei,’ ci ne nami pyein
ci.
Khanpughi ah hmuhmat nak akcang ah a kiak cu, a cun ah
hmuhmat nak ung kaa gawk lawk ciah, amawng gui naw ng'dang sak ci
gui nei”. ci ne pyein ah gui ci.
Kä Zum Tuk Ciah Gawnu Gui
(Luka 10:13-15)
20 Bawipa Jesuh naw cäi aih gui vai am dang nak pyii ah pigaw gui cu, kat nak ung kaa ng'zu ba nak kä om khätah, shin ah züi ne
m'cäi gui ci.
21 “Aw Khorazin gawnu, nang cu thüisei nak om ci. Aw Bethsaidah gawnu, nang phi thüisei nak om ci. Nangmi ung kamdang ah cäi
aih gui vai cu, Taia la Sidon ung kamdang vai sü ung, ngahmi cu
cau pui, kat nak ung kaa ng'zu nak ah sui sui ne, m'vut awn
ng'hluk ne ami kat nak ung kaa ng'zu ba khai sü gui te.
Ref 11:21 Isa 23:1-18; Ezk 26:1-28; Jol 3:4-8; Amo 1:9-10; Zec 9:2-4
22 Cun ung phi Khanpughi naw am khoichaa law nak ah hnüüp ung, nangmi cu, Taia la Sidon ah mä däm pi ciah, hma m'kat nak cu
nami gah khai.
23 Aw Kapernaum gawnu, nang cu khankho ah khüt khai ah, m'hlüngtai nak na gah khai ah na ngai ci ma? Nang cu m'hteikho ah khüt sei
zuk buh nak na gah khai nei. Nang ung kamdang ah cäi aih gui vai
cä, Sodom gawnu ung kamdang vai sü ung, cun ah gawnu cu tuhgüt
om khai süte.Ref 11:23 a Isa 14:13-15; b Gen 19:24-28
24 M'khoichaa nak ah kho hnüüp ung nang cu,Sodom ah mä däm pi ciah hma m'kat nak cu na gah khai nei,” ci ne pyein ci.
Ref 11:24 Mat 10:15; Luk 10:12
Kei ah Law Vä Ka ning Hüizang Sak Gui Khai
(Luka 10:21-22)
25 Cun kawn ah Bawipa Jesuh naw, “Khankho la khomdek van uk ciah kapa, hmuhmat nak om ci gui-am kä nam dang gui cu, hmuhmat nak
kä om ci gui-am m'dang gui ci sei ka ning m'hlüngtai ci.
26 Kapa Khanpughi, cun gui cu nang na mät ah ng'zak hlü ah kiak ci,” ci ne pyein ci.
27 Bawipa Jesuh naw, “Kapa naw apäng avan na pe pyii ci, Kapa ah kawn ah ahta hmat ci, a u kä om ci. Ahta la ahta naw am dang gui
ah chang ah kawn ah apa hmat ci a u kä om ci.
Ref 11:27 a Jhn 3:35 b Jh 1:18; 10:15
28 ‘A phuih gih sei cümbawng ciah chang gui kei ah law vä, kei naw ka ning hüizang sak gui khai. Kei cu hnip hnoi ng'awi ng'gi ne,
kamlung neim ci.
29 Kei ah ka kawh cu kawt ne, kei ah ng'thei law vä, Nangmi cu hüizang nak nami hmuk khai.
30 Kei ah ning kawh sak gui ah kawh nak cu zäi ne, kei ah ning phuih sak gui ah phuih cu zang ci,” ci ne m'cäi gui ci.