10
Ang Düihpüi Gha-lei-goi
(Makuh 3:13-19; Luka 6:12-16)
1 Bawipa Jesuh naw ang düihpüi chang sing gha-lei-goi cu khü gui netah, khoshe gui ami k'täm nak hning vai la gaw nak phung ami
gai sak nak hning vai ah, huham cu pe gui ci.
2 Ang düihpüi gha-lei-goi ah ami ming gui cu; (Peter ami ciah) Simon la anau Andru; Zebedee ah hta goi James la Johan;
3 Philip la Bartolome; Thomas la Matthe akhawn look; Alphaeus ah hta James la Thadaeus;
4 M'lungling ciah Simon; la Bawipa Jesuh gaa-am ap ciah Judas Iskariot gui ah kiak ci.
Chang Gha-lei-goi ah Bi Bi Nak
(Makuh 6:7-13; Luka 9:1-6)
5 Ang düihpüi chang gha-lei-goi cu Bawipa Jesuh naw shikchaa m'cäi ne tüi gui ci; “Chang pakhui hei gui ah kho gui ung la
Samaritan gui ah pigaw gui ung kä nami hteh vai.
6 Maih ciah hto gui ah kiak ciah Israel chang gui ah om nak ah hteit ne,
7 ‘Khankho uk nak ng'et lawk ci nei,” ci ne ng'thu pyein vä!
8 Akgaw gai sak vä, aksi m'ghin ba vä, kheei lei ah ei gui theek sak vä, khoshe gui k'täm vä, Khanpughi ah m'gein nak kä
khleih ah nami gah ci kia sei, chang gui am aphu kä lak ah vah
pe vä.
9 Ghui la ngui ni, khawh cham ni gui m'khäp ne kä nami k'bah vai.
10 Ng'zoih nak ah ng'ip, k'htu ang zung akda, phahnak la ng'shopawng gui phi kä nami hteh püi vai. A i ah kia sei ci ung bi bik ciah
chang ah ang zak hlü cu peit taak vai ah kiak ci.
Ref 10:10 1Co 9:14; 1Ti 5:18
11 A i pigaw ung nami gawk law ung phi, ning dou gui khai ah chang nami shui vai. Cun ah pigaw ung kaa kä nami hteh ba pha ah chuih
nami kai nak ah im ung nami om tu vai.
12 Im kyong ah nami gawk ung zeikiai nak om sä’ ci ne nami zavaih vai.
13 Im mah gui naw zei ne ami ning dou gui ung, nangmi ah zeikiai zavaih nak cu ngahmi ung gawk khai, kä ami ning dou gui ah a
kiak ung nami zeikiai zavaih nak cu, nami mät ung law ba khai.
14 Kä ning dou gui ne nami ng'thu kä ngai ciah im, pigaw a om ah a kiak ung, a cun ung kaa lut law ba ne, nami kho ung m'vut phi
nami khawn shüt vai.
Ref 10:14 Act 13:51
15 Kei naw akcang ka pyein cu, m'khoichaa nak ah hnüüp ung cun ah pigaw gui cu, Sodom la Komorrah ahtah nui pi ciah m'shet nak cu
hmuk khai nei.
Ref 10:15 Mat 11:24; Gen 19:24-28
Bui-aut Vai ah Dukdeiu Nak Gui
(Makuh 13:9-13; Luka 21:12-17)
16 ‘Ngai vä! Hngei khli ah ng'lung ah htome hta chah ah mäih ah, kei naw ka ning tüi gui ci nei. Cun ah kia sei, k'phyu ah mäih
ah theileh u ne, am äm kä om ciah müm kha ah mäh ah nami
m'lung gei sä.Ref 10:16 Luk 10:3
17 Geing nah ne nami om vai, chang gui naw ning pha gui ne zung ah m'kawt ung ning hteh püi gui khai gui.
18 Mang ah im ung ning tuthat gui khai gui. Nangmi cu kei ah hmawk ah uk-chuk ci gui la ghangpughang gui ah ma ah ning hteh püi gui
khai gui. Cun ah kia sei ngahmi gui la a pakhui hei gui-am ng'thu
k'ni cu nami m'thein gui khai.
19 Cun gui ah kut ung ami ning ap gui ung, a i pyein ne ng'thu vai, a i ah ng'thu vai cu kä nami ng'ä vai;
20 A khin a gawk law ung nami ng'thu vai gui cu gawk lawk khai. Cun ah ng'thu gui cu nangmi ah thu ah kä kiak ci, nami Pa Khanpughi
naw mumcha awn nangmi ung ang thu ah kiak ci.
Ref 10:17-20 Mak 13:9-11; Luk 12:11-12; 21:12-15
21 ‘Chang phäi nau gui tumat la tumat sih nak ung ng'ap tuk khai gui, nupa gui naw ami hta gui sih nak ung ap khai gui, ami hta gui naw phi,
ami nupa ah m'cäi kä ngai ne ngawn phak khai gui.
Ref 10:21 Mak 13:12; Luk 21:16
22 Kei ah hmawk ah chang naw ning gen gui khai, cun ung phi ak hnubäih ah khüt sei, düng ciah chang cu, hun phiawn nak gah
khai.
Ref 10:22 Mat 24:9,13; Mak 13:13; Luk 21:17
23 Pigaw tumat ung ami ning shedam nak gui ung, a hei pigaw ah nami dawng vai. Kei naw ak cang ka pyein cu, Israel kho pigaw päng
ung bilawh vai kä nami bi zawp pha ung, chang ah Htapa cu kyum
lawk khai nei.
24 ‘Ng'thei tuk ci cu, m'thei tuk ciah kä hlüngtai pi ci, Ref 10:24 a Luk 6:40; b Jhn 13:16, 15:20
25 Changshäm cun phi a bawi ah kä hlüngtai pi ci. Cun ah kia sei ng'thei tuk ci naw m'thei tuk ci k'pha ne, changshäm cu a bawi
ah mäih ah a kiak tu ung zeikiai vai kiak ci. Im kyong ung ang
vai pi cu, Beelzebul ah mi khü ung, im kyong ung om ciah chang
hmün gui läi cu, akshe pi ah khü gui vai kiak khai.
Ref 10:25 Mat 9:34; 12:24; Mak 3:22; Luk 11:15
Kyih Vai Cu A U Ang ?
(Luka 12:2-7)
26 ‘Cun ah kia sei chang kä nami kyih vai, küp gui phung avan ng'hmawng zawp khai, m'zih gui phung avan ng'hmat zawp khai.
Ref 10:26 Mak 4:22; Luk 8:17
27 Hmüp khui ung ka ning m'thein gui ah ng'thu cu khodei ung nami pyein ba vai. Adüm ah nami ng'zak ah ng'thu cu m'kiung khan ah
kai ne nami shäü vai.
28 Pumsa a ngawn hlawt ung phi Mumcha kä ngawn hlawt ci cu kä nami kyih vai; pumsa la mumcha avan m'htei kho ah m'di hning ciah
Khanpughi bäng nami kyih vai.
29 Biithta hnih cu ngui phe awn khleih hning vai ah kiak ci, cun ung phi biithta tumat phi Pa Khanpughi ah kä hmat ah kä chük maih
düt khai.
30 Khanpughi naw nami lu ung lumu avan cu khei ne khän ci.
31 Cun ah kia sei kä nami kyih vai, nangmi cu biithta akda ah mä nami küikyang pi ci.
Bawi Khrit ah Ng'kiaa ci la Hnu ng'Tuk Püi Ci Gui
(Luka 12:8-9)
32 ‘Chang gui ah ma ah kei cu ana Bawipa ah pyein ne, m'dang ne ng'kiaa ciah chang cu, kei naw khankho ka Pa ah ma ah, kakchang
nei ci ne m'dang ne ka pyein khai.
33 Cun ung phi chang gui ah ma ah kei na hnu ng'tuk püi ciah chang cu, khankho ka Pa ah ma ah kei naw ka hnu ng'tuk püi khai.
Ref 10:33 2Ti 2:12
Kä Dimdeeih nak Vai, Ng'tai Nak Vai.
(Luka 12:51-53; 14:26-27)
34 ‘Khomdek khan ah dimdeeih nak ka pek khai ah, ka lawk ciah kä nami ngaih-en vai.Dimdeeih nak ka pek khai ah ka lawk ciah kä
kiak ci, ng'tai nak vai ah ka lawk ciah kiak ci.
35 Pa la hta, nu la hta, kawinu la a hta gui, ami ng'tai nak vaiah kei ka lawk ci.
36 Chang tumat ung ak nget pi bäih ah agaa cu, amät ah kyong ung kaa ah kiak khai nei.
Ref 10:35-36 Mic 7:6
37 ‘Kei ah mä, anu apa m'hni pi ciah chang cu kei ah düihpüi ah kä kia hlawt khai.Kei ah mä, ahta m'hni pi ciah chang cu,
kei ah düihpüi ah kä kia hlawt khai.
38 Amät ah kutlamtung kawt ne ka hnu ah kä na läk ciah chang cu, kei ah düihpüi ah kä kia hlawt khai.
Ref 10:38 Mat 16:24; Mak 8:34; Luk 9:23
39 Amät ah hnun ghin nak vai k'tha nak ciah chang cu, a ghin nak maih khai, kei ah hmawk ah a hnun ghin nak pek ciah chang cu ghin
nak gah khai.
Ref 10:39 Mat 16:25; Mak 8:35; Luk 9:24, 17:33; Jhn 12:25
M'Cümhnah Nak Gui
(Makuh 9:41)
40 ‘Nangmi ning dou gui ci cu kei na dou ciah kiak ci. Ref 10:40 a Luk 10:16; Jhn 13:20; b Mak 9:37; Luk 9:48
41 Kei na dou ci cu, kei na tüi lawk ci dou ciah kiak ci. Khanpughi ah ang shä tüih m'hni ne dou ciah chang cu, chang k'ni ah gah
ah m'cümhnah nak gah tuk khai.
42 Kei naw akcang ka pyein cu, kei ah kang khahpüi gui ung kaa, akhmaw pi-am tui k'gei m'zak ät tu ciah chang cu, kei ah kang
khahpüi ah gah ah m'cümhnah nak cu, kä gah ah kä om khai.