1 ငါတို့စွမ်းအားဖြစ်သောဘုရားသခင်အားကြွေးကြော်၍၊ ယာကုပ်၏ဘုရားသခင်အားရွှင်လန်းစွာကြွေးကြော်ကြလော့။ 2 ဆာလံသီချင်းကိုချီးကျူး၍၊ ပတ်သာမှစသောသာယာစွာစောင်းနှင့်တယောထိုးခြင်း၊ 3 လဆန်းနေ့၊ ငါတို့ပွဲခံရာလပြည့်နေ့၌၊ တံပိုးမှုတ်ခြင်းကိုပြုကြလော့။ 4 ဣသရေလလူမျိုး၌ထုံးဖွဲ့ချက်၊ ယာကုပ်ဘုရားသခင်၏ဆုံးဖြတ်ချက်၊ 5 အိဂျစ်ပြည်ပေါ်တွင်ကြွတော်မူရာ၊ ယောသပ်အနွယ်၌သက်သေခံချက်ကိုထိုသို့စီရင်တော်မူသတည်း။ မသိမကျွမ်းသောဘာသာကိုငါကြားရမည်မှာ၊ 6 ငါသည် သူ့ဝန်ကိုပခုံးမှချခြင်း၊ တောင်းကိုလက်လွှတ်ခြင်းပြုသည့်ပြင်၊ 7 ဒုက္ခရောက်ခ၍သင်ဟစ်ခေါ်ရာ၊ ကယ်လွှတ်ခြင်း၊ ပုန်းနေသောမိုးခြုန်းရာမှတုံ့ပြန်ခြင်း၊ မေရိဘရေအနီး၊ စံချခြင်းများကိုပြု၏။ 8 အိုဣသရေလလူမျိုးတော်၊ နားထောင်ကြလော့။ ငါသတိပေးမည်။ 9 အခြားဘုရားကိုမကိုးကွယ်နှင့်။ လူမျိုးခြားဘုရားကိုရှိမခိုးနှင့်။ 10 ငါသည်သင့်ကိုအိဂျစ်ပြည်မှထွက်ခဲ့စေသောသင်၏ဘုရားသခင်ထာဝရဘုရားဖြစ်၏။ သင့်နှုတ်ကိုကျယ်စွာဖွင့်လော့။ ပြည့်ဝစေမည်။ 11 သို့ရာတွင်၊ ငါ့မိန့်ဆိုသံကိုလူမျိုးတော်နားမထောင်၊ ဣသရေလလူမျိုးဝန်မခံသည့် အတွက်၊ 12 စိတ်ခဲယဉ်းသည့်အလျောက်၊ သဘောထင်မြင်ရာလိုက်ခွင့်ကိုငါပေးလိုက်၏။ 13 လူမျိုးတော်သည်၊ နားထောင်၍၊ ဣသရေလလူမျိုးသည်၊ နည်းလမ်းတော်၌လျှောက်လိုက်ကြပါစေသော။ 14 သို့ပြုလျှင်၊ ငါသည် သူတို့ရန်သူတို့ကိုအလျင်အမြန်နှိမ်နှင်း၍၊ ရန်ဘက်တို့ကိုဖိစီးမည်။ 15 ထာဝရဘုရားကိုမုန်းထားသူတို့လည်း၊ ကိုယ်တော့်ထံကျိုးနွံဟန်ဆောင်၍၊ လူမျိုးတော်တို့ခေတ်အစဉ်အမြဲတည်ပါစေသော။ 16 ငါသည် ဂျုံစပါးအထူးအမြတ်နှင့်ကျွေးလျက်၊ ကျောက်ကြားထွက်ပျားရည်နှင့်ရောင့်ရဲစေမည်ဟူ၍တည်း။