1 သင်တို့ကြားနာရသောထာဝရဘုရား၏အမိန့်တော်ကား၊ ထ၍တောင်များရှေ့ဘက်ပြိုင်လျက်၊ ဘက်ပြိုင်ချက်ကိုကုန်းများကြားကြစေ။ 2 အိုတောင်တို့၊ အိုတည်မြဲသောမြေပထဝီအခြေအမြစ်တို့၊ ငါထာဝရဘုရား၏ ဘက်ပြိုင်ချက်ကိုနာခံကြလော့။ ငါထာဝရဘုရားသည်၊ လူမျိုးတော်နှင့် ဘက်ပြိုင်ရန် အကြောင်းရှိလျက်၊ ဣသရေလလူမျိုးနှင့် ဆင်ခြေတက်လိမ့်မည်။ 3 အိုငါ့လူမျိုး၊ ငါသည် သင်၌စီရင်၍မည်သို့ညီးငွေ့စေမိသနည်း။ လဲေလှျာက်ပါလော့။ 4 ငါသည် သင့်ကိုကျွန်ခံနေရာအိဂျစ်ပြည်မှရွေးနုတ်ခေါ်ဆောင်လျက်၊ မောရှေ၊ အာရုန်၊ မိရိအံတို့ကိုရှေ့တည်၍သွားစေခဲ့ပြီ။ 5 အိုငါ့လူမျိုး၊ ငါထာဝရဘုရား၏တရားမှုများကို သိမှတ်ရအံ့သောငှာ၊ မောဘဘုရင် ဗာလက်မင်းကြံစည်ချက်နှင့်၊ ဗောရသားဗာလံ၏တုံ့ပြန်ချက်ကိုလည်းေကာင်း၊ ရှိတ္တိမ်မြို့မှ ဂိလဂါလမြို့ခရီးအကြားတွင် အဖြစ်အပျက်များကိုလည်းေကာင်း၊ သတိရလော့ဟူ၍တည်း။

6 ငါသည်၊ ထာဝရဘုရားထံတိုးဝင်လျက်၊ ကောင်းကင်ဘဝဂ်စံဘုရားသခင်ရှေ့မည်သို့ဦးညွတ်ထိုက်သနည်း။ မီးရှို့ရာ သက္ကာများကိုသော်လည်းေကာင်း၊ အခါလည်သော နွားသားငယ်များကိုသော်လည်းေကာင်း၊ တင်သွင်း၍ တိုးဝင်အပ်သလော။ 7 ထာဝရဘုရားသည်၊ သိုးထီးအထောင်ထောင်၊ ဆီမြစ်အသောင်းသောင်းကို လက်ခံတော်မူမည်လော။ လွန်ကျူးပြစ်အတွက် သားဦး၊ မနောပြစ်အတွက် ရင်သွေးကို၊ ငါဆက်သရမည်လောဟုမေးသော်၊ 8 အချင်းလူ၊ ပြုထိုက်သောကောင်းမှုကို၊ ထာဝရဘုရားဖော်ပြတော်မူခဲ့ပြီ။ တရားစောင့်ခြင်း၊ ကျေးဇူးပြုခြင်း၊ ကိုယ့်ဘုရားသခင်နှင့်အတူ စိတ်နှိမ့်ချစွာ သွားလာခြင်း များမှတစ်ပါး၊ မည်သို့အလိုရှိတော်မူသေးသနည်း။

9 နားထောင်ကြဦး။ ထာဝရဘုရားသည်၊ မြို့တော်အား ခေါ်တော်မူသည့်အတိုင်း၊ နာမတော်ကိုခန့်ညားရာ၌ ပညာရှိသည့်အလျောက်၊ ရိုက်ဒဏ်နှင့်စီရင်တော်မူသော အရှင်ကိုသတိမူကြလော့။ 10 မတရားသဖြင့်ရသောဘဏ္ဍာနှင့်၊ အမျက်တော်တိုက်တင်းငယ်သည်၊ လူဆိုးတို့အိမ် ၌ရှိသေးသလော။ 11 စဉ်းလဲသောချိန်ခွင်၊ မမှန်သောအေလးအိတ်ရှိေစလျှင်၊ ငါသည် သန့်ရှင်းလျက်နေမည်လော။ 12 သူကြွယ်တို့သည်၊ အဓမ္မမှုနှင့်ပြည့်လျက်၊ မြို့သူမြို့သားတို့လည်း၊ လှည့်စားတတ်သောလျှာဖြင့် မုသာဆိုလျက်နေကြသည်တကား။ 13 သို့ဖြစ်၍၊ ငါသည် သင့်ကိုအနာတရပြုလျက်၊ ပြစ်မှုများအတွက် ဆိတ်ညံရာရောက်စေသည့်အလျောက်၊ 14-15 ချင်ရဲမပြေဘဲ စားသောက်၍၊ ဆာလောင်လျက်နေရခြင်း၊ ကယ်လွှတ်မည့်သူတို့ကိုဓားဘေးသို့ငါလွှဲအပ်သဖြင့်၊ မလွတ်မြောက်စေဘဲနေရခြင်း၊ မျိုးကြဲသော်လည်း၊ မရိတ်သိမ်းဘဲနေရခြင်း၊ သံလွင်စပျစ်သီးကိုဖိနင်းသော်လည်း၊ မလိမ်းမကျံ၊ မသုံးသောက်ဘဲ နေရခြင်းများကို သင်ခံရလတ္တံ့။ 16 မြို့တော်ကိုဆိတ်ညံရာ၊ မြို့သူမြို့သားတို့ကိုပြက်ရယ်ပြုရာ၊ ပြည်သူပြည်သားတို့ကို လူမျိုးတော်ခံရသောကဲ့ရဲ့ရာ၊ ငါရောက်စေအံ့သောငှာ၊ သင်တို့သည်၊ ဩမရိ မင်း၏ အထုံးအဖွဲ့များ၊ အာဟပ်မင်းမျိုး၏ အပြုအမူများကိုလိုက်ကျင့်၍၊ ၎င်းတို့အကြံအစည်များအတိုင်းလိုက်လျှောက်ကြသည်တကား။