1 အိုတပ်များပိုင်သတို့သမီး၊ ထိုတပ်များကို ယခုပင်ခင်းကျင်းလော့။ ငါတို့ကို ဝိုင်းထားသောရန်သူသည်၊ ဣသရေလတရားမင်း၏ ပါးကိုကြိမ်နှင့်ရိုက်ပြီတကား။

2 အိုဧဖရတ် ခရိုင်ဗက်လင်မြို့၊ သင်သည် ယုဒတိုက်နယ်များတွင် သိမ်ငယ်သော်လည်း၊ ရှေးမဆွမူလရင်းမပျက်၊ ဣသရေလလူမျိုးကိုအုပ်စိုးမည့်မင်းသည်၊ ငါ့အကျိုး အလို့ငှာ၊ သင်မှပေါ်ထွန်းလိမ့်မည်။ 3 သို့ဖြစ်၍၊ သားဖွားသောမိန်းမသည် မဖွားမချင်း၊ ထိုသူတို့ကိုအပ်နှင်းတော်မူသော်လည်း၊ ဆွေတော်မျိုးတော်အကြွင်းအကျန်တို့သည်၊ ဣသရေလအမျိုးသားတို့ပါ၊ ပြန်လာကြမည့်အလျောက်၊ 4 ငါတို့ရန်ငြိမ်းရာရန်ငြိမ်းကြောင်းဖြစ်သောထိုမင်းသည်၊ ထာဝရဘုရား၏တန်ခိုးတော်ကိုလည်းေကာင်း၊ ကိုယ့်ဘုရားသခင်ထာဝရဘုရား၏ ဘုန်းကြီးသောနာမတော်ကိုလည်းေကာင်း အမှီပြုလျက်၊ တည်နေထိန်းကျောင်း၍၊ မြေပထဝီအစွန်းတိုင်အောင်ကြီးမြင့်သောကြောင့်၊ သူတို့နေထိုင်ရကြလတ္တံ့။ ငါတို့ပြည်သို့အာရှုရိမင်းချီဝင်၍၊ ဘုံဗိမာန်များကိုကျော်နင်းသောအခါ၊ ငါတို့မြှောက်တင်မည့်အထိန်းအကျောင်းအကြီးအကဲခုနစ်ပါးမက ရှစ်ပါးတို့သည် ဆီးဆို့လျက်၊ 5-6 အာရှုရိ၊ နိမ်ရောဓပြည်ဝင်ပေါက်များကိုဓားဖြင့် သုတ်သင်ကြသည်နှင့်၊ ငါတို့ပြည်သို့ချီဝင်၍နယ်နိမိတ်အတွင်းကျော်နင်းသောအာရှုရိလူမျိုးလက်တွင်းမှ၊ ထိုမင်း ကယ်ဆယ်တော်မူလိမ့်မည်။ 7 ယာကုပ်အကြွင်းအကျန်တို့သည်၊ လူတို့အမိန့်ကိုမဆိုင်း၊ လူ့သားတို့အမိန့်ကိုမလင့်ဘဲ၊ ထာဝရဘုရားထံမှ ကျသောနှင်း၊ မြက်ပင်ပေါ်၌ရွာသောမိုးသဖွယ်၊ လူမျိုး ခြားအမြောက်အမြားတို့ဘောင်တွင် ဖြစ်နေကြလိမ့်မည်။ 8 ယာကုပ်အကြွင်းအကျန်တို့သည်၊ တောတိရစ္ဆာန်များဘောင်တွင်၊ ကယ်လွှတ်သူမဲ့အောင်၊ သွားလာဖိနင်းကိုက်စားသော ခြင်္သေ့အိုသဖွယ်၊ သိုးအုပ်များဘောင် တွင် ခြင်္သေ့ပျိုသဖွယ်၊ နိုင်ငံခြား၊ လူမျိုးခြားအမြောက်အမြားဘောင်တွင် ဖြစ်နေကြလိမ့်မည်။ 9 သင့်လက်ရုံးကိုရန်သူတို့အပေါ်တွင်မြှောက်ချီလျက်၊ ရန်ဘက်ဟူသမျှပယ်ရှားခံကြစေသော။

10 ထာဝရဘုရားမိန့်တော်မူသည်မှာ၊ ထိုနေ့ရက်ကာလ၌ ငါသည် သင့်ဘောင်တွင်ရှိသောမြင်းတပ်ကိုပယ်ရှား၍၊ ရထားတပ်ကို ဖျက်ဆီးခြင်း၊ 11 နေပြည်ရှိခံမြို့များကိုပယ်ရှား၍၊ ခံတပ်ဟူသမျှကို ဖြိုလှဲခြင်း၊ 12 လက်ဝယ်ရှိ ယတြာများကိုပယ်ရှား၍၊ ဗေဒင်တတ်တို့ကိုပစေခြင်း၊ 13 လက်ဖြစ်ဘုရားရှေ့ရှိမခိုးရစေခြင်းငှာ၊ သင့်ဘောင်တွင်ရှိသောရုပ်ပွားဆင်းတုနှင့်၊ ကျောက်တိုင်များကိုပယ်ရှားခြင်း၊ 14 သင့်ဘောင်တွင် ရှိသောတံခွန်တိုင်များကိုဆွဲနုတ်၍၊ မြို့ရွာများကိုသုတ်သင်ခြင်းပြုသည့်ပြင်၊ 15 မလိုက်မနာသောလူမျိုးခြားတို့အပေါ်၌ကား၊ ဒေါသအမျက်တော်ထား၍၊ လက်စားချေမည်ဟု မိန့်တော်မူ၏။