1 အိပ်ရာပေါ်တွင်၊ ဒုစရိုက်ကိုကြံစည်လျက်၊ မကောင်းကိုဆင်ခြင်လျက်၊ နံနက်မိုးသောက်သည့်ကာလ၊ သတ္တိရှိသလောက်ပြုသောသူ၊ 2 အိမ်၊ လယ်ယာများကို တပ်မက်၍ သိမ်းယူသဖြင့်၊ လင်နှင့်သားမယားတို့အား၊ ပိုင်ရာပစ္စည်းပါ၊ ညှဉ်းပန်းသူတို့သည်၊ အမင်္ဂလာရှိကြ၏။ 3 သို့ဖြစ်၍ ထာဝရဘုရားက၊ ဆိုးသွမ်းရာကာလဖြစ်သောကြောင့်၊ မတ်တတ်ရပ်ခွင့်၊ လည်ကုတ်ဆုတ်ခွင့် မရှိသည့်တိုင်အောင်၊ ဤလူမျိုးနှင့်စပ်လျဉ်းသော မကောင်း ဝန်ကိုငါကြံစည်သည်ဟု မိန့်တော်မူ၏။ 4 ထိုကာလ၌၊ သင်တို့ကိုရည်သောငိုချင်းကဗျာ ဖွဲ့ဆိုသည့်အတိုင်း၊ ဒုက္ခရောက်လေပြီ။ လုံးလုံးပျက်စီးကြလေပြီ။ လူမျိုးသားချင်းတို့၏ ဝေပုံလွှဲပြောင်း၍၊ ငါတို့လက်မှတ် သိမ်းယူကြလေပြီ။ ဖောက်ပြန်သူတို့အား၊ ငါတို့လယ်ယာများကိုဝေဖန်ကြလေစွဟု မြည်တမ်းသီဆိုကြလတ္တံ့။ 5 သို့နှင့်အညီ၊ ထာဝရဘုရား၏ပရိသတ်၌၊ သင့်ဝေပုံကို ကြိုးဖြင့် တိုင်းတာသူရှိတော့မည်မဟုတ်။

6 မဟောကြလင့်။ ထိုအခြင်းအရာများကိုဟောပြောသူမရှိစေလင့်။ အပြစ်တင်စကားပြတ်စဲရမည်မဟုတ်လော။ 7 ယာကုပ်အမျိုးသားတို့အား၊ အိုဆင့်ဆိုလျက်နေသူ၊ ထာဝရဘုရားသည် စိတ်တိုတော်မူသလော။ ထိုအတိုင်းစီရင်တော်မူသလောဟု ပြန်ဟောကြရာ၌၊ ဖြောင့်မှန်စွာ လိုက်လျှောက်သူတို့အဖို့၊ ငါ့ဗျာဒိတ်တော်အကျိုးပေးသည်မှန်သော်လည်း၊ 8 ငါ့လူမျိုးဖြစ်သောသင်တို့သည်၊ ယခုကပင်ရန်သူသဖွယ် ထကြွ၍၊ ခိုက်ရန်မပြုဘဲ စိတ်ချစွာခရီးသွားသူတို့မှ၊ အပေါ်ရုံကိုချွတ်ယူခြင်း။ 9 သာယာအိမ်များမှ၊ လူမျိုးတော်မိန်းမတို့ကို နှင်ထုတ်ခြင်း၊ သူငယ်တို့မှ၊ ငါ့ဘုန်းဂုဏ်ကို ရုပ်သိမ်းခြင်းပြုကြလေစွ။ 10 ထသွားကြလော့။ ကုသ၍မရသော ပျက်ယွင်းနာကိုဖြစ်စေသည့်ညစ်ညူးခြင်းကြောင့်၊ ဤပြည်သည်သင်တို့နားနေရာဖြစ်တော့မည်မဟုတ်။ 11 အကြင်သူက၊ စပျစ်ရည်နှင့် သေရည်သေရက်အကြောင်း ငါဟောပြောမည်ဟု၊ လေသက်သက်၊ မုသာသက်သက်၌ ကျင်လည်၍လှည့်စားအံ့။ ထိုသူသည်၊ ဤလူမျိုး၏ ပရောဖက်ဖြစ်ထိုက်လတ္တံ့။

12 အိုယာကုပ်၊ ငါသည် သင့်အမျိုးသားအပေါင်းတို့ကိုစုရုံးလျက်၊ ဣသရေလအကြွင်းအကျန်တို့ကိုသိမ်းယူလျက်၊ ခြံ၌သိုးစု၊ စားကျက်၌ သိုးအုပ်ကဲ့သို့သွင်းထား မည့်အလျောက်၊ လူသံသူသံဖြစ်ပြန်လိမ့်မည်။ 13 မြို့ရိုးကိုဖောက်သောအရှင်ဦးတည်၍ ကြွတော်မူ၏။ ရှိသမျှတို့သည် မြို့တံခါးဖြင့် ပေါက်လွတ်ထွက်သွားကြလေပြီ။ သူတို့ဘုရင်ထာဝရဘုရားသည်၊ ဦးတည် ရှေ့ဆောင်၍ချီကြွတော်မူလေပြီ။