1 ကြက်သွေးရောင်ဝတ်လုံကိုရုံလျက်၊ ဧဒုံပြည်ဗောဇရမြို့မှကြွလာသူ၊ ကျက်သရေအဝတ်ကိုဆင်လျက်၊ ခွန်အားဗလနှင့်ပြည့်စုံစွာချီလာသောဤသူကား မည်သူနည်း။ သစ္စာအတိုင်းမိန့်မြွက်၍၊ ကယ်တင်ရန်တန်ခိုးကြီးသောငါပေတည်း။ 2 ဝတ်လဲတော်သည် နီလျက်၊ ဝတ်လုံတော်လည်း စပျစ်ရည်ကျင်း၌ဖိနင်းသူ၏ အရောင်နှင့်တူသည်ကား အသို့နည်း။ 3 လူမျိုးများအနက်တစ်ယောက်မျှမပါဘဲ၊ ငါတစ်ပါးတည်းစပျစ်ရည်ကျင်းသဖွယ်ဖိနင်းရသဖြင့်၊ အမျက်ကြောင့်ဖိလျက် ဒေါသကြောင့်နင်းလျက်၊ ငါ့ဝတ်လုံသည်ချင်းတို့သွေးရည်လူးခြင်း၊ အဝတ်ရှိသမျှသည် စွန်းခြင်းခံခဲ့ပြီ။ 4 အသို့ဆိုသော် လက်စားချေရာရက်ကာလသည် ငါစိတ်တွင်ရှိ၏။ ငါရွေးနုတ်ရာနှစ်ကာလလည်း တိုင်ရောက်ပြီ။ 5 ကူညီသူ၊ ထောက်မသူမရှိကြောင်းကိုငါရှုကြည့်၍ အံ့ဩရာ၊ ကိုယ်လက်ရုံးပင်ကယ်တင်ခြင်းအမှုကိုစီရင်လျက်၊ ကိုယ့်ဒေါသပင်ထောက်မလေပြီ။ 6 ငါသည်လူမျိုးတို့ကိုအမျက်တိုက်၍ကျော်နင်းလေပြီ။ ဒေါသကြောင့်ချိုးဖဲ့လျက်၊ ချင်းတို့သွေးရည်ကိုမြေပေါ်တွင်သွန်းလေပြီ။

7 ထာဝရဘုရား၏မေတ္တာကျေးဇူးမှစ၍၊ ချီမွမ်းဖွယ်ကောင်းသောအမှုတော်များကိုလည်း‌ေကာင်း၊ ကရုဏာနှင့်ကျေးဇူးတော်မြောက်မြားသည့်အလျောက်၊ ဣသရေလအမျိုးသားတို့အားပြုစုသော ကောင်းမြတ်တော်မူခြင်းကိုလည်း‌ေကာင်း၊ ငါတို့၌ ထာဝရဘုရားပြုစုတော်မူသမျှနှင့်လျော်စွာ၊ ငါချီးမွမ်းပေအံ့။ 8 ကိုယ်တော်က၊ ဤသူတို့သည်ငါ့လူမျိုးတော်၊ သစ္စာမပျက်သောသားများမှန်ကြသည်ဟု အောက်မေ့သည်နှင့်၊ သူတို့၏ကယ်တင်ရှင်ဖြစ်တော်မူ၏။ 9 သူတို့ခံရသမျှဒုက္ခကို၊ ကိုယ်တော်တိုင်ခံရာရောက်တော်မူ၍၊ မျက်နှာတော်တမန်သည်သူတို့ကိုကယ်တင်၏။ မေတ္တာကရုဏာတော်ရှိသည့်အတိုင်း၊ ရွေးနုတ်သည့်ပြင်၊ ရှေးကာလပတ်လုံး၊ ချီပိုက်ဆောင်ယူတော်မူလျက်ပင်၊ 10 သူတို့ပုန်ကန်၍၊ သန့်ရှင်းသောဝိညာဉ်တော်ကို နစ်နာစေကြသောကြောင့်၊ ရန်သူတော်အဖြစ်သို့လဲပြောင်း၍ စစ်တိုက်တော်မူ၏။ 11 ထိုအခါ လူမျိုးတော်သည် မောရှေလက်ထက်ရှေးကာလကိုသတိရလျက်၊ သိုးအုပ်တော်အထိန်းအကျောင်းနှင့်တကွ၊ ပင်လယ်တွင်းမှတက်လာေစသောအရှင်ကားအဘယ်မှာနည်း။ ထိုသူတို့၌ သန့်ရှင်းသောဝိညာဉ်တော်ကိုသွန်းတော်မူထသော၊ 12 မောရှေ၏လက်ယာဘက်၌ဘုန်းကြီးသောလက်ရုံးတော်ကို ထက်ကြပ်ရှိစေတော်မူထသော၊ ထာဝရဘွဲ့နာမကိုရလို၍ထိုသူတို့ရှေ့၊ ရေချင်းကွဲပြတ်စေတော်မူထသော။ 13 လွင်ပြင်၌စိုင်းသောမြင်းသဖွယ်၊ ခလုတ်မတိုက်စေဘဲ၊ နက်ရှိုင်းရာတွင်ဆောင်ယူတော်မူသောအရှင်ကား၊ အဘယ်မှာနည်း။ 14 စားကျက်တွင်းသို့ဆင်းရောက်သောနွားအုပ်သဖွယ်၊ ထာဝရဘုရားဝိညာဉ်တော်သည် ထိုသူတို့ကိုနားနေခွင့်ရစေတော်မူ၏။ ဘုန်းရှိသောဘွဲ့နာမကိုရလို၍ လူမျိုးတော်ကို၊ ထိုသို့ပို့ဆောင်တော်မူလေပြီဟုအောက်မေ့လေပြီ။ 15 သန့်ရှင်းသောကြက်သရေစံရာကောင်းကင်ဘဝဂ်မှ စီးကြည့်ရှုမြင်တော်မူပါ။ စေတနာထက်သန်ခြင်းနှင့်တန်ခိုးတော်ပြခြင်းကား အဘယ်မှာနည်း။ အကျွန်ုပ်အားသနားသောစိတ်နှင့်ကရုဏာအဟုန်ကို ချုပ်တည်းတော်မူလေပြီ။ 16 အိုထာဝရဘုရား၊ ကိုယ်တော်သည်အကျွန်ုပ်တို့အဖဖြစ်တော်မူပါ၏။ အကျွန်ုပ်တို့ကိုအာဗြဟံမသိမကျွမ်း၊ ဣသရေလမသိမမှတ်သော်လည်း၊ ကိုယ်တော်သည်အကျွန်ုပ် တို့အဖမှန်တော်မူပါ၏။ နာမတော်ကား၊ ရှေးမဆွက အကျွန်ုပ်တို့ကိုရွေးနုတ်သောအရှင်ပေတည်း။ 17 အိုထာဝရဘုရား၊ အကျွန်ုပ်တို့စိတ်နှလုံးကို၊ နည်းလမ်းတော်များမှသွေစေလျက်၊ ကိုယ်တော်အားမခန့်ညားစေရန်၊ အဘယ့်ကြောင့်ခဲယဉ်းစေတော်မူပါသနည်း။ ပိုင်တော် မူရာအနွယ်ဖြစ်သောကျွန်တော်မျိုးတို့အတွက် ပြန်လာတော်မူပါ။ 18 သီးသန့်ထားတော်မူသောလူမျိုးတော်ခေတ္တမျှသာပိုင်ရသော သန့်ရှင်းရာဌာနတော်ကို၊ ရန်သူတို့ကျော်နင်းကြလေပြီ။ 19 အကျွန်ုပ်တို့သည် ကိုယ်တော်မအုပ်စိုးဘူးသောသူ၊ နာမတော်ဖြင့် သမုတ်မခံဘူးသောသူတို့ကဲ့သို့ဖြစ်ကြပါပြီ။