1 အိုသတို့သမီးကညာဗာဗုလုန်၊ ဆင်းကျလျက်မြေမုန့်တွင်ထိုင်နေလော့။ အိုသတို့သမီးခါလဒဲလူမျိုး၊ နန်းကျလျက်မြေပေါ်တွင်ထိုင်နေလော့။ နောက်တစ်ဖန်နူးညံ့ပျော်မွေ့ သူဟူ၍အခေါ်မခံရ။ 2 ကြိတ်ဆုံကိုကိုင်ဆောင်လျက်၊ စပါးကိုကြိတ်လော့။ ရှေ့ကာကိုပယ်၍၊ မာလိကတန်ဆာချွတ်ပြီးလျှင်၊ ပေါင်လယ်ထိမလျက်၊ မြစ်ချောင်းများကိုဖြတ်သန်းလော့။ 3 သင်သည် အဝတ်အချည်းစည်းနေရ၍ ကဲ့ရဲ့ဖွယ်အကြောင်းထင်ရှားလိမ့်မည်။ ငါသည် မည်သူ့ကိုမျှမညှာတာဘဲလက်စားချေလိမ့်မည်။ 4 ငါတို့ကိုရွေးနုတ်ပိုင်ရှင်၏နာမတော်ကား၊ ဗိုလ်ခြေတို့အရှင်ထာဝရဘုရား၊ ဣသရေလလူမျိုး၏ သန့်ရှင်းသောအရှင်ပေတည်း။

5 အိုသတို့သမီးခါလဒဲလူမျိုး၊ မှောင်ကျရာသို့ဝင်သွား၍ တိတ်ဆိတ်စွာထိုင်နေလော့။ နောက်တစ်ဖန်နိုင်ငံများ၏ အရှင်မဟူ၍အခေါ်မခံရ။ 6 လူမျိုးတော်ကိုအမျက်ထားခိုက်၊ ပိုင်ရာတော်ကိုရှုတ်ချလျက်၊ သင့်လက်တွင်းသို့ငါအပ်လိုက်ရာ၊ သင်သည် ကရုဏာကင်းလျက် လေးလံသောထမ်းပိုးကို၊ အိုမင်းသူတို့အပေါ်တွင်တင်သည့်ပြင်၊ 7 အရှင်မအဖြစ်အမြဲနေမည်ဟုအောက်မေ့လျက်၊ ထိုအကြောင်းအရာများကိုနှလုံးမသွင်း၊ အကျိုးအပြစ်ကိုလည်းသတိမထားပါတကား။

8 ငါမှတစ်ပါး၊ မည်သူမျှမရှိ။ မုဆိုးမအဖြစ်ကိုလည်း‌ေကာင်း၊ သားဆုံးပါးခြင်းကိုလည်း‌ေကာင်း၊ ငါမခံရဟု စိတ်တွင်အောက်မေ့လျက်၊ ပျော်မွေ့လျစ်လျူစွာနေထိုင်သူ၊ ယခုနားထောင်လော့။ 9 တစ်နေ့ချင်းပင်သားဆုံးခြင်း၊ လင်ဆုံးခြင်းတည်းဟူသောဘေးနှစ်မျိုးသည်၊ ရှောင်တခင်သင့်ရောက်လိမ့်မည်။ သင်၌မန္တာန်မြောက်မြား၍၊ ဝိဇ္ဇာအတတ်လွန်ကဲသော်လည်း အကုန်အစင်သင့်ရောက်လိမ့်မည်။ 10 သင်က မည်သူမျှမမြင်ဟုဆိုလျက်၊ ကိုယ့်ပြစ်မှုကိုစိတ်ချသည့်အလျောက် အသိပညာနှင့်ဉာဏ်ပညာအတွက်လမ်းလွဲသဖြင့်၊ ငါမှတစ်ပါးမည်သူမျှမရှိဟု၊ စိတ်တွင်ထင်မှတ်သောကြောင့်၊ 11 မန္တာန်ဖြင့်မကွယ်ကာနိုင်သောဘေး၊ မပုန်းရှောင်နိုင်သောဥပဒ်၊ မမြော်မြင်နိုင်သောအန္တရာယ်များသည်၊ သင့်အပေါ်တွင် ရှောင်တခင်သင့်ရောက်လိမ့်မည်။ 12 ငယ်ရွယ်စဉ်ကပင်၊ သင်လုံ့လပြုခဲ့သောမန္တရားနှင့်ဝိဇ္ဇာအတတ်အမြောက်အမြားကိုသာ မှီဝဲလော့။ အကျိုးရကောင်းရလိမ့်မည်။ ခြိမ်းချောက်တတ်ကောင်းတတ်လိမ့်တကား။ 13 သင်သည် အတိုင်အပင်များပြားသဖြင့်၊ ညီးလှလေစွ။ အာကာသကို ပိုင်းခြားခြင်း၊ ကြယ်နက္ခတ်ကိုရှုမှတ်ခြင်း၊ သင်၌ဖြစ်ပျက်အံ့သောအရာများကို လစဉ်ကြားပြောခြင်းပြုတတ်သူတို့သည်၊ ရပ်တန့်လျက် သင့်ကိုကယ်မကြစေ။ 14 ၎င်းတို့သည် ဖွဲကဲ့သို့ဖြစ်၍ ကျွမ်းလောင်ခြင်းခံရလိမ့်မည်။ မီးလျှံအရှိန်မှကိုယ်ကိုမကယ်နိုင်။ ထိုမီးရှိန်သည် တူရူထိုင်၍ လှုံဖွယ်မီးကျီးမဟုတ်ချေ။ 15 သင်လုံ့လပြုခဲ့သောအရာများသည်ထိုသို့ဖြစ်လိမ့်မည်။ ငယ်ရွယ်စဉ်ကပင်ဉာဏ်ကူးဘက်ဖြစ်သူတို့လည်း၊ ကယ်မခြင်းမပြုဘဲ၊ ကိုယ့်ဆိုင်ရာဆိုင်ရာလွင့်သွားကြလိမ့်သတည်း။