2
Vaethumnaw Vizin: Arui te A Toupaw Ccungccapaw
1 Ka dothung zah a kuih kya tounawpaw arui a ccyngpaw ccungccapaw lu kheit kha ka muih.
2 Te kae nynh, “Teilangmou na cceih cih?” cite ka khia zah, aning nynh, “Jerusalem khua akopaw te asaepaw kha tou lan ka cceih cih,” a ci.
3 Te bya kae hokuhpaw vaawpaw tuh malang yn cceih, te ccangpaw vaawpaw lu kheit nynh amaw kha tungku khylan cciadue zah,
4 “Ccue lah, khuh-e ccangvaepaw khuh hopya tua: Jerusalem kya ccungccaw zapi te sarangpaw hae a um hae keiccuze khualungrua a um leipaw khua hae kya um hawte, Jerusalem kya a um cih hae.
5 Bawipaw nynh a hopaw tuh, Kae tuh khua po voilu lan a koihpaw maee lungrua ka thua cih zah, khua lungkhu kya umpaw phu-enaw ka thua cih, a ci cite la hopah,” a cipya.
Ngianaw
6 Tho oh, tho oh! Thahlang e ram kyate ccue oh, cite Bawipaw nynh a ci; pawccecize vaawlui zakaw aki ki pali hae hawte phiariphiarae kae nung vae oh, cite Bawipaw nynh a ci.
7 Tho oh! Babilon ccanung kya um hae paw nanning, Zion lang ccue oh.
8 Nanning ae luade oh paw minphuin hae te asekuh lante vaaw Bawipaw (a phu-enaw nynh kae kha yn saw koute) hynhte a ho: Thanccingte, nanning ae ty oh paw nynh ka mitlungdy kha yn ty vae.
9 Minmin kha ka kuih ka hangnua cih hae zah, minmin tuh mih see hae hanlan a luade hae paw uccaw lang a tang cih hae. Tetuh kae hynh vaaw Bawipaw nynh yn saw cipaw na nyh vae cih oh.
10 Pou Zion ccanung, hlawsah lah, na lungtua sah! Pawccecize kae cceih zah na ngaelung kya ka um cih, cite Bawipaw nynh a ci.
11 Tuin nin vae tuh, minphuin patae nynh Bawipaw kya a kyngkuh cih hae zah ka ccungccaw athua cih hae; te na ngaelung kya ka um cih. vaaw Bawipaw nynh kae hynh na kalan yn saw cipaw na nyh cih.
12 Bawipaw nynh ram thyaapaw kyakhe Judah kha a hanpaw lante rho lang a ccou cih zah, Jerusalem kha bua a po cih.
13 Ccungccaw balyn, Bawipaw malang daebabi lan um oh; pawccecize aning tuh a umnaw hmin thyaapaw kyate a thokuh vae.