ZEKHARIAH
Zechariah
Zekhariah ccauh hynh phuin ning lang phia kho athua: (1) Byaria 1-8 kyahin, BC 520 te 518 laku kya profeh Zekhariah nynh a hopaw bya a um. E bya hae alunghua tuh vizin muihnaw te thua zah, Jerusalem raethuinaw, Beikinn sakthuinaw, Pachia ccungccaw hae thyaasahnaw te yn thua cih paw Messiah ccyh kong nynh thua. (2) Byaria 9-14 kyahin, ngaehoi athuapaw Messiah kong te nyathyakou byapianaw kong ccakhungpaw bya kha a um.
1
Israel kha Ngaesiku lan Hyynaw
1 Darias nynh siapharan lang a tangnaw kum ningnaw, sawpaw sah taryanaw khe, Bawipaw bya tuh Iddo ccapaw Berekhiah, Berekhiah ccapaw profeh Zekhariah kalan khe yn thua zah a hopaw tuh:Ref 1.1: Ezr 4.24—5.1, 6.14
2 Bawipaw tuh na minpaaw hae tungvaw a thin myarya ria.
3 Tukeiccuze vaaw Bawipaw bya kha minmin kalan hynhte hopah hae: Vaaw Bawipaw nynh a hopaw tuh ka kalan yn ki oh lah, nae kalan kae kiru cih, cite vaaw Bawipaw nynh a ci.
4 Nae minpaaw hae te lokuh nan oh. Langmawlya e profeh hae nynh minmin kha, “Vaaw Bawipaw nynh hynhte a ho, ahoy leipaw nae hiinzia te ahoy leipaw nae cyisahnaw kyate oun ki oh,” cite a hopya hae. Thuasalama minmin nynh yn thaepah khyh hae, pawlang yn ria khyh hae, cite Bawipaw nynh a ci.
5 Nae minpaaw hae tuh teimou a um vae hae? Te Profeh hae so zungzae a hiin hae tou?
6 Thuasalama ka ryalahtu profeh hae kya kaw ka pya hae paw ka bya te ka phungbya hae nynh nae minpaaw hae kha phah khyh hae tou? Tukeiccuze minmin nynh ngaesikuh hae zah, “Vaaw Bawipaw nynh cyi lan a paccyn hawte, aening hiinzia te cyisahnaw thyhte aening tungvaw a cyi vae,” cite a ho hae.
Masaty Vizin: Marang Ccikuh hae paw
7 Darias nynh siapharan lang a tangnaw kum ningnaw, sawpaw sah haw lae kheitnaw Shebat sawpaw, nin kuin lae pali nin khe, Bawipaw bya tuh Iddo ccapaw Berekhiah, Berekhiah ccapaw profeh Zekhariah kalan khe yn thua; Zekhariah nynh a hopaw tuh,
8 Khuazi khe marang sepaw a ccikuhpaw ccungccapaw lu kheit kha ka muih! Tuh-e paw tuh accya kya-e myrte thingku hae laku khe a thadyn; a nulang khe asepaw, puakakaepaw te arawpaw marang hae a um hae.Ref 1.8: Bya 6.2-8
9 Te kae nynh, “Ka bawipaw, e hae hynh pawmou athua hae?” ka cipya. Bya kae hokuhpaw vaawpaw nynh kae kha, “Pawmou athua hae cipaw kha kae muihsah cih,” yn cipya.
10 Myrte thingku hae laku a thadynpaw ccungccapaw nynh, “Minmin tuh laephi pynpi kya ccia bungthung khylan Bawipaw nynh a saw hae paw nynh thua,” a ci.
11 Te minmin nynh myrte thingku hae laku a thadynpaw Bawipaw vaawpaw kha, “Laephi kya kae cceih bungthung vae, laephi pynpi tuh daerarin lan a um,” a cipya hae.
12 Bawipaw vaawpaw nynh, “Pou vaaw Bawipaw , hynh-e kum sung sari lungkhu na thinrianuapaw Jerusalem te Judah khuapi hae hynh hohseciamou thawcci leite na um cih hae?” a ci.
13 Tetuh Bawipaw nynh kae te bya kae hokuhpaw vaawpaw kha bya hoypaw te lungtangnaw bya khate bya a khung.
14 Bya kae hokuhpaw vaawpaw nynh kae kha yn hopah zah, E bya hynh siakhae ccavae: Vaaw Bawipaw nynh hynhte a ho, Kae tuh Jerusalem te Zion hanlan myarya ka eiung.
15 Ngaengante um hae paw minphuin hae tungvaw myaryamaw ka thinria; pawccecize thawte ka thinria khyh lyakhe minmin nynh hoyleinaw kha houh a rae hae.
16 Tukeiccuze, Bawipaw nynh hynhte aho, Jerusalem kha ngaethyaumsahte ka kinua vae; a lungkhu khe ka inn kha sak athua cih, Jerusalem kha tounawpaw arui te tou athua cih, cite vaaw Bawipaw nynh a ci.
17 Vaawpaw nynh siakhae lanpaw bya yn hopyapaw tuh, Vaaw Bawipaw nynh hynhte a ho: Ka khuapi hae tuh paepae lui lan bua a hoirum cih hae; Bawipaw nynh Zion kha lungtangnaw bua a pya cih zah Jerusalem kha bua a po cih.
Vaeningnaw Vizin: Saki hae te Sosuhtu hae
18 Ka dothung zah saki ki pali kha ka muih.
19 Bya kae hokuhpaw vaawpaw kha, “E hae hynh pawmou athua hae?” cite ka khia. Te aning nynh, “E hae tuh Judah ram, Israel ram te Jerusalem khua kha phiariphiarae a phiasakuh hae paw saki hae nynh thua hae,” cite yn khung.
20 Te Bawipaw nynh sosuhtu hae lu pali kha yn muihsah.
21 Te kae nynh, “Minmin hynh paw ryalaw lan mou oun ccia hae?” cite ka khia zah, vaawpaw nynh, “E saki hae tuh, a lu a hang khopaw lu kheit san a um khyh ccaw cite Judah kha phiariphiarae a phiasakuhpaw saki hae nynh thua hae; thuasalama, e sosuhtu hae tuh minmin kha risah khylan, te Judah ccungccaw hae kha phiariphiarae nung khylan Judah ram kha rawsete mih ki a hangnua hae paw minphuin hae ki kha khya khylan oun thua vae hae,” a ci.