3
Samuel kha Konaw
1 Imuapaw Samuel tuh Eli kuihkaw kya Bawipaw rya kha a lah. Tuh ccyh lya tuh Bawipaw bya tuh azya; vizin hae mah azya.
2 Tuh ccyh lyakhe a mit thawzya vae zah hoyte ngawmuih kho lei vae paw Eli tuh amaw khaan kya a ih;
3 Pachia maeekhua tuh chih loh khyh, te Samuel tuh Pachia thingkua a umnaw Bawipaw beikinn lungkhu khe a ih.
4 Bawipaw nynh, “Samuel! Samuel!” cite ko zah aning nynh, “E kya mang ka um!” a cipya.
5 Te Eli kalan ccue zah, “Nae ko zah kae thua vae,” a cipya. Thuasalama Eli nynh, “Kae ko khyh; bua la ih,” a cipya. Tukeiccuze ki zah a ih.
6 Bawipaw nynh, “Samuel!” cite bua a ko. Samuel nynh thokute Eli kalan cceih zah, “Nae ko zah kae thua vae,” a cipya. Thuasalama Eli nynh, “Ka ccapaw, kae ko khyh; bua la ih,” a cipya.
7 Samuel nynh Bawipaw kha nyh loh khyh zah, Bawipaw bya tuh a kalan phypya thua loh khyh.
8 Bawipaw nynh Samuel kha vae thumnaw a ko. Aning nynh thokute Eli kalan cceih zah, “Nae ko zah kae thua vae,” a cipya. Tetuh Bawipaw nynh imuapaw kha a ko cipaw Eli nynh a ny.
9 Tukeiccuze Eli nynh Samuel kha, “La cceih lah, la ih; aning nynh he ae ko ze, nang nynh, ‘Bawipaw , yn hopah, na ryalahtupaw nynh phang ka ngae,’ na cipah cih,” a cipya. Tukeiccuze Samuel tuh cceih zah a umnaw kya a ih.
10 Bawipaw tuh yn cceih zah tuin kya yn thadyn zah, “Samuel! Samuel!” cite langmaw a komae hawte bua a ko. Te Samuel nynh, “Hotua ccaleih, na ryalahtupaw nynh phang ka ngae,” a cipya.
11 Te Bawipaw nynh Samuel kha, “Dotua, a thaepaw miakaw a nakaring voi ning mawte ringtering lan accae cih paw ccangkhakheit kha Israel hae tungvaw kya vyavya ka rae vae.
12 Tuin nin vae tuh Eli innbyn te asekuh lante ka honua vae paw balyn kha athonaw te athangnaw cia ka ccingsah cih.
13 A ccapaw hae nynh Pachia the a thyasahnaw hae paw hoyleinaw kha mang a nyh pite, minmin kha a khee khyh hae keiccuze, a innbyn kha zungzae hanlan vyavya de ka tah vae, cite ka hopya vae.
14 Tukeiccuze Eli innbyn kya-e hoyleinaw tuh silawnaw te thuasah, pyapaw uccaw te thuasah seishawnaw raepya kho papin thua vae lan khyh, cite Eli innbyn tungvaw kya bya ka kinku vae,” a cipya.
15 Samuel tuh tuin kya khuadae cia a ih; te Bawipaw inn e thuakaw hae kha a hung. Samuel nynh tuh-e vizin tuh Eli kya hopya lan a rih.
16 Eli nynh Samuel kha, “Ka ccapaw, Samuel,” cite ko zah, Samuel nynh, “E kya mang ka um,” a cipya.
17 Eli nynh, “Pawmou ae hopya? Kae hynh yn phei nan. Ae hopyapaw balyn kha ccangkhakheit nae phei zetuh, Pachia nynh na tungvaw kya tuhlae accih lante cyih vae sah,” a cipya.
18 Tukeiccuze Samuel nynh pawpaw mah phei leite marya a hopya. Tetuh Eli nynh, “Amaw tuh Bawipaw nynh thua; ahoy a cipaw kha cyih vae sah,” a ci.
19 Samuel tuh yn lethung, Bawipaw tuh a kya um zah, a bya kha kaw kheit sanmah laekhu lang ccawsahpah khyh.
20 Israel hae balyn nynh, Dan khua kyate Beersheba khua kyacia, Samuel tuh Bawipaw profeh doliaku lan umpaw nynh thua cipaw a ny hae.
21 Bawipaw tuh Shiloh khua kya palei a langkuh, Shiloh khua kyakhe Bawipaw amaw ccaccei nynh Samuel kalan khe Bawipaw bya lante a phyku.