2
Hannah Sawsangnaw
1 Hannah nynh sawsang zah,Ref 2.1-10: Luk 1.46-55
“Ka thinlung tuh Bawipaw kya
a lungtua;
ka thawzung tuh ka Pachia kya
hangthung athua.
Ka taenaw kyakhe ka lungtua keiccuze
ka khalang nynh ka rhaw hae kha
2 “Bawipaw hawte Athyaapaw
humhung mah um khyh,
namaw laelan humhung mah
um khyh;
ah Pachia alopaw Lungpi um khyh.
3 Lysakute byaho nan vae oh,
nae mung kyate tansakunaw bya
pousah nan oh;
pawccecize Bawipaw tuh
tynre nyhpaw Pachia thua zah,
cyipaw miakaw kha
akhin a saetu nynh thua.
4 A thawsae hae paw li tuh akhya,
thuasalama a nyaa hae paw nynh
thawzung a hoi hae.
5 Mih vueso hae paw tuh looh mueku
khylan vaeluakuh hae,
thuasalama mih vuelaw hae paw tuh
mih vuelaw vae khyh.
A tin hae paw tuh ccaaw lu sari
a saah vae hae,
thuasalama ccaaw patae
a hoipaw tuh a lanme vae.
6 Bawipaw nynh theih hae zah
a hiinsah hae;
Michi khua lang sahbung hae zah
a thosah thui hae.
7 Bawipaw nynh ryachisah hae zah
a hoirumsah hae;
zakawsangsah hae zah
hang mah a hangthung hae.
8 Bawi hae ryte haungsah kheih lan te
sawtuanaw tungkhung kha
ccou khylan,
a ryachipaw kha laenoi kyate
hangthung zah,
a nyaapaw kha buhhaw apumkuhpaw
kyate a hangthung.
Pawccecize laephi tung hae tuh
Bawipaw kya-e thua hae zah,
tuh-e tung hae vawlan khe
9 “Alungzipaw a ccungccaw hae
ccu kha a thungkhaw hae,
thuasalama ccungccaw hoylei hae paw tuh
mohnaw kya vua athua cih hae;
pawccecize ccungccaw nynh
a thawsaenaw liate tae khyh.
10 Bawipaw rhaw hae tuh
zoihtatyh lan khya athua cih hae;
Ahang Huaccepaw nynh vaawlui khe
kholung a thyhsah cih.
Bawipaw nynh laephi adianaw cia
bya a pia cih;
a siapharan kha thawzung a pya cih zah,
amaw nynh chitui thuhpaw
a ccungccaw huhan kha
a hangthung cih,” a ci.
Eli Ccapaw hae Hoyleinaw
11 Elkanah tuh Ramah khua e a inn langkhe ki zah, imuapaw tuh ranpibawi Eli malang khe Bawipaw rya kha a lah.
12 Eli ccapaw hae tuh a ccouseikuh hae; minmin nynh Bawipaw kha thuasah,
13 ccungccaw hae hanlan ranpibawi hae ryalaw kha thuasah pawlangria khyh hae. Lukhakheit nynh silawnaw a rae vae ze, ranpibawi a ryalahtupaw nynh yn cceih cih zah, saw tuh accoh cciamang lyakhe a kuih te yn ccyngpaw ccangthum lang apheipaw phedung khate
14 talyng-ang khyhze tuiso-ang khyhze talyng-ang khupaw khyhze ang lungkhu langkhe a sua cih; tuh-e apheipaw phedung nynh a sua khopaw balyn tuh ranpibawi nynh a lawkuh cih. Shiloh khua a thua hae paw Israel hae balyn kha tuhcite leih a cyipya hae.
15 Tuhpiaze, atho kha maee te u athua mawkhe, ranpibawi a ryalahtupaw nynh yn cceih cih zah silawnaw a raetupaw kha, “Ranpibawi hanlan epya lan saw kha yn pya; pawccecize athungkuhpaw na saw kha tuh lawkuh lan khyh, ahepaw saw kha nynh a lawkuh cih,” cite leih a cipya.
16 Tuh-e paw nynh amaw kha, “Atho hynh maee te kae u ty hin sah, tukoute na ry zeihte na lawkuh cih,” cite a hopya ze, aning nynh, “Thua khyh, atu ccaccei maw nae pya cih; tuhkhyhze tuh ka lawkude vae cih,” cite leih a cipya.
17 Tuhcite ccangvae hae seinaw tuh Bawipaw muihnaw kya myaryamaw ale; pawccecize minmin nynh Bawipaw kalan pyapaw uccaw hae kha a theihrya hae.
Shiloh Khua e Imuapaw Samuel
18 Imuapaw Samuel tuh laaw te kuakuhpaw ranpibawi angki kha kikute Bawipaw malang rya a lah.
19 A nung nynh angkiccua adihpaw kha leih huipah zah, kum takyhte raepaw silawnaw kha rae khylan a vawpaw ryte a ccia vae hae ze, tuh-e tuh kum takyhte leih a ccyngpya.
20 Te Eli nynh Elkanah te a zu kha hythua leih pya hae zah, “E nopinung nynh Bawipaw kalan a pyapaw lasung hanpaw hynh, Bawipaw nynh e nopinung kyahin ccaaw ae pyaru vae sah,” a cipya; tukoute mih inn lang leih a ki hae.
21 Te Bawipaw nynh Hannah kha hythua a pya, aning nynh ccaawpoi zah ccapaw lu thum te ccanung lu ning a saah. Imuapaw Samuel tuh Bawipaw malang khe a lethung.
Eli Innbyn kha Profehbya Honuanaw
22 Eli tuh myarya taw vae. A ccapaw hae nynh Israel hae balyn kya a cyisahnaw hae te tungkunaw bu thuakaw kya ryalah hae paw nopi hae ryte a ikheih hae paw kha a paaw nynh marya a thae.
23 Aning nynh minmin kha, “Hynhcihawpaw uccaw hae hynh pawccemou na cyi oh? Ahoy leipaw na cyi oh paw kha ccungccaw balyn kyate phe ka thae.
24 Ka ccapaw hae, hynhte cyih nan oh; Bawipaw ccungccaw hae nynh pong zeihsakuh hae zah ka thaepaw bya tuh bya hoypaw thua khyh.
25 Lu kheit nynh ccangpaw lu kheit tungvaw a sei lanze, lukhakheit nynh Pachia kalan miseipaw hanlan ccawkunaw a raepah kho; thuasalama lukhakheit nynh Bawipaw tungvaw a sei lanze, hum nynh mou ccawkunaw a raepah vae cih?” a ci. Thuasalama mih paaw bya kha ngae khyh hae; pawccecize minmin chia lanpaw kha Bawipaw rynaw nynh thua.
26 Imuapaw Samuel tuh a pynrua lethung zah, Bawipaw malang te ccungccaw malang maehoynaw houhouh a mue.Ref 2.26: Luk 2.52
27 Pachia ccungccapaw nynh Eli kalan yn thua zah, “Bawipaw nynh hynhte a ho, ‘Izip ram, Faro kuihkaw see lang a tang lya hae ze, na minpaaw a innbyn hae kya ka langpyaku hae.
28 Aning kha ka ranpibawi lang tang lan, ka silawhang kalan kae lan, mynkhuhpaw u lan te ka malang khe ranpibawi angki kiku lan Israel phin hae balyn kyate ka po; te Israel ccungccaw hae nynh maee te u hae paw ka kya-e pyapaw uccaw hae balyn kha na minpaaw a innbyn hae kalan ka pya hae.Ref 2.28: Exo 28.1-4; Lev 7.35-36
29 Tuhte mang athua pite, pawccemou kaw ka pya hae thyhte yn pya hae paw ka kya-e silawnawpaw hae te pyapaw uccaw hae kha karankunaw mit te dote, ka ccungccaw Israel hae nynh yn pya hae paw miakaw kya-e ahoy huaccepaw khate na thosah hae zah, kae laeze na ccapaw hae kha saw na tuahua hae?’ a ci.
30 Tukeiccuze Bawipaw , Israel Pachia nynh a hopaw tuh: ‘Na innbyn hae te na minpaaw innbyn hae nynh ka malang khe zungzaete a tee a pou cih hae,’ a ci; thuasalama Bawipaw nynh atu a hopaw tuh: ‘Tuh-e bya tuh kae te sawkuh ccavae sah; pawccecize saw yn tua hae paw tuh saw ka tua cih hae zah, yn theihrya hae paw tuh theihryanaw a ccou cih hae.
31 Dotua, na innbyn kya phe taw lan a hiinpaw lu kheit san a um khyh nawlan, na thawzung te na minpaaw innbyn thawzung kha ka vua ccyh tuh yn thua cih.
32 Tetuh Israel hae tungvaw pya athua cih paw hoirumnaw balyn kha lungriathaete karankunaw mit te na do cih; na innbyn kyaze phe taw lan a hiinpaw lu kheit san um lan khyh.
33 Ka silawhang kyate ka vua lei lanpaw na innbyn kya-e lu kheit kyalyapaw tuh na mitmohsah khylan te na lungriathaesah khylan haang athua cih; na innbyn hae balyn tuh thaloi te a chih cih hae.
34 Na ccapaw hae lu ning Hofni te Finehas tungvaw yn thua cih paw hynh nang na hanlan muihsahnaw athua cih—parouh mawte nin kheit lungkhu a chih cih hae.Ref 2.34: 1Sa 4.11
35 Ka thinlung te ka tuanaw kya a um thyhte a cyih cih paw, alungzipaw ranpibawi lu kheit kha kamaw hanlan ka langsakuh cih; amaw hanlan atynpaw inn kha ka sakpah cih zah, chitui thuh athuapaw ka ccungccaw malang khe aning nynh a tee a pou zungzae cih.
36 Na ciihan kya-e a laehypaw miakaw nynh ngunphua phe kheit thuasah, sanlou phe kheit thuasah ngiaku khylan amaw kalan oun cceih cih hae zah, Sanlou beihtaraw ka aebua ccaw, ranpibawi te asekuhpaw ryalaw hankhakheit kya beih yn nungbua, cite a hopah cih hae,’ a ci,” cite a hopya.