26
David nynh Saul kha Bua A Haang
1 Zif khuaccaaw hae tuh Gibeah khua umpaw Saul kalan oun thua hae zah, “David tuh Jeshimon te a hawiliakuh hae paw Hakhilah mua kya a rekuh,” a cipya hae.Ref 26.1: Sam 54 (Abyalu)
2 Tukeiccuze Saul tuh thokuh zah Israel ccungccaw popaw milu thong thum kha hoeikute Zif Ramkaw kya David kha ccung khylan Zif Ramkaw lang a cceihbung.
3 Saul tuh Jeshimon te a hawiliakuh hae paw Hakhilah mua vawlan, laanpi pe khe a rya. David tuh ramkaw kya a um; Saul nynh ramkaw lang yn deehui vae cipaw he a nyh te,
4 David nynh dophitu hae kha saw hae zah, Saul tuh yn thua ccaccing cipaw a ny.
5 Tetuh David tuh cceih zah Saul a ryanaw hmin kya a thua; David nynh Saul te a rhawbawipaw Abner, Ner ccapaw nynh a inaw hae hmin kha a muih. Saul tuh ryahmin lungkhu khe ih zah, a rhawkaw hae tuh a pepan po voilu lan a ih hae.
6 David nynh Hit ccungccaw Ahimelek te Zeruiah ccapaw Abishai, Joab neitaw kyakhe, “Ryahmin lungkhu lang, Saul kalan hummou yn zui cih?” cite khia hae zah, Abishai nynh, “Kamaw kae zui cih,” a cipya.
7 Tukeiccuze David te Abishai tuh khuazi khe rhawkaw hae kalan a cceih hae; tuin kyakhe Saul tuh ryahmin lungkhu la ih zah, a ccoi tuh a lu pe laekhu kya a la bing; Abner te rhawkaw hae tuh a pepan po voilu lan a ih hae.
8 Abishai nynh David kha, “Pachia nynh na rhawpaw kha na kuih kalan atunin ae pya vae; tukeiccuze aning hynh laephi kya phang bingkuh lan, ccoi te vae kheit kyalya kae thuing; vae ning ka thuing lan khyh,” a cipya.
9 Thuasalama David nynh Abishai kha, “Aning kha roh nan; pawccecize Bawipaw nynh chitui thuhpaw ccungccaw kha a kuih a hangnua paw tuh sei leite a um cih zawtou?” a cipya.
10 David nynh, “Bawipaw tuh a hiin thyhte, Bawipaw nynh amaw kha a theih cih; tuhkhyhze a chi nin tuh yn thua mamin cih; tuhkhyhze rhawtuknaw lang a cceih cih zah a chih cih.
11 Bawipaw nynh chitui thuhpaw tungvaw kya ka kuih hangnua lanpaw tuh Bawipaw nynh yn khee vae sah; thuasalama a lu pe umpaw ccoi te tui-ung kha lah lah, cceih ccavae sih,” a cipya.Ref 26.11: 1Sa 24.6
12 Tukeiccuze David nynh Saul a lu pe umpaw ccoi te tui-ung kha lah zah, a cceih hae. Tuh-e tuh humhung nynh mah muih khyh zah nyh khyh, humhung mah a inaw kyate thaekuh khyh; pawccecize Bawipaw nynh thuhbabi lan a isah hae keiccuze mih balynte marya a ih hae.
13 Tetuh David tuh accya khuraw langkhe cceih zah, asawnaw e mua dung khe thadyn zah, minmin laku tuh myarya asawkuh.
14 David nynh rhawkaw hae te Ner ccapaw Abner kha ko hae zah, “Abner! Bya nae khungru lan khyh tou?” a cipya. Te Abner nynh, “Siapharan a kopaw tuh hummou na thua?” cite a khung.
15 David nynh Abner kha, “Pise na thua khyh tou? Israel hae kya nang ae lopaw hummou a um? Tuhte athua lanze, na bawipaw siapharan kha pawccemou na ngaw khyh? Pawccecize ccungccaw lu kheit nynh na bawipaw siapharan kha chia khylan a teenua.
16 Rya na lawpaw hoy khyh. Bawipaw tuh a hiin thyhte, Bawipaw nynh chitui thuhpaw, na bawipaw kha na ngaw khyh keiccuze nang tuh chi lan na ccan. Atu dotua, siapharan lu pe umpaw a ccoi te tui-ung kha teimou a um vae hae?” a cipya.
17 Saul nynh David roi kha syntaw zah, “Ka ccapaw David, tuh-e tuh namaw roi athua tou?” a cipya. David nynh, “Pou siapharan, ka bawipaw, kamaw roi nynh thua,” a cipya.
18 Te David nynh, “Ka bawipaw nynh na ryalahtu hynh pawccemou palei nae deehui? Paw ka cyi keiccu mou? Ka kuih kya paw seinaw mou a um?
19 Tukeiccuze ka bawipaw siapharan nynh na ryalahtupaw ka bya hynh yn ngaepya tua. Kae hynh dou lan nang ae tuhoupaw tuh Bawipaw athua ze, silawnaw kha la ccou vae sah; thuasalama ccungccaw athua ze, minmin tuh Bawipaw malang thyalawnaw mue vae hae sah, pawccecize minmin nynh, ‘Cceih, ccangpaw pachia hae kha la beik hae,’ cite yn hopah hae zah, Bawipaw rho laephi kya ka umbua khyh nawlan atunin yn dee hae.
20 Tukeiccuze ka chii hynh Bawipaw a um leinaw, laephi kalan lua nan sah; pawccecize ccungccaw nynh vamyng sa kheit kha mua vawlan a ccung hawte, Israel siapharan tuh uili ccangkheit kha ccung khylan yn pou vae,” a ci.
21 Tetuh Saul nynh, “Ka sei vae; ka ccapaw David, yn ki, ka hiinnaw hynh atunin na malang a phute keiccuze vawsawnaw papin kae pya vae lan khyh; kae tuh ka ngaee zah myarya ka cyisei vae,” a cipya.
22 David nynh, “Pou siapharan, hein kya ccoi kha mang um! Ccangvae lu kheit nynh yn cceih sah lah, yn lah sah.
23 Bawipaw nynh ccungccaw miakaw kha a dingnaw hanlan te a lungzinaw hanlan lasung a pya kalang hae; pawccecize Bawipaw nynh nang kha ka kuih lungkhu lang atunin yn pya, thuasalama Bawipaw nynh chitui thuhpaw kha ka kuih ka hangnua khyh.
24 Atunin na hiinnaw tuh ka malang a phute thyhte, ka hiinnaw hynh Bawipaw malang a phute sah lah, vawsawnaw balyn kyate yn luesah vae sah,” a cipya.
25 Tetuh Saul nynh David kha, “Ka ccapaw David, na tungvaw hythuanaw um vae sah! Ryalaw patae na lah cih zah, na ryalaw kya na laan na sui a ua cih,” a cipya. Tukoute David tuh a cceih vae, Saul tuh a umnaw lang a ki.