25
Samuel Chinaw
1 Samuel he chih tuh, Israel hae balyn tuh sueluakuh hae zah a rah hae, te Ramah khua e a inn kyakhe a uu hae.
Te David tuh thokuh zah Paran ramkaw langkhe a cceih.
David te Nabal Zu
2 Maon kyakhe ccungccapaw lu kheit um zah a hoirumnaw tuh Karmel khua kya nynh a um. Tuh-e paw tuh myarya a hoirum; tuu thong thum te miaa thong kheit a hoi. Karmel khua khe a tuu hae ming kha a ngo hae.
3 Tuh-e paw min tuh Nabal cikuh zah, a zu min tuh Abigail acikuh. Tuh-e nopinung tuh a hawpaw te a puithyapaw nynh thua, thuasalama pisepaw tuh a rysawthahpaw te a ozia thahpaw nynh thua; aning tuh Kaleb phin nynh thua.
4 Nabal tuh a tuuming a ngo cciamang cipaw kha David nynh ramkaw khe a thae.
5 Tukeiccuze David nynh ccangvae lu haw kha a saw hae; David nynh ccangvae hae kyakhe, “Karmel khua lang, Nabal kalan la cceih oh lah, ka min te bya la beih oh.
6 Hynhcite sawtuate na la hopah cih oh: ‘Na tungvaw daenaw um sah, na innbyn tungvaw daenaw um sah lah, na hoipaw balyn tungvaw kya daenaw um vae sah.
7 Nang tuh tuuming ngotu hae na hoi cite ka thae; atu na tuurin hae tuh kae kya um hae zah, vawsawnaw kae pya khyh hae, Karmel khua kya a um lungkhu hae balyn, mih uccaw pawpaw mah zo khyh.
8 Na ccangvae hae kha khia hae lah, ae hopah cih hae. Tukeiccuze ka ccangvae hae tuh na malang maehoynaw mue vae hae sah; kaening tuh poi tua nin kya nynh kae thua. Na kuih kya a umpaw miakaw kha na ryalahtu hae te na ccapaw David kalan beih oun pya,’ na la cipah cih oh,” a cipya hae.
9 David ccangvae hae he a thua hae te, tuh-e balyn tuh David min te Nabal kha a hopya hae; te minmin nynh a ngaw hae.
10 Thuasalama Nabal nynh David a ryalahtu hae kyakhe, “David tuh hummou athua? Jesse ccapaw tuh hummou athua? Atu she lya tuh mih bawi hae kyate a ccue hae paw ryalahtu patae a um hae.
11 Ka tuuming ngotu hae elang ka chiapaw saw te ka sanlou te ka tui kha lawpyate, tei kyate oun thua hae paw cipaw ka ny leipaw ccungccaw hae kha ka pya cih hae tou?” a cipya hae.
12 Tukeiccuze David a ccangvae hae tuh maeleihkute ki hae zah, tuh-e balyn tuh David kha a hopya hae.
13 David nynh a ccungccaw hae kha, “Ccungccaw miakaw nynh a thaloi kha a cce kya kekuh sah!” a cipya hae. Te mih balynte mih thaloi kha ccarou a keku hae; David mah a thaloi a kekuh bua; te milu za pali tuh David nulang zuikuh hae zah, milu za ning tuh mih uccaw kha a ngaw hae.
14 Ccangvaepaw lu kheit nynh Nabal zu Abigail kalan cceih zah, “David nynh ah bawipaw kha byabeih khylan locceihtu hae kha ramkaw kyate oun saw hae zah, aning nynh minmin kha saryate a sianua hae.
15 Tuhzemah minmin tuh kae tungvaw myarya hoy hae zah, vawsawnaw kae teing khyh, ramkaw kya kae um zah minmin ryte kae umkheih lungkhu balyn, pawpaw uccaw mah papin zo khyh;
16 tuu kae rin zah minmin ryte kae umkheih lungkhu balyn, khuazi khuadae oun thungkhaw hae.
17 Tukeiccuze atu hynh-e hynh nyh lah, na cyi lanpaw kha tuaku tua; pawccecize kae bawipaw te a innbyn balyn tungvaw kya hoyleinaw rae lanpaw kha byapae athua vae; aning tuh humhung nynh mah bya hopya kho lei lan ciate ccungccathya athua,” a cipya.
18 Tetuh Abigail nynh rangsakuh zah sanlou za ning, misutui kha savingtui-ung ccangning, avoi ty vae paw tuu sa pangaw saw, thoupaw ccathae kha ccathae tounawpaw te kaw pangaw, misu thae aroupaw nge za kheit te thaeku thae aphe za ning kha lah zah, lann hae tungvaw a khang,
19 te a ccangvae hae kha, “Ka malang la cceih oh; kae tuh nae nulang te kae cceih cih,” a cipya hae. Thuasalama a vawpaw Nabal kha hopah khyh.
20 Lann kha ccikuh zah mua aleihpaw kya a rungbung lyakhe, David te a ccungccaw hae tuh a kalan oun rungbung hae zah a tungkuh hae.
21 A tungku maw hae khe, David nynh, “Aning nynh a hoipaw balyn kha ccangkheit san azo khyh nawlan, hynh-e paw nynh ramkaw kya a hoipaw balyn kha alakaw lan nynh ka la rinpya ccaccing; aning nynh ahoypaw kha athahpaw te yn liaru.
22 Awkhualan khua he dae te, Nabal te asekuh hae paw balyn kya-e pise lu kheit kha chia leite ka cciataw ze, tuhmaminte thuasah, tuhlaeze mah thuasah Pachia nynh David tungvaw cyih vae sah,” cite a la ho vae.
23 Abigail nynh David kha a muih tuh, lann tungvaw te arangte rung zah, David malang khe laekhu kya a bakhung.
24 A cculeihpaw khe bakhung zah, “Ka bawipaw, seinaw tuh ka makhae tungvaw kya um vae sah; na ryalahtunung nynh na nakaring kya beih kae hopah sah lah, na ryalahtunung bya hynh beih yn ngaepya tua.
25 Ka bawipaw, hynh-e ccungccaw hoyleipaw Nabal bya hynh beih ccuinpah nan; pawccecize aning tuh a min a um hawte nynh athua; a min tuh Nabal cikuh zah amaw kya ngaeenaw a um; thuasalama na ryalahtunung kae tuh ka bawipaw nang nynh nae saw hae paw na ccangvae hae kha ka muih khyh hae.
26 “Te atu tuh ka bawipaw, Bawipaw tuh a hiin thyhte, nang mah na hiin thyhte, ccungccaw chiapaw seinaw kyate thuasah, namaw kuih ccaccei te phulawnaw raenaw kyate thuasah Bawipaw nynh nang kha ae khee keiccuze, na rhaw hae te ka bawipaw tungvaw kya hoyleinaw rae lan a zuakuh hae paw tuh Nabal hawte thua vae hae sah.
27 Atu na ryalahtunung nynh ka bawipaw kalan kae ccyngpyapaw hynh-e lasung hynh ka bawipaw ae zui hae paw ccangvae hae kalan pya thua sah.
28 Na ryalahtunung ka seinaw hynh beih yn ngaethya; pawccecize ka bawipaw nynh Bawipaw a rhawpaw kha na tuk keiccuze, Bawipaw nynh ka bawipaw nang tuh atynpaw inn kha ae sakpah cih; na hiin lungkhu balyn na tungvaw kya hoyleinaw kha muih thua lan khyh.
29 Lukhakheit nynh nang kha deehui lan te chia khylan ae thonuaku ze, ka bawipaw hiinnaw tuh Bawipaw na Pachia do-oihnaw lungkhu a umpaw hiinnaw sungkua lungkhu khe tungbia athua cih; thuasalama na rhaw hae kha tuh henuanawpaw zae kyate a toikuhpaw hawte a toisakuh cih hae.
30 Bawipaw nynh namaw konglang a ho vae paw hoynaw balyn kha na tungvaw kya rae zah, Israel uktu bawi lang he ae nung te,
31 akonglang um leite chiise luasahnaw kong thuasah, namaw ccaccei nynh phulawnaw kong thuasah, ka bawipaw nang tuh ngaethyanaw te namaw toulou seisakunaw um lan khyh. Bawipaw nynh ka bawipaw tungvaw kya hoynaw he a rae te, na ryalahtunung hynh yn ning nan vae ii,” a cipya.
32 David nynh Abigail kha, “Atunin kae te tungku khylan ae sawtupaw Bawipaw , Israel Pachia tuh thehoyte um sah!
33 Ahoypaw na tuanaw kya hythuanaw um vae sah, chiise luasahnaw kyate thuasah, kamaw kuih ccaccei te phulawnaw kyate thuasah atunin yn kheetu namaw kya mah hythuanaw um vae sah!
34 Thanccingte nang kha vawsawnaw pyanaw kyate yn kheetu Bawipaw , Israel Pachia tuh a hiin thyhte, kae te tungku khylan arangte nae ccia khyh ze, awkhualan awkhua tuh Nabal ccungccaw pise lu kheit san hiin vae lan khyh,” a cipya.
35 Abigail nynh a ccyngpyapaw lasung kha a kuih kyate David nynh lawpakuh zah, “Na inn lang lungdaete la cceih; dotua, na bya kha kae ngaepah zah, nae ngiapaw kha kae pya vae,” a cipya.
36 Abigail tuh Nabal kya a thua; aning nynh siapharan poi tahawpaw poi kha a inn kya a la tua. Nabal tuh myarya a rui keiccuze lungpawte a um; tukeiccuze khua adae mawlaezung pawpaw mah hopah khyh.
37 Awkhualan awkhua, Nabal tuh misutui a ruipaw he a ccite, tuh-e konglang kha a zu nynh hopah zah, a thinlung tuh chih zah aning tuh lung hawte nynh athua vae.
38 Nin haw loukaw aro koute Bawipaw nynh Nabal kha detah zah a chih.
39 Nabal a chih vae cipaw kha David nynh he a thae te, “Nabal nynh yn saryanawpaw byathan kha bya yn piapah zah, a ryalahtu kha hoyleinaw kyate yn thungkhawtu Bawipaw tuh thehoyte um sah; Nabal nynh a raepaw hoyleinaw kha amaw vawlan khe Bawipaw nynh a ccawsah vae,” a ci. Te David nynh ccungccaw saw hae zah Abigail kha a zu lang a soihbiasah hae.
40 David a ryalahtu hae tuh Karmel kya umpaw Abigail kya he a thua hae te, “David nynh a zu lang ko lan kaening hynh na kalan oun saw,” a cipya hae.
41 Abigail nynh thokuh zah laekhu kya bakhung zah, “Kae tuh ka bawipaw a ryalahtu hae ccu kha a singpaw seenung nynh ka thua,” a cipya hae.
42 Abigail tuh arangte thokuh zah lann tungvaw a ccikuh; a ryalahtu nopi hae lu pangaw nynh amaw kha a do-oih hae. Abigail tuh David a locceihtu hae kya zuikuh bua zah David zu lang a tang.
43 David nynh Jezreel khuanung Ahinoam kha mah zu lang a umkhae; parouh mawte a zu lang a tang hae.
44 Saul nynh David zu athuapaw a ccanung Mikhal kha Gallim khuapaw Laish ccapaw Palti kalan zu lang phe a la pya vae.Ref 25.44: 2Sa 3.14-16