12
Samuel nynh Bya A Hopya hae
1 Samuel nynh Israel hae balyn kyakhe, “Nae hopya oh paw balyn kha kae ngaepah oh zah siapharan kha kae khangpya vae oh.
2 Dotua oh, atu tuh siapharan nynh ae cciakhae vae cih oh; kae tuh ka taw vae zah ka sang mah apaw vae, ka ccapaw hae tuh nae kya a um hae. Ka di lyate atunin cia kae cciakhae vae oh.
3 Hein kya mang ka umphia hynh; Bawipaw malang te chitui thuh athuapaw malang kya ccaekiakhanku tua oh. Ahum tangnuapaw mou ka law boi? Ahum lann mou ka law boi? Hummou ka ling boi? Hummou ka tuaa ka sah boi? Ka mit kha mohsaku khylan hum kuih kya-e mou pyaruh kha ka lawku boi? Ka lawkupaw a la um lanze, kae pyaru cih oh,” a cipya hae.
4 Minmin nynh, “Kaening hynh nae ling khyh, na tuaasah khyh, humhung kuih kya-e uccaw mah na lah khyh,” a cipya hae.
5 Samuel nynh minmin kha, “Ka kuih kya pawpaw mah na muih khyh oh paw kong kya Bawipaw tuh nae malang ccaekia thua zah, chitui thuh athuapaw ccungccaw tuh atunin ccaekia nynh thua,” a cipya hae. Te minmin nynh, “Bawipaw tuh ccaekia nynh thua,” a ci hae.
6 Samuel nynh ccungccaw hae kyakhe, “Moses te Aaron kha ryalaw pya hae zah nae minpaaw hae kha Izip ram kyate a poukhae hae paw Bawipaw tuh ccaekia nynh thua.Ref 12.6: Exo 6.26
7 Nanning te nae minpaaw hae hanlan Bawipaw nynh khumnaw rya a lawpaw balyn kha kae hopah cih oh, tukeiccuze atu Bawipaw malang bya kae pia ccaw oh thadyn oh.
8 Jakob nynh Izip ram thua zah Izip hae nynh minmin kha he a tuaa a sah hae tuh, nae minpaaw hae nynh Bawipaw kalan sia hae zah Bawipaw nynh Moses te Aaron kha a saw hae, minmin nynh nae minpaaw hae kha Izip ram kyate poukhae hae zah, e hmin kya a umsah hae.Ref 12.8: Exo 2.23
9 Thuasalama Bawipaw mih Pachia kha a ning hae; te aning nynh minmin kha Hazor siapharan Jabin a rhawbawipaw Sisera kuih kalan thuasah, Filistin hae kuih kalan thuasah, Moab siapharan kuih kalan thuasah a zua hae; rhaw hae nynh minmin kha a tuk hae.Ref 12.9: Bpt 3.12, 4.2, 13.1
10 Te minmin nynh Bawipaw kalan sia hae zah, ‘Bawipaw kha kae vua zah Baal pachia hae te Astartes pachia hae kha rya kae lawpya keiccuze kae sei vae; thuasalama atu kae rhaw hae kuih kyate oun luesah lah, nang kha kae beik cih,’ a ci hae.Ref 12.10: Bpt 10.10-15
11 Te Bawipaw nynh Jerubbaal, Barak, Jefthah te Samuel kha saw hae zah, nae pepan e nae rhaw hae kuih kyate ae luesah oh zah, khyndadyh lan na um oh.Ref 12.11: 1Sa 3.20; Bpt 4.6, 7.1, 11.29
12 Ammon hae siapharan Nahash nynh nanning rawsete ae ccianua oh paw kha he na nyh oh te, Bawipaw nae Pachia tuh nae siapharan lang mang a tang pite, kae kha, ‘Thua khyh, siapharan nynh oun uk sah,’ cite nae hopya oh.Ref 12.12: 1Sa 8.19
13 Dotua oh, na poku oh paw te na ngia oh paw siapharan tuh hein kya a um vae; dotua oh, Bawipaw nynh nae hanlan siapharan ae nungpya vae oh.
14 Bawipaw kha na rih oh zah amaw rya kha lawpyate, a bya kha mah ngaete, Bawipaw kawbya kha rawse leite, nanning te ae uk oh paw siapharan nynh Bawipaw nae Pachia kha na zui oh lanze ahoy cih.
15 Thuasalama Bawipaw bya kha ngae leite, Bawipaw kawbya kha na rawse oh ze, Bawipaw kuih nynh nanning te nae siapharan kha ae rawse cih oh.
16 Tukeiccuze atu phang thadyn oh lah, Bawipaw nynh nae muihnaw kya a cyih cih paw hynh-e alesaepaw uccaw hynh dotua oh.
17 Atunin hynh chanvuih rue ccyh thua khyh khaw? Kholungthyhsah zah khuaa a rawsah nawlan, Bawipaw kha ka ko cih; nae hanlan siapharan ngiakute Bawipaw malang na rae oh paw hoyleinaw tuh myarya ale cipaw kha na nyh cih oh zah na muih cih oh,” a cipya hae.
18 Tukeiccuze Samuel nynh Bawipaw kha ko zah tuin nin khe Bawipaw nynh kholungthyhsah zah khuaa a rawsah; te ccungccaw balyn nynh Bawipaw te Samuel kha myarya a rih hae.
19 Ccungccaw balyn nynh Samuel kha, “Na see hae kaening hynh kae chi khyh nawlan, Bawipaw na Pachia kalan saw beih oun sangpah; pawccecize kae seinaw balyn vawlan khe kaemaw elang siapharan ngiakupaw hoyleinaw kha kae biachih vae,” a cipya hae.
20 Te Samuel nynh ccungccaw hae kha, “Rih nan oh; e hoyleinaw balyn hynh na rae vae oh, tuhzemah Bawipaw zuinaw kyate ccanglang maeku leite, nae thinlung balyn te Bawipaw rya kha lah oh;
21 a thane leipaw te a khum kho leipaw, amia um leipaw uccaw hae nulang zuikuh sei nan oh, pawccecize khah-e hae tuh ccungkia leipaw nynh thua hae.
22 Alesaepaw a min keiccuze Bawipaw nynh a ccungccaw hae kha vua lan khyh hae, pawccecize nanning kha amaw ccungccaw lang raeku lanpaw kha Bawipaw lungry nynh thua.
23 Tuhpiaze nae hanlan sawsang leite ka uk keiccuze Bawipaw tungvaw ka sei lanpaw tuh ka kyate sawkuh sah. Akyhpaw te adingpaw laanpi kha kae ccangpah cih oh.
24 Bawipaw kha rih oh lah, nae thinlung balyn te lungzite a rya kha lah oh; pawccecize nae hanlan ryalaw lepaw a lawpaw kha tua oh.
25 Thuasalama hoyleinaw kha na rae ung oh zetuh, naemaw te nae siapharan kha parouh mawte ae maemih cih oh,” a cipya hae.