11
Saul nynh Ammon hae Taenaw
1 Sawpaw sah kheit aro koute, Ammon minphuinpaw Nahash nynh cceihthung zah Jabesh-gilead khua kha a koihlu; te Jabesh khuaccaaw hae balyn nynh Nahash kha, “Kaening te nawccawkheihnaw rae lah, na rya kae lawpah cih,” a cipya hae.
2 Thuasalama Ammon minphuinpaw Nahash nynh minmin kha, “Nae ranglang mit kae khoi oh zah, tuhcite Israel hae balyn tungvaw kya thethyanaw ka rae ze nynh, nanning ryte nawccawkheihnaw ka rae cih,” a cipya hae.
3 Jabesh khua e piccan hae nynh Nahash kha, “Kaening nynh Israel ram pynpi kalan locceihtu hae kha kae saw nawlan hae, nin sari cia ccyh oun pya hin. Kaening oun khum lanpaw lu kheit san a um khyh ze, namaw kalan kae apkuh cih,” a cipya hae.
4 Locceihtu hae nynh Saul khua Gibeah kya a thua hae te, tuh-e kong tuh ccungccaw hae kha he a thaesah hae tuh, ccungccaw balyn tuh thawte a rah hae.
5 Saul tuh tangnuapaw hae nulang zuikute loo langte yn thua; te Saul nynh, “Ccungccaw hae hynh pawccemou a raw hae?” a ci. Tukeiccuze Jabesh khuaccaaw hae thongpang kha a hopya hae.
6 Tuh-e thongpang he a thae te, Pachia muisaw tuh Saul tungvaw kya thungnaw te yn thua zah, myaryamaw a thinria.
7 Tangnua toi kheit kha lah zah zoihtatyh lan pong be zah locceihtu hae kuih khate Israel ram pynpi kalan ky hae zah, “Saul te Samuel nulang zuiku lan a pou ry leipaw miakaw tuh a tangnuapaw hae kha hynhcite cyipya athua cih!” cite a hosah pya hae. Tetuh ccungccaw hae tungvaw kya Bawipaw rawrinaw tuh yn thua zah, minmin tuh lungngingte oun pou hae.
8 Saul nynh Bezek khua kya he a pum hae tuh, Israel hae cciing thum, Judah hae thong sung sari acih hae.
9 Jabesh khua kyate oun thua hae paw locceihtu hae kyakhe, “Jabesh-gilead khuaccaaw hae kha, ‘Awkhualan, khuanin aso lyakhe luenaw na mue cih oh,’ cite la hopah oh,” a cipya hae. Locceihtu hae nynh cceih hae zah Jabesh khuaccaaw hae kha he a hopah hae tuh, mih lungtua.
10 Tukeiccuze Jabesh khuaccaaw hae nynh, “Awkhualan kya nae kalan kaemaw toulou kae apkuh cih zah, ahoy na ci oh hawte kae tungvaw na cyih cih oh,” a cipya hae.
11 Awkhualan khe Saul nynh ccungccaw hae kha phu thum lang a pum hae. Awkhualan awkhua takaw te ryahmin lungkhu lang tee hae zah khuanin aso lan cia, Ammon hae kha a bae hae; te a hiinhy hae paw kha lu ning te a umkheihthya lei lan hae, a phia hae.
12 Ccungccaw hae nynh Samuel kha, “ ‘Saul maesae nynh tou aening hynh oun uk cih?’ cite a hopaw kha hummou athua? Kae chia ccaw hae, kae kalan oun pya,” a cipya hae.
13 Thuasalama Saul nynh, “Atunin humhung kha mah chia thua lan khyh, pawccecize Bawipaw nynh Israel hae kya atunin luenaw a thuakhae vae,” a ci.
14 Samuel nynh ccungccaw hae kha, “Rang oh, Gilgal khua lang cceih oh sih lah, tuin kyakhe siapharan lang tangnaw kha thawsah thui oh sih,” a cipya hae.
15 Tukeiccuze ccungccaw balyn tuh Gilgal khua lang cceih hae zah, Gilgal khua kya Bawipaw malang khe Saul kha siapharan lang a khang hae. Tuin kyakhe Bawipaw kalan ccawkunaw silawnaw kha rae hae zah, Saul te Israel hae balyn tuh myaryamaw mih lungpaw.