4
Abraham Tousenaw
1 Tuhteze pynsaw lante ah minpaaw athuapaw Abraham kong hynh pawtemou ah ho cih oh?
2 Abraham tuh cyisahnaw liate thyaaccousah athua ze, pooku lanpaw a hoi, thuasalama Pachia malang pooku lanpaw hoi khyh.
3 Pawccecize Ccathyaa nynh pawtemou a ho? “Abraham nynh Pachia kha zyn zah, tuh-e a zynnaw tuh dingnaw lang riapya athua,” a ci.Ref 4.3: Gen 15.6; Gal 3.6
4 Ryalahpaw ccungccaw nynh a muepaw ryalaw mee kha lasung lang riapya thua khyh, tuh-e tuh atekuhpaw ryalaw mee nynh thua.
5 Rya mah lah khyh zah Pachia mah a nyh leipaw ccungccaw kha thyaa a ccousahtupaw Pachia kha a zynpaw tuh, tuh-e a zynnaw kha dingnaw lang riapya athua.
6 Tuhawte cyisahnaw um leite Pachia nynh miding lante a tuapaw ccungccapaw kya-e lungtuanaw kong kha David nynh a hopaw tuh:
7 “Mih hoyleinaw kha
ngaethya athua hae paw te
mih seinaw kha bongpya
athua hae paw tuh
lungtua hae paw nynh thua.Ref 4.7-8: Sam 32.1-2
8 Bawipaw nynh sei a be
leipaw ccungccaw tuh
lungtuapaw nynh thua,” a ci.
9 Tuhteze, hynh-e lungtuanaw tuh vingdung a awkuh hae paw hanlan kyalya tou athua? Tuhkhyhze vingdung a awkuh lei hae paw hanlan so thuabua khyh tou? Pawccecize Abraham hanlan zynnaw kha dingnaw lang riapya athua cite ah ho oh.
10 Tuhteze tuh-e tuh aning elang pawtemou riapya athua? Vingdung a awku maw tou, vingdung a awkuh koute tou? A awkuh koute riapyapaw thua khyh, a awku maw riapyapaw nynh thua.
11 Abraham nynh vingdung a awku mawze zynnaw liate a muepaw dingnaw tazeih athuapaw vingdungawkupaw syntawnaw kha a mue. Tuh-e tuh vingdungawku leite a zynpaw ccungccaw hae kha dingnaw lang riapya nawlan te Abraham tuh a zynpaw ccungccaw balyn paaw lang tang nawlan nynh thua.Ref 4.11: Gen 17.10
12 Tuhpiaze Abraham tuh vingdung a awkuh hae paw paaw lang tang khylan te vingdungawku kyalya thua leite ah minpaaw Abraham nynh vingdung a awku mawze a hoipaw zynnaw ccunoh a zui hae paw, vingdung a awkuh lei hae paw paaw lang mah tang khylan nynh thua.
Zynnaw liate Byakinpyakupaw Ccounaw
13 Pawccecize aning tuh laephi rhoccoutu athua cih cite Abraham kya te a ciihan hae kya yn thuapaw byakinpyakunaw tuh Kawbya liate thua khyh, zynnaw kya-e dingnaw liate nynh athua.Ref 4.13: Gen 17.4-6, 22.17-18; Gal 3.29
14 Pawccecize Kawbya a zui hae paw tuh rhoccoutu athua hae ze, zynnaw tuh alakaw vae, byakinpyakupaw mah ccungkia vae khyh.Ref 4.14: Gal 3.18
15 Pawccecize Kawbya nynh tuh thinrianaw kha a thuakhae; thuasalama kawbya um leinaw kya tuh cyiseinaw mah um khyh.
16 Tukeiccuze Pachia byakinpyakunaw tuh thawccinaw liate thua zah Abraham ciihan hae balyn hanlan aamahkhankute zynnaw kya a thadynpaw nynh thua; tuh-e byakinpyakunaw tuh Kawbya a zui hae paw hanlan kyalya thua leite, aening ah balyn paaw athuapaw Abraham hawte zynnaw a hoi hae paw hanlan mah athuabua.Ref 4.16: Gal 3.7
17 Ccathyaa kyaze, “Nang kha minphuin patae paaw lang kae rae vae,” cite azeiku hawte, Abaraham tuh amaw nynh a zynpaw Pachia, a chih hae paw kha hiinsah hae zah a um loh leipaw uccaw hae kha um lan kaw a pya khopaw tuh-e Pachia malang khe aening ah balyn paaw nynh thua.Ref 4.17: Gen 17.5
18 “Na ciihan hae tuh myarya a lung cih hae,” cite a hopyapaw bya thyhawte Abraham nynh kae tuh “minphuin patae paaw” lang ka tang cih cite ngaehoi lan accan lei pite zyn zah a ngaehoi.Ref 4.18: Gen 15.5
19 Aning tuh kum za kheit loukaw a ci vae zemah a pyn tuh michi hawte tuaku leite, a zu Sarah vue mah a tiin vae cite tua leite zynnaw kya a thawzya khyh.Ref 4.19: Gen 17.17
20 Pachia nynh bya a kinpyakupaw kha lunghiinnaw hoi leite, a zynnaw mah zyabung khyh, a zynnaw kya a thawsae zah Pachia kha phu-enaw a pya.
21 Pachia nynh bya a kinkupaw kha a ccingsah kho cite varyng a zyn.
22 Tukeiccuze a zynnaw kha dingnaw lang riapya athua.
23 Tuhte “riapya athua” cite Ccathyaa kya azeikuhpaw hynh Abraham elang kyalya thua khyh,
24 aening hanlan mah azeikuhpaw nynh thua. Ah Bawipaw Jesu kha chinaw kyate a thoosahtupaw Pachia kha aening nynh ah zyn oh ze tuh-e zynnaw tuh aening dingnaw lang riapya athua cih.
25 Bawipaw Jesu tuh aening seinaw keiccuze ccungccaw hae kalan ap hae zah, aening thyaaccounaw hanlan thoosahthui athua.Ref 4.25: Isa 53.4-5