3
1 Tuhteze, Judah ccungccaw thuanaw hynh pawmou athane? Tuhkhyhze vingdungawkunaw hynh amee um tou?
2 Aphuinphuin te thanenaw patae a um. Masaty lan Judah hae nynh Pachia kya-e bya kha a mue hae.
3 Minmin abang nynh mih lungzi khyh ze pawtemou athua cih? Mih lungzi leinaw nynh Pachia kya-e lungzinaw kha a roh kho cih tou?
4 Roh kho lan khyh! Ccathyaa kyaze,
“Na hopaw bya tuh hme zah
bya ae pia vae hae ze
nang tuh na tae,”
cite azeiku hawte, ccungccaw miakaw tuh ahynpaw thua hae salamah Pachia tuh ahmepaw nynh thua.Ref 3.4: Sam 51.4 (LXX)
5 Thuasalama aening ah dingleinaw oh nynh Pachia dingnaw kha a langsaku lanze, pawtemou ah ho cih oh? Pachia nynh aening tungvaw a thinria zah de oun tah vae ze, aning tuh ding khyh tou? (Ccungccaw phung te nynh ka ho.)
6 Tuhte thua khyh! Tuhte athua lanze Pachia nynh laephi hynh pawtemou bya a pia kho cih?
7 Pawccecize kae ka hynnaw liate Pachia byaccing nynh a phu-enaw kha houh a langsah ze, kae kha miseipaw lante pawccemou bya yn pia hae?
8 Pawccemou, “Ahoypaw a langku nawlan ahoy leipaw kha cyih oh sih,” cite ah ho khyh oh? Ccungccaw abang nynh kaening kha thethya oun ccousah ry hae pawte, tuhte na ho oh oun ci hae. Tuhte a hotu hae tuh seibe lan accan hae!
Adingpaw Hum Sanmah Um Khyh
9 Tuhteze pawtemou? Aening Judah hae tuh minmin laeze ah hoyhua oh tou? Ccapyh sanmah ah hoyhua khyh oh; pawccecize Judah hae te Zenta hae balyn tuh seinaw huhan zakaw nynh ah um oh cite langmaw phe kae langsaku vae.
10 Ccathyaa kyaze,
“Adingpaw hum san um khyh,
lu kheit sanmah um khyh,Ref 3.10-12: Sam 14.1-3 (LXX), 53.1-3 (LXX)
11 A thaethyapaw hum san um khyh,
Pachia kha a ccungpaw
hum san um khyh.
12 Ccungccaw balyn tuh
laanpi pong me vae hae,
mih balyn mawte
ccungkia vae khyh hae,
ahoypaw a cyihpaw
hum san um khyh,
lu kheit san um khyh.
13 Mih lotharue tuh
ahungkuhpaw shaw nynh thua,
mih lae kha hyn nawlan
a mang hae, mih munglae kyakhe
huparepaw sy a um.Ref 3.13: Sam 5.9 (LXX), 140.3
14 Mih khalang tuh
thyalawnaw bya te
bya khahpaw te nynh phe abia,Ref 3.14: Sam 10.7 (LXX)
15 Mih ccu tuh chii luasah lan
a thyrang;Ref 3.15-17: Isa 59.7-8
16 Mih ccianaw laanpi kya
ronaw te riathaenaw a um;
17 daenaw laanpi kha nyh khyh hae.
18 Mih mit kya
Pachia rawrinaw cipaw
kharouh um khyh,”
cite azeikuh.Ref 3.18: Sam 36.1
19 Kawbya nynh a hopaw miakaw tuh Kawbya zakaw a um hae paw hanlan nynh a ho cipaw ah ny oh, tuh-e tuh khalang miakaw nynh bya a ho ngan khyh nawlan te laephi pynpi hynh Pachia byapianaw malang a thadyn lanpaw nynh thua cipaw alangku nawlan nynh thua.
20 Tukeiccuze Kawbya zuinaw liate hum sanmah Pachia malang thyaaccou kho lan khyh; pawccecize Kawbya liate nynh seinaw kha nyku athua.Ref 3.20: Sam 143.2; Gal 2.16
Zynnaw liate Dingnaw
21 Thuasalama atu tuh Kawbya te asekuh leipaw Pachia kya-e dingnaw kha yn langkuh vae; tuh-e kong tuh Kawbya te Profeh hae bya nynh ccaekia a khan hae.
22 Tuh-e tuh Jesu Khri zynnaw liate a zynpaw balyn elang Pachia kya-e dingnaw nynh thua; laesahkunaw um vae khyh,Ref 3.22: Gal 2.16
23 pawccecize ccungccaw balyn tuh phe sei vae hae zah Pachia phu-enaw te a sawkuh vae hae;
24 minmin tuh Khri Jesu shawkhawnaw liate Pachia thawccinaw keiccuze alakawte thyaaccousah athua vae hae.
25 Pachia nynh Khri kha a chiise liate seingaethyanaw elang silawnawpaw lang a tangsah, tuh-e Khri tuh zynnaw liate seingaethyanaw mue athua, tuhcite Pachia nynh a dingnaw kha a langsaku; pawccecize Pachia nynh a ngaesangnaw liate langmawlya e raepaw ccungccaw seinaw kha a ngaethya,
26 atu vae tuh Pachia nynh amaw a dingnaw kha langsaku khylan te Jesu a zynpaw miakaw tuh thyaaccousah athuanaw kong kha langsaku khylan tuhcite a cyi.
27 Tuhteze pookunaw tuh pawlangmou a tang? Pookunaw tuh vua athua. Paw kawbya te mou vua athua? Cyisahnaw kawbya liate tou? Thua khyh, zynnaw kawbya liate nynh vua athua.
28 Pawccecize ccungccaw tuh Kawbya cyisahnaw um leite zynnaw liate nynh thyaaccou athua cipaw ah ny oh.
29 Pachia tuh Judah hae Pachia kyalya tou? Zenta hae Pachia so thuabua khyh tou? Athuabua, Zenta hae Pachia mah athuabua.
30 Vingdung a awkuhpaw te vingdung a awkuh leipaw parouh mawte zynnaw liate thyaa a ccousah cih hae paw tuh Pachia ccangkheit rou nynh a um.Ref 3.30: Deu 6.4; Gal 3.20
31 Tuhteze aening nynh zynnaw liate Kawbya tuh ah vua oh tou? Ah vua khyh oh, Kawbya kha ah tynsah oh paw nynh thua.