16
Lu Raveih Beihlangkunaw
1 Kenkhrea khua kya a umpaw khriccaawbuu kya ryalahtu athuapaw ah ccianung Fibi hynh nae kya nysah kae ry oh.
2 Mithyaa hae nynh cyi lan accan thyhte nanning nynh amaw kha Bawipaw min te leh la khan oh lah, bawm ahonaw miakaw kya la bawmbua oh; pawccecize aning tuh ccungccaw patae a bawmtu te kamaw mah yn bawmtu nynh thua.
3 Khri Jesu kya kae te rya kae lahkheih hae paw Prisilla te Akuila kha la beih oh,Ref 16.3: Loc 18.2
4 minmin tuh ka hiinnaw hanlan a chih ngan hae paw nynh thua; kae kyalya nynh thua leite Zenta khriccaawbuu hae balyn nynh mah minmin tungvaw kya mih lungtua.
5 Mih inn kya a pumkuh hae paw khriccaawbuu kha mah la beih oh. Asia ram kyaze Khri hanlan masaty zyntu athuapaw, ka sungsahpaw Epainetan kha la beih oh.
6 Nanning elang ryalaw myarya a zuakuhpaw Mary kha la beih oh.
7 Kae te thong kae ccahkheih hae paw, ka vaeccaw hae Andronikan te Junia kha la beih oh; minmin tuh locceihtu hae kyaze minthaan hae paw thua hae zah, kamaw laeze Khri kya a umty hae paw nynh thua.
8 Bawipaw kya ka sungsahpaw Ampliatas kha la beih oh.
9 Khri kya rya kae lahkheihtu Urbanas te ka sungsahpaw Stakhus kha la beih oh.
10 Khri kya a lungzipaw Apelen kha la beihlang oh. Aristobulas innbyn hae kha la beih oh.
11 Ka vaeccaw athuapaw Herodion kha la beih oh. Bawipaw kya um hae paw Narkissu innbyn hae kha la beih oh.
12 Bawipaw kya ryalahtu athua hae paw Trifana te Trifosa kha la beih oh. Bawipaw kya thawte ryalahpaw, sungsahpaw Persis kha la beih oh.
13 Bawipaw kya popaw Rufas te ka nung hawte athuapaw a nung kha la beih oh.Ref 16.13: Mar 15.21
14 Asinkritas, Flegon, Hermes, Patrobas, Hermas te minmin ryte a umkheih hae paw uteno hae kha la beih oh.
15 Filologas te Julia, Nereas te a ccianung, te Olimpas te minmin ryte a umkheih hae paw mithyaa hae balyn kha la beih oh.
16 Athyaapaw myngkunaw te lu kheit te lu kheit la beihkuh oh. Khri kya-e khriccaawbuu hae balyn nynh nanning kha ae beihlang oh.
17 Uteno hae, na ccangku vae oh paw ccangpyakunaw te arawsekuhpaw buu phianaw te cyiseinaw a pousahtu hae kha na raeringku nawlan oh kae ngia oh; minmin kha la sibia oh.
18 Pawccecize khahcihawpaw ccungccaw hae tuh ah Bawipaw Khri rya kha law leite mimaw vue hanlan nynh rya a lawku hae; ahoypaw bya te nawpalaepaw bya hae khate ccungccaw hoy hae paw thinlung kha leih a ling hae.
19 Pawccecize ccungccaw balyn nynh kaw na ngaenaw oh kha a ny vae hae keiccuze nae tungvaw ka lungtua; ahoypaw kya hawnaw na hoi nawlan oh te ahoy leipaw kya seinaw na hoi khyh nawlan oh ka ry.
20 Daenaw Pachia nynh aro mawze Satan kha nae ccu kaw kya yn miade cih. Ah Bawipaw Jesu Khri thawccinaw tuh nae kya la um sah. Amen.
21 Kae te rya kae lahkheihpaw Timote te ka vaeccaw hae Lusias, Jason te Sosipater nynh nanning kha ae beihlang oh.Ref 16.21: Loc 16.1
22 E ccaky a zeitupaw kae, Terti nynh Bawipaw kya nanning kha kae beihlang oh.
23 Kae te khriccaawbuu balyn kha innccong oun ua zah oun do-oihtu Kaias nynh nanning kha ae beihlang oh. Khuapi suaccytu Erastas te nae uno Kuartas nynh ae beihlang oh.
24 Ah Bawipaw Jesu Khri thawccinaw tuh nae balyn kya la um sah. Amen.Ref 16.23: Loc 19.29; 1Ko 1.14; 2 Tim 4.20
Athangnaw Sawsang
25 Ka hopaw thehoypaw te Jesu Khri kong phunghonaw thyhte thuasah, langmaw she lungkhu balyn thuruh thua salamah atu lya phy athua vae paw, byakhupaw kya-e byaphy thyhte thuasah, Pachia nynh nanning kha zynnaw kya thawzung ae tynsah kho oh,
26 thuasalama atu tuh zynnaw te asekuhpaw kawngaenaw a um nawlan, zungzae tynpaw Pachia kya-e kawpyanaw thyhte, profeh hae nynh a zei hae paw Ccathyaa hae liate, tuh-e byakhupaw tuh Zenta hae balyn kalan nysah athua vae;
27 amaw kyalya ahawpaw Pachia tuh Jesu Khri liate zungzae a phu-e sah. Amen.