15
1 Thawsae hae paw aening nynh thawzya hae paw kya-e thawzyanaw kha ngaesang aho; ahmaw rynaw kha ccungku lanpaw thua khyh.
2 Aening lu raveih nynh ah innpaw paw elang hoynaw kha tuate zynnaw kya a lethung nawlan a rynaw kha ccungpah oh sih.
3 Pawccecize Khri nynh heize amaw a rynaw kha ccungkuh khyh. Ccathyaa kyaze, “Nang ae saryatu hae nynh ae saryanaw hae paw bya tuh ka tungvaw accah vae,” cite azeiku hawte nynh athua.Ref 15.3: Sam 69.9
4 Pawccecize Ccathyaa kya a umpaw ngaesangnaw te thawpyanaw liate aening nynh ngaehoinaw ah hoi nawlan oh, Ccathyaa kya langmawlya e azeikuhpaw miakaw tuh aening thuiheinaw elang nynh zei athua.
5 Ngaesangnaw te thawpyanaw Pachia nynh Khri Jesu rynaw thyhte lu kheit te lu kheit lunglokute na um nawlan oh ae bawm vae oh sah.
6 Tuhteze nynh ah Bawipaw Jesu Khri a Paaw athuapaw Pachia kha nanning nynh lunglokute pynkheihlan roisawte na thehoysah cih oh.
7 Tukeiccuze Khri nynh nanning kha leh ae khan oh hawte nanning mah Pachia phu-enaw hanlan lu kheit te lu kheit lehkhankuh oh.
8 Pawccecize kae hopya ry oh paw tuh: Jesu Khri tuh minpaaw hae kalan pya athuapaw byakinpyakupaw hae kha ccingsah khylan Pachia byaccing kha langsaku lan vingdungawkuh hae paw kya-e ryalahtu lang a tang vae;
9 tuhpiaze Zenta hae nynh Pachia kha a ngaethyaumsahnaw hanlan phu-enaw a pya nawlan hae nynh thua. Ccathyaa kyaze,
“Tukeiccuze Zenta hae laku kya
kae thehoysah cih zah
na min thehoysahnaw hlaw kha
ka sah cih,” cite
azeiku hawte nynh thua.Ref 15.9: 2 Sam 22.50; Sam 18.49
10 “Pou Zenta hae,
a ccungccaw hae ryte
lungtuakheih oh,” cite bua a ho.Ref 15.10: Deu 32.43
11 “Zenta hae balyn,
Bawipaw kha thehoysah oh;
ccungccaw hae balyn,
amaw kha thehoysah oh,” bua a ci.Ref 15.11: Sam 117.1
12 Isaiah nynh,
“Jessi tharui tuh yn pou cih,
aning tuh Zenta hae uk khylan
yn langkuh cih paw nynh thua;
Zenta hae nynh amaw kha
a ngaehoikuh cih hae,” bua a ci.Ref 15.12: Isa 11.10 (LXX)
13 Nanning tuh Thyaa Muisaw thungnaw liate ngaehoinaw te phe na bia nawlan oh, ngaehoinaw Pachia nynh zynnaw kyate yn thuapaw lungtuanaw te daenaw phuinccing khate ae la biasah vae oh sah.
Paul nynh Rawhoyte Ccaw Kynaw
14 Ka uno hae, nanning tuh hoynaw te nynaw balyn khate phe na beih oh zah, lu kheit te lu kheit na thuiheikuh kho oh cipaw nanning konglang phe ka ny.
15 Tuhzemah nanning nynh bua na tuathui ccaw oh cite Pachia nynh yn pyapaw thawccinaw liate abang akonglang kyakhe rawhoyte nae kalan ccaw kae zei;
16 tuh-e a thawccinaw tuh kae hynh Pachia thehoypaw a hopaw ranpibawi ryalaw kya Zenta hae hanlan Jesu Khri a ryalahtu ka thuapaw hynh nynh thua; tuhteze nynh Zenta hae kya-e silawkunaw tuh Thyaa Muisaw liate athyaa cih zah douccahpaw athua cih.
17 Tukeiccuze Pachia hanlan rya ka lawnaw kya Jesu Khri liate ka pookunaw lanpaw a um.
18 Pawccecize Zenta hae nynh kaw a ngae nawlan hae, bya te cyisahnaw liate thuasah,
19 muihsahnaw hae te ngaeangnaw hae kya-e thungnaw liate thuasah, Pachia Muisaw thungnaw liate thuasah Khri nynh kae kha yn mang zah a cyipaw laelan, pawsang mah ka ho ngan khyh; tuhcite kae nynh Jerusalem kyate tho zah Ilyrikam ram pepan kyacia Khri thehoypaw kha phe ccing lan ka ho.
20 Ccangpaw ccungccaw nynh a bingpaw aleihpaw vawlan khe kae nynh ka sak khyh nawlan, Khri min a phy boi leinaw hae hmin kyakhe thehoypaw ho lan thawte ka zuaku.
21 Ccathyaa kyaze,
“Amaw konglang a hopya
lei hae paw nynh a muih cih hae zah,
amaw konglang
a thae boi lei hae paw nynh
a thaethya cih hae,”
cite azeiku hawte nynh thua.Ref 15.21: Isa 52.15 (LXX)
Rom lang Paebua lan Paul Paccynkunaw
22 Hynh-e keiccuze nae kalan ccia lan yn khawpaw patae a um.Ref 15.22: Rom 1.13
23 Thuasalama atu tuh hynh-e ram hae kya ryalawnaw hmin ka hoi vae khyh zah nae kalan ccia lan ka rynaw mah kum patae aro vae hawte,
24 Spain ram lang he ka cceih te, nae kalan kae cceih cih. Pawccecize khua ka ccongnaw kya nanning ryte muihku lan zah, lungpawte sosoh ah umkheih kou oh te, nanning nynh tuh-e ram lang bua nae saw cih oh cite ka ngaehoi.
25 Thuasalama atu tuh mithyaa hae bawmnawpaw uccaw hae ryte Jerusalem lang ka la cceih ung cih.Ref 15.25-26: 1Ko 16.1-4
26 Pawccecize Mesidonia ram e ccungccaw hae te Akhai ram e ccungccaw hae hynh Jerusalem kya um hae paw mithyaa hae laku e ryachi hae kha neethungbua hae zah mih lungrythuakhaekuh.
27 Tuhte a cyi hae paw kya mih lungrythua, minmin tuh Judah hae kya laebah a um ccaccing hae; pawccecize Zenta hae nynh Judah hae kya-e muisaw hythuanaw hae kha a ccoubua hae ze, pynsaw hythuanaw hae kya mah minmin nynh Judah hae kha a neethungbua hae aho.Ref 15.27: 1Ko 9.11
28 Tukeiccuze hynh-e rya hynh ka thangsah zah, a hlu hae paw hynh mih kalan ka ap kou hae te, Spain ram lang ka cceih cih zah nae kya kae teepaw cih.
29 Nae kya he kae thua te, Khri hythuanaw phe ccingpaw te kae thua cih cipaw ka ny.
30 Uteno hae, ah Bawipaw Jesu Khri te Thyaa Muisaw sungsahnaw liate nanning nynh kamaw ryte sawsangnaw kya na zuakuh oh zah, Pachia kalan ka hanlan saw nae sangpya nawlan oh kae ngia oh;
31 Judea ram kya-e zynleitu hae kuih kyate ka lue nawlan te Jerusalem khua hanlan rya ka lawpaw hynh mithyaa hae nynh yn lawpyaku nawlan hae saw yn la sangpah oh;
32 tuhteze nynh Pachia rynaw thyhte nae kalan lungpawte kae thua cih zah nanning liate thawzung thawpaw ka mue cih.
33 Daenaw Pachia tuh nanning balyn ryte la um sah. Amen.