12
Jesu kya Hiinnaw Thawpaw
1 Tukeiccuze uteno hae, Pachia kya-e ngaethyaumsahnaw liate kae ngia ry oh paw tuh, nae pyn kha athyaapaw te Pachia kalan douccahpaw ahiinpaw silawkunawpaw lante pyakuh oh; tuh-e tuh na cyi lan oh paw muisaw te asekuhpaw beiknaw nynh thua.
2 Nanning nynh hynh-e laephi muinsanke nan oh, thuasalama ahoypaw uccaw, ry lan umpaw uccaw te accingpaw uccaw cikuh hae paw—Pachia rynaw tuh pawmou athua cipaw na thaethya nawlan oh, nae thinlung kha thawsakute muinsan rulaekuh oh.
3 Pawccecize kae yn pyapaw thawccinaw liate nanning lu kheit cci kha kae hopya oh; nanning nynh naemaw te naemaw kha tuaku lan accanpaw laeze ahang lante la tuakuh nan oh, thuasalama Pachia nynh milu raveih oun pyapaw zynnaw tounawpaw thyhte angaekuh lante tuakuh oh.
4 Pawccecize aening nynh pyn pynkheit kya pyn kya-e hae patae ah hoi oh zah, tuh-e hae balyn tuh alokuhpaw ryalaw a hoi khyh hae hawte,Ref 12.4-5: 1Ko 12.12
5 patae ah cih oh paw aening mah Khri kya pyn pynkheit ah thua oh zah, lu raveihte pyn kya-e hae nynh ah thua oh.
6 Tuhte aening oun pyapaw thawccinaw thyhte alokuh leipaw lasung hae kha ah mue oh zah, profehbya honaw a muepaw nynh a zynnaw zeihte profehbya ho sah.Ref 12.6-8: 1Ko 12.4-11
7 Beiknaw rya a lahtu nynh beiknaw rya kha lah sah; a ccangpahtu nynh ccangpyanaw rya kha lah sah;
8 A hyytupaw nynh hyynaw rya kha lah sah, a pyatupaw nynh hysahnaw te pya sah; a uktupaw nynh zuakunaw te uk sah; ngaethyaumsahnaw a langsahtupaw nynh lungpawkaleihte langsah sah.
Khriccaaw Hiinzia
9 Sungsakunaw kya thyaruhnaw um nan sah. Ahoy leipaw kha hua oh lah, ahoypaw kha kyngkuh oh;
10 u te neitaw ccaccing hawte lu kheit te lu kheit sungsakuh oh; sawtuakunaw kya lu kheit te lu kheit sawtuakuh kalang oh.
11 Thawzung thuanaw kya thawnaw leite thinlung ccaccingte Bawipaw rya kha lah oh.
12 Ngaehoinaw kya nae lungpaw sah; vawsawnaw kya nae lungsae sah, sawsangnaw kya tyty tyn oh.
13 Mithyaa hae kha mih hobounaw kya la bawmbua oh; mikhia hae kha kou hoy lan la do-oih oh.
14 Vawsawnaw ae pya oh paw kha hythuapya oh; minmin kha hythuapya oh lah thyalaw nan oh.Ref 12.14: Mat 5.44; Luk 6.28
15 Lungtua hae paw ryte lungtuabua oh lah, a rah hae paw ryte la rahbua oh.
16 Lu kheit te lu kheit lunglokute la um oh. Lysaku nan oh, a nyaa hae paw ryte vaeccawtang oh. Ka haw cite tuakuh nan oh.Ref 12.16: Ptb 3.7
17 Humhung sanmah athahpaw hanlan athahpaw te liaru nan oh, ccungccaw balyn muihnaw kya ahoypaw uccaw tuanaw hoi oh.
18 Athua kho ze, ccungccaw hae balyn ryte ccawkute la um oh.
19 Sungsah hae paw, naemaw nynh kharouh liaru nan oh, Pachia thinrianaw kalan pya oh, pawccecize Ccathyaa kyaze, “Liarunaw tuh kamaw kya-e nynh thua, kamaw nynh ka liaru cih, cite Bawipaw nynh a ci,” cite azeikuh.Ref 12.19: Deu 32.35
20 Tukeiccuze, “Na rhawpaw kha a vuelaw ze looh la dang; a tuihaw ze nia lanpaw kha la pya; pawccecize tuhte na cyinaw liate nang nynh tuh-e paw lu vawlan maee-e hae kha na pumpah cih,” a ci.Ref 12.20: Ptb 25.21-22 (LXX)
21 Athahpaw kha la taesakuh nan oh, athahpaw kha ahoypaw te la tae oh.