11
Israel tungvaw Ngaethyaumsahnaw
1 Tuhteze bya ka khia rypaw tuh, Pachia nynh a ccungccaw hae kha a vua vae hae tou? Vua khyh hae! Pawccecize kae mah Israel ccungccaw, Abraham ciihan, Benjamin phin nynh ka thua.Ref 11.1: Phil 3.5
2 Pachia nynh a nyty vae paw a ccungccaw hae kha ccaring vua khyh hae. Elijah konglang Ccathyaa nynh a hopaw kha na nyh khyh oh tou? Aning nynh Israel hae te arawsekuh lante Pachia kalan ngia zah,
3 “Bawipaw, minmin nynh na profeh hae kha theih hae zah na silawhang hae kha a ro vae hae, ka makhae nynh ka laehy vae, ka hiinnaw kha yn ccung hae,” a cipya.Ref 11.3: 1Si 19.10, 14
4 Thuasalama Pachia nynh bya a khungpaw tuh: “Baal pachia malang ccukharutung lei hae paw ccungccaw thong sari kha kamaw hanlan phang ka haangkuh ung hae,” a cipya.Ref 11.4: 1Si 19.18
5 Tuhawte atu ccyh lya mah thawccinaw liate po athua hae paw a laehy ung hae.
6 Thawccinaw liate athua ze, cyisahnaw liate kharouh thua vae khyh; tuhkhyhze tuh thawccinaw tuh thawccinaw thua vae lan khyh.note11.6 Ccathyaa abang kya, ‘Cyisahnaw liate athua lanze thawccinaw liate thua vae khyh; athua lanze cyisahnaw tuh cyisahnaw thua vae khyh,’ cite a umbia.
7 Tuhteze pawtemou? Israel hae nynh a ccung hae paw kha mue khyh hae. Po hae paw nynh tuh-e tuh a mue hae; tuhlaepaw hae tuh mih lungkhung.
8 Ccathyaa kyaze,
“Pachia nynh minmin kha
rutatupaw thinlung,
ngawmuih kho leipaw
mit te nawthae kho leipaw
nakaring kha atunin cia
a pya hae,”
cite azeiku hawte nynh thua.Ref 11.8: Deu 29.4; Isa 29.10
9 David nynh, “Mih ccaboi tuh mih hanlan kaang lang te taphung lang tang sah, thykupawkunaw lang te liarunaw lang tang sah.Ref 11.9-10: Sam 69.22-23 (LXX)
10 Mih mit tuh ngawmuih
kho lei lan moh sah lah,
mih ke tuh zungzae ky sah,” a ci.
Zenta hae Khumnaw
11 Tuhteze Israel hae tuh phe khuliaku lan ciate a thy a pawkuh hae tou? cite ka khia. Khuliakuh khyh hae! Thuasalama Israel hae kha eiungnaw hoisah khylan mih cyiseinaw keiccuze khumnaw tuh Zenta hae kalan a thua vae.
12 Atu Israel hae cyiseinaw tuh laephi hoirumnaw lang yn tang zah mih nyaabungnaw tuh Zenta hae hoirumnaw lang a tang ze, mih balynte phe ccing lan la panbua hae sah lah, pawcihmou hoirumnaw houh alung cih!
13 Zenta hae nanning kha atu kae hopya oh. Kae tuh Zenta hae elang locceihtu ka thua thyhawte, ka ryalaw kha ka hothung,
14 tuh-e tuh ka minphuin hae kha eiungnaw hoisah khylan te minmin abang kha khumnaw ccousah khylan nynh thua.
15 Pawccecize minmin kha vuanaw tuh laephi ccungccaw hae ccawkuthuinaw lang a tang ze, minmin kha lehkhannaw tuh chinaw kyate hiinthuinaw thua lan khyh tou?
16 Thaety hawte pyapaw masaty e vaepoi alynkuhpaw kya-e beihtaraw kha athyaa ze sanlou tuh abalyn mawte athyaa cih; atharui tuh athyaa ze aran hae mah athyaa cih.
17 Aran hae abang kha khya hae zah ramkaw e oliv thingku athuapaw nang kha minmin kya ae piade hae zah aran hae ryte pynkheihlan oliv thingku kya-e atharui te athotui kha na ccoubua lanze,
18 a khya hae paw aran hae tungvaw la poonuakuh nan; na pooku ze nang nynh atharui kha na bawm khyh, atharui nynh nang kha ae bawm cipaw la ning nan.
19 Tuhteze nang nynh, “Kae kha piade khylan nynh aran hae tuh khya athua hae,” na ci cih.
20 Tuh-e tuh ahme. A zyn khyh hae keiccuze minmin tuh khya thua hae zah, nang tuh zynnaw liate kyalya nynh na thadyn. Lysakuh nan, rinaw palia kha hoi.
21 Pawccecize Pachia nynh a um typaw aran hae kha heize a haang khyh ze, nang mah ae haanglae lan khyh.
22 Tukeiccuze Pachia a thawccinaw te phe ccihtheihpaw a byapianaw kha tuatua; a khuliakuh hae paw tungvaw kya phe ccihtheih lang bya a pia hae, thuasalama nang tuh Pachia thawccinaw kya po na tyn ze, aning nynh thaw ae ccih cih; tuhzemah a thawccinaw kya na tyn khyh ze, nang mah thoh bae na thua cih.
23 Israel hae mah zyn leinaw kya po atyn khyh hae ze, piade bua athua cih hae; pawccecize Pachia tuh minmin bua piade nawlan thungnaw a hoi.
24 Pawccecize amaw po lan popaw oliv ku kyate nang kha thoh ae bae hae zah linpaw oliv ku kyakhe accawkuh lei pite piade na thua lanze, a um typaw aran hae athuapaw minmin kha mimaw oliv ku kya piadepaw tuh myarya azoihua vae cih.
Israel hae balyn Khumnaw
25 Uteno hae, naemaw na thuanaw oh laeze na hawsaku khyh nawlan oh, hynh-e byakhupaw hynh nysah kae ry oh: Zenta hae nynh khumnaw kalan phe ccing lan a tee makhia hae, Israel hae abang kya lungkhungnaw a um ung cih.
26 Israel hae balyn tuh khum athua cih hae; Ccathyaa kyaze,
“Zion mua kyate Khumtu
yn thua cih zah, aning nynh
Pachia pawlangria leinaw kha
Jakob ciihan hae kyate a vua cih.”Ref 11.26: Isa 59.20 (LXX)
27 “Mih seinaw hae kha
he ka lawpah hae te,
hynh-e hynh minmin ryte
ka raepaw ka byakinnaw nynh thua,”
cite azeiku hawte nynh thua.Ref 11.27: Jer 31.33-34
28 Thehoypaw te asekuh lante nanning keiccuze minmin tuh Pachia rhaw hae nynh thua hae; thuasalama ponaw te asekuh lante tuh minpaaw hae liate minmin tuh sungsah hae paw nynh thua hae.
29 Pawccecize Pachia lasung hae te Pachia konaw tuh rulae kho leipaw nynh thua.
30 Pawccecize langmawlya nanning tuh Pachia kaw a ngae lei hae paw na la thua oh salamah atu tuh minmin nynh kaw a ngae khyh hae keiccuze ngaethyaumsahnaw kha na mue oh hawte,
31 nanning nynh na mue oh paw ngaethyaumsahnaw liate minmin mah ngaethyaumsahnaw kha a muebua nawlan hae, minmin mah atu hynh kawngae khyh hae.
32 Pawccecize Pachia nynh ccungccaw balyn tungvaw kya ngaethyaumsahnaw kha a langsaku thya nawlan, mih balynte kawngae leinaw kya thong a saw hae.
33 Pachia hawnaw te nynaw tuh myarya ko zah akhu raria! A byapianaw hae tuh thaethya kho um khyh zah a laanpi hae tuh ny kho um khyh ccarei!Ref 11.33: Isa 55.8
34 Pawccecize Bawipaw tuanaw kha
hummou a nyh?
Tuhkhyhze hummou amaw kha
tuanaw a pya boi?Ref 11.34: Isa 40.13 (LXX)
35 Tuhkhyhze Pachia nynh
bua a pyaru nawlan,
hummou amaw kha
lasung a pyaty boi?Ref 11.35: Job 41.11
36 Pawccecize pawpaw tynre balyn tuh amaw kyate, amaw liate, amaw hanlan nynh thua. Amaw kya phu-enaw zungzae um sah. Amen.Ref 11.36: 1Ko 8.6