22
1 Te David nynh, “Hein kya hynh Bawipaw Pachia inn athua cih zah hein kya hynh Israel hanlan maee-ute silawnawpaw silawhang athua cih,” a ci.
David nynh Beikinn Sak lan A Paccyn
2 David nynh Israel ram kya um hae paw ramccang hae kha sueluaku lan kawpya hae zah Bawipaw inn saknaw hanlan lung-awtu hae kha lung aw lan a nung hae.
3 David nynh thuakaw rae nawlan te thing piadenawpaw thingkhia lang sivaw patae kha pya hae zah sohin kha mah akhin toutae lei lan ciate a pya hae,
4 sidar thing riatae lei kha a pya hae—pawccecize Sidon khuaccaaw hae te Tair khuaccaaw hae nynh David elang sidar thing patae kha a phupya hae.
5 Te David nynh, “Ka ccapaw Solomon tuh a kum no ung zah a nynaw azya ung, Bawipaw elang sakpya lanpaw inn tuh myaryamaw asi-asah umpaw, a minthaanpaw te ram hae balyn kya a phu-epaw inn athua cih; tukeiccuze tuh-e inn hanlan ka paccyn vae cih,” a ci. Tukeiccuze David nynh a chi mawkhe uccaw patae a paccyn ty vae.
Solomon te Cciakhaetu hae Byatawsyanaw
6 David nynh a ccapaw Solomon kha ko zah Bawipaw , Israel Pachia hanlan inn sakpya lan bya a tawsya.
7 David nynh Solomon kha, “Ka ccapaw, Bawipaw ka Pachia min hanlan inn sakpya lan ka paccyn vae.Ref 22.7-10: 2Sa 7.1-16; 1Sh 17.1-14
8 Thuasalama Bawipaw bya tuh ka kya yn thua zah, ‘Nang tuh rhaw patae na tuk zah chiise patae na luasah vae; laephi vawlan ka muihnaw kya chiise patae na luasah keiccuze ka min hanlan inn na sak lan khyh.
9 Dotua, ccapaw lu kheit na saah cih; aning tuh daenaw ccungccaw athua cih. A pepan e a rhaw hae balyn kyate daenaw ka pya cih; pawccecize a min tuh Solomon athua cih zah, a she lungkhu kya Israel hae kha daenaw te ccawkunaw ka pya cih hae.
10 Aning nynh ka min elang inn a sak cih. Aning tuh ka ccapaw athua cih zah kae tuh a paaw ka thua cih, a siapharan bawitungkhung tuh Israel ram kya zungzae ka tynsah cih,’ a ci.
11 Tukeiccuze ka ccapaw, nang te asekuh lante a ho vae hawte, Bawipaw na Pachia hanlan inn saknaw kya na laan na sui a ua nawlan Bawipaw tuh na kya um vae sah.
12 Nang kha Israel a do-oihtu lang rya he ae pya te, Bawipaw na Pachia phungbya kha na zui nawlan, Bawipaw nynh hawnaw te nythyanaw kha ae pya vae sah.
13 Bawipaw nynh Israel hanlan Moses kalan a pyapaw phungbya te phungzae hae kha hoyte na zui zetuh na laan na sui a ua cih. Na thawsae sah lah, na rawthung sah. Rih nan lah, na bungzou nan sah.Ref 22.13: Josh 1.6-9
14 Vawsaw tacite Bawipaw inn elang sui talent cciing kheit, ngun talent million ccangkheit, sohin te sivaw kha akhin toutae lei lan ciate ka paccyn vae, myarya lung lan a um vae; thing a-awkuhpaw te lung mah ka paccyn vae. E kyahin na paccyn chih cih.
15 Ryalahtu patae na hoi: lung-awtu hae, pazan thya hae paw, lehccama hae te aphuinphuin kya kuihhae hoy hae paw riatae lei,
16 sui, ngun, sohin te sivaw ryalawnaw kya athya hae paw kha na hoi vae hae. Atu ryalaw tho ccavae, Bawipaw tuh na kya um vae sah,” a cipya.
17 David nynh Israel cciakhaetu hae balyn kha mah a ccapaw Solomon rya bawm khylan kawpya hae zah,
18 “Bawipaw nae Pachia tuh nae kya um khyh tou? Aning nynh teitei langte balyn daenaw ae pya khyh oh tou? Pawccecize ram lungkhu um hae paw kha ka kuih kalan yn pya vae; ram tuh Bawipaw te a ccungccaw hae kuihkaw nynh a um vae.
19 Atu tuh Bawipaw nae Pachia kha nae tuanaw te nae thinlung balyn te ccung oh. Bawipaw min hanlan sakpaw inn lungkhu langkhe Bawipaw byakin thingkua te Pachia angphe athyaa hae paw kha teekhae khylan cceih oh lah, Bawipaw Pachia beikinnthyaa kha sak oh,” a cipya hae.