21
Milu Rianaw te Shethya
(2Sa 24.1-25)
1 Satan nynh Israel hae kha dou hae zah Israel ccungccaw hae kha milu ria lan David kha a tuhou.
2 Tukeiccuze David nynh Joab te rhawkaw hae uktu rhawbawi hae kha, “La cceih oh lah, Beersheba kyate Dan kyacia Israel hae kha milu la ria oh, ccungccaw hohzeihmou a um hae cipaw ka ny ccaw nae thaesah cih oh,” a cipya hae.
3 Thuasalama Joab nynh, “Bawipaw nynh a ccungccaw hae kha aleit za kheit pungzaesah vae hae sah! Siapharan ka bawipaw, minmin tuh mih balyn mawte ka bawipaw a ryalahtu hae thua khyh hae tou? Pawccemou ka bawipaw nynh hynh-e hynh na cyi ry? Pawccemou Israel hae tungvaw kya cyiseinaw na thuakhae cih?” a cipya.
4 Thuasalama siapharan bya nynh Joab kha a tae. Tukeiccuze Joab tuh cceih zah Israel ram pynpi po lekuh lan cceih zah Jerusalem lang a ki.
5 Joab nynh a riapaw ccungccaw milu ccazing abalyn kha David kalan a pya. Israel ram balyn kya thaloi a kyng khopaw cciing haw lae kheit a um hae, te Judah ram kya thaloi a kyng khopaw cciing pali thong sung sari a um hae.
6 Thuasalama Levi phin hae te Benjamin phin hae kha tuh riabia khyh hae, pawccecize siapharan nynh kaw a pyapaw kha Joab nynh papin ry khyh.
7 E ryalaw hynh Pachia nynh ry khyh zah Israel kha de a tah.
8 David nynh Pachia kha, “E rya ka lawpaw hynh myaryamaw ka sei vae. Atu namaw kalan saw ka sang, na ryalahtupaw ka cyiseinaw hynh beih yn vuapah; pawccecize myarya lepaw ngaeenaw rya kha ka lawsei vae,” a cipya.
9 Bawipaw nynh David a profehpaw Gad kha hopah zah,
10 “La cceih lah, David kyakhe, ‘Bawipaw nynh hynhte a ho: Uccaw ccangthum kae pya, tuin kya-e ccangkheit kha pokuh lah, tuh-e tuh na tungvaw ka cyih cih,’ a ci cite la hopah,” a cipya.
11 Tukeiccuze Gad nynh David kalan cceih zah, “Bawipaw nynh hynhte a ho, ‘Na rypaw pokuh:
12 kum thum lungkhu ccakanccinaw tou, tuhkhyhze sawpaw sah thum lungkhu na rhaw hae nynh nang kha deete thaloi te chiaku tou, tuhkhyhze nin thum lungkhu Bawipaw thaloi keiccu ram lungkhu kya shethya thuate Bawipaw vaawpaw nynh Israel ram pynpi po lekuh lan ro tou, poku tua,’ a ci. Kae nynh yn sawtupaw kalan ka kikhae lanpaw bya kha atu riasakuh,” a cipya.
13 Te David nynh Gad kha, “Myarya lepaw lungriathaenaw kya nynh ka um; Bawipaw kuih lungkhu lang ka ccah sah, pawccecize a thawccinaw tuh myarya ale; thuasalama ccungccaw kuih lungkhu lang ka ccah nan sah,” a cipya.
14 Tukeiccuze Bawipaw nynh Israel ram kya shethya a thuasah; Israel ram kya ccungccaw thong sung sari a chih hae.
15 Te Pachia nynh vaawpaw kha Jerusalem ro khylan a sawnua; thuasalama vaawpaw nynh vyavya a ro dyn khe, Bawipaw nynh do zah tuh-e vawsawnawpi te asekuh lante ngaesikuh zah, rohtupaw vaawpaw kha, “Azaw vae! Na kuih kha khin ccavae,” a cipya. Te Bawipaw vaawpaw tuh Jebus ccungccaw Araunah kya-e huimin pe khe a thadyn.
16 David nynh do zah vaaw te lae laku a thadynpaw Bawipaw vaawpaw kha a muih, athuaakuhpaw thaloi kha a kuih kya ccyngkuh zah Jerusalem luki langkhe a hawisah. Tetuh David te piccan hae tuh buriboei lawkute a bakhung hae.
17 David nynh Pachia kha, “Ccungccaw hae kha ria lan kaw a pyatu tuh kamaw ka thua khyh tou? A seitupaw te myarya ahoy lei lante rya a lahtu tuh kamaw nynh ka thua. E hae nynh pawmou a cyisei hae? Pou Bawipaw ka Pachia, na kuih nynh kamaw te ka paaw ciihan hae hynh oun rawse sah; thuasalama na ccungccaw hae tungvaw kya shethya beih thua nan sah, cite saw ka sang,” a cipya.
David Silawhang te Silawnaw
18 David nynh cceihthung sah lah, Jebus ccungccaw Ornan kya-e huimin kyakhe Bawipaw hanlan silawhang kha rae sah cite David kha hopya khylan Bawipaw vaawpaw nynh Gad kha kaw a pya.
19 Bawipaw min te Gad nynh a hopyapaw bya thyhte David tuh a cceihthung.
20 Ornan nynh chanvuih a tin cciamang lyakhe do zah vaawpaw kha a muih, amaw kya um hae paw a ccapaw hae lu pali tuh zya a rekuh hae.
21 David nynh Ornan kalan a ccia lyakhe Ornan nynh do zah David kha he a muih tuh, huimin kyate cceih zah a mae kha laekhu kya bakhung zah David kha sawtuanaw a pya.
22 David nynh Ornan kha, “Ccungccaw hae kya shethya hynh adae ccaw cite, Bawipaw hanlan silawhang ka raepya nawlan na huimin a umnaw hmin hynh amee aphu thyhte yn pya,” a cipya.
23 Ornan nynh David kha, “Lawkuh ccaleih; siapharan ka bawipaw nynh ahoy na ci hawte cyih ccaleih; dotua, maee-ute silawnaw lanpaw tangnuapaw hae, maeething lanpaw tuh looh tinnawpaw thing te ccathae silawnaw lanpaw chanvuih hae hynh kae pya. Abalyn mawte kae pya,” a cipya.
24 Thuasalama David nynh Ornan kha, “Thua khyh; tuh-e hae tuh amee aphu thyhte kae re cih. Bawipaw hanlan na uccaw kha ka lawkuh lan khyh, amee pya leipaw maee-ute silawnaw kha mah ka rae lan khyh,” a cipya.
25 Tukeiccuze David nynh Ornan kha tuh-e hmin mee lang sui shekel za taruh kha toupah zah a pya.
26 David nynh tuin kyakhe Bawipaw elang silawhang kha rae zah, maee-ute silawnaw te ccawkunaw silawnaw kha a rae. Bawipaw kha ko zah, maee-ute silawnawpaw silawhang vawlan khe vaawlang te yn ccahpaw maee khate Bawipaw nynh aphi a pya.
27 Bawipaw nynh vaawpaw kha kawpya zah, a thaloi tuh a bu kalan bua a sang.
Beikinn hanlan Hmin Ponaw
28 Tuh ccyh lyakhe, Jebus ccungccaw Ornan kya-e huimin kyakhe Bawipaw nynh a leihrupaw kha David nynh he a muih tuh, tuin kyakhe silawnaw a rae.
29 Moses nynh ramkaw kya a raepaw Bawipaw beikbu te maee-ute silawnawpaw silawhang tuh tuh-e ccyh lyakhe Gibeon khua e ahangnaw hmin khe nynh a um;
30 thuasalama David nynh Bawipaw kha byakhia khylan tuh-e silawhang malang khe cceih ngan khyh, pawccecize Bawipaw vaawpaw kya-e thaloi raw kha a rih.