SAM 38
Vawsaw Tungpaw elang Sawsangnaw
David Hlaw
1 Pou Bawipaw , thinriate
yn pe nan,
thin-ute yn thuihei nan.
2 Pawccecize na the hae nynh
ka lungkhu lang yn thuing zah,
ka tungvaw na kuih nae sawnua vae.
3 Na thinria keiccuze
ka pyn kya dannaw um khyh;
ka seinaw keiccuze
ka ru kya dannaw um khyh.
4 Ka seinaw nynh ka lu yn vu vae;
tuh-e tuh phupaw ripaw hawte
ka hanlan myaryamaw ari.
5 Ka ngaeenaw keiccuze
ka vaemaw tuh ccihthung zah
anae akhua;
6 baruh ka bakhung zah
phe ka dawleihkuh;
anin ninlang rawkhuite ka khiakuh.
7 Ka tae tuh sozazaepaw vaemaw te
phe bia keiccuze,
ka pyn kya dannaw um khyh.
8 Ka thawthang zah, phe ka kinkuh;
ka lungriathae keiccuze
ka hawkhaekuh.
9 Pou Bawipaw , ka rypaw balyn tuh
marya na ny;
ka hawkhaekupaw roi tuh
na kyate thuruh kho thua khyh.
10 Ka bung tuh thyngkuh zah
ka thawthang;
ka mit tuh ngawmuih vae khyh.
11 Ka ruiban hae te kae ccawkuh hae paw nynh
ka vaemaw keiccuze yn sibia hae zah,
ka innpaw hae nynh mah
yn naekuh vae khyh hae.
12 Ka hiinnaw yn hawkuh hae paw nynh
kaang yn syakhaw hae;
Vawsawnaw pya yn ry hae paw nynh
kae kha ro lanpaw byaho hae zah,
anin ninlang ling lanpaw kha
a paccyn hae.
13 Thuasalama kae tuh
a nawpanpaw hawte
ka thua zah, ka thae khyh;
bya a ho kho leipaw hawte nynh ka thua.
14 Naw a thae leipaw hawte
ka thua ccaccing zah,
bya a khung kho leipaw hawte nynh ka thua.
15 Thuasalama, pou Bawipaw ,
nang kha kae ngaehoiku;
Pou Bawipaw ka Pachia,
nang tuh bya yn leihru cih paw nynh na thua.
16 “Minmin tuh ka tungvaw
mih lungtua nan sah,
ka ccu a thei lyakhe kae kha
rawsete yn poonuakuh nan hae sah,”
cite saw ka sang.
17 Pawccecize vyavya ka khuliakuh zah,
ka ngesaw ccinaw tuh
ka kya phang a um.
18 Ka seinaw kha ka phyku;
ka seinaw keiccuze ka ngaethah.
19 Ka rhaw hae tuh akonglang
um leite mih thawsae,
asuilan um leite yn huapaw
patae a um hae.
20 Ahoypaw kha ka zui keiccuze
hoynaw kha hoyleinaw te
yn liaru hae paw tuh
ka rhaw hae nynh thua hae.
21 Pou Bawipaw , beih yn vua nan;
Pou ka Pachia, kae te beih sawkuh nan;
22 Yn khumtupaw, pou Bawipaw ,
rangsakute beih yn bawmtua.