SAM 37
David nynh A Doliakunaw
David Hlaw
1 Ccungccaw hoyleipaw keiccuze
na thinphang nan sah;
hoyleinaw a raetu hae tungvaw
na eiung nan sah,
2 pawccecize aro mawze lonua hawte
a zo cih hae zah,
ahinpaw aku anaan hawte
anaan cih hae.
3 Bawipaw kha doliakuh lah,
hoynaw kha raetua;
tetuh ram lungkhu kya na um cih zah,
khyndadyh lan na lungtua cih.
4 Bawipaw kya na lungryccing sah,
na thinlung nynh a rypaw kha ae pya cih.
5 Na hiinnaw kha Bawipaw kalan aptua,
amaw kha doliakuh lah, ae cyipah cih.
6 Na dingnaw kha awnaw hawte
a awsah cih zah,
ahmete na cyipaw kha
ninthu hawte a awsah cih.
7 Bawipaw malang daebabi lan um lah,
amaw kha lungsaete ngawtua;
mih hiinnaw kya mih laan mih sui
ua hae paw, ahoy leipaw
paccynnaw rya a lah hae paw keiccuze
na thinphang nan sah.
8 Thinrianaw kha sungkuh lah,
thin-unaw kha vuatua.
Thinphangte um nan, tuh-e nynh
hoyleinaw kyalya kha a thuakhae.
9 Ccungccaw hoylei hae paw kha
vua athua cih hae,
thuasalama Bawipaw
a ngaehoikuh hae paw tuh
ram kha rho lang a ccou cih hae.
10 Sosoh kyakhe, ccungccaw hoylei hae paw tuh
um vae lan khyh hae;
mih umnaw kha hoyte na do zemah,
tuin kya na muih vae lan khyh hae.
11 Thuasalama thinlung ane hae paw tuh
ram kha rho lang a ccou cih hae zah,
myarya lepaw daenaw kyakhe
mih lungry accing cih.Ref 37.11: Mat 5.5
12 Ccungccaw hoyleipaw nynh
midingpaw kha rawsete khuakhankuh zah,
a haw kha a zynua;
13 thuasalama Bawipaw nynh tuh
ccungccaw hoylei hae paw kha a nuinse hae,
pawccecize mih ccyh
yn thua lanpaw kha a ny.
14 Ccungccaw hoylei hae paw nynh ryachi hae te
minyaa hae kha khulia khylan te,
kyhrarih lan a hiin hae paw kha chia khylan,
thaloi kha thuaakuh hae zah,
mih li kha a sue hae;
15 mih thaloi nynh mimaw bung kha
a thuing cih zah,
mih li hae kha khyapya athua cih.
16 Miding nynh a hoipaw beihtaraw tuh
ccungccaw hoyleipaw nynh
a hoipaw patae laeze ahoyhua.
17 Pawccecize ccungccaw hoyleipaw
kuih tuh khya athua cih,
thuasalama Bawipaw nynh
midingpaw kha a thungkhaw cih.
18 Bawipaw nynh ccaenaw
um lei hae paw ccyh kha
nyh zah, mih rho tuh zungzae atyn cih;
19 ccyh hoyleipaw kya
maethyanaw mue khyh hae,
ccakan acci lya ae lanpaw kha
alaelui lan a hoi hae.
20 Thuasalama ccungccaw hoylei
hae paw tuh a roh cih hae,
Bawipaw rhaw hae tuh ramkaw e
lonua phu-enaw te nynh aloku hae,
maeekhuh hawte azo cih hae.
21 Ccungccaw hoyleipaw nynh tuh
laebah kha lah zah sangru khyh,
thuasalama miding hae tuh
hysahnaw hoi hae zah, leih a pya hae;
22 Bawipaw hythuanaw
a ccou hae paw nynh
ram kha rho lang a ccou cih hae,
thuasalama amaw nynh
thya a law hae paw tuh vua athua cih hae.
23 Ccungccaw nynh a ccianawpaw laanpi kha
Bawipaw nynh a lungrythua ze,
a laanpi kha a tynsah pya;
24 a thyku zemah khuliakuh lan khyh,
pawccecize Bawipaw nynh
a kuih kha phang a kyng.
25 Atu tuh ka taw vae zah ka no vae khyh,
tuhzemah miding kha
vua athuapaw ka muih boi khyh,
a ccaaw hae nynh looh
a ngiaku hae paw kha mah
ka muih boi khyh.
26 Aning nynh lung-uate
leih pya zungzae hae zah,
a koiisaku zungzae hae,
te a ccaaw hae tuh hythuanaw
a ccou hae paw lang a tang hae.
27 Hoyleinaw kha cciataw lah,
hoynaw kha raetua;
tetuh zungzae na um vae cih.
28 Pawccecize Bawipaw nynh byading kha a ry;
alungzipaw a mithyaa hae kha
vua lan khyh hae.
Miding hae tuh zungzae khynsah athua cih hae,
thuasalama ccungccaw hoyleipaw
a ccaaw hae kha tuh vua athua cih hae.
29 Miding hae nynh ram kha rho lang
a ccou cih hae zah,
tuin kya zungzae a um cih hae.
30 Miding hae khalang nynh
hawnaw bya kha ho zah,
mih lae nynh byading kha a ho.
31 Mih Pachia kawbya tuh
mih thinlung kya a um;
mih laanpi tuh naw khyh.
32 Ccungccaw hoyleipaw nynh
midingpaw kha buhkhaw zah,
chia lan a ccung.
33 Thuasalama Bawipaw nynh midingpaw kha
ccungccaw hoyleipaw
kuih kalan vua lan khyh,
byapia lan a cciakhae hae ze,
seibenaw ing lan khyh.
34 Bawipaw kha ngaehoikuh lah,
a laanpi kha zuitua,
ram kha rho lang ccou khylan
ae hangthung cih;
ccungccaw hoylei hae paw tuh
ro athua hae paw kha na muih cih.
35 A rysawthahpaw ccungccaw hoyleipaw kha
ka muih vae, aning tuh Lebanon e
sidar thingku hawte
ming hae laeze a hangsakuh hua.
36 Nyalang a pepan
bua ka cceih tuh, um vae khyh;
ka ccung zahmah ka muih kho vae khyh.
37 Ccaenaw um leipaw ccungccaw kha
syntawnaw rae lah,
midingpaw kha dotua,
pawccecize daebabipaw ccungccaw tuh
ccaawno a hoi.
38 Thuasalama misei hae tuh
khaleih ro athua cih hae;
ccungccaw hoylei hae paw
mih ccaawno hae tuh vua athua cih hae.
39 Miding hae kya-e khumnaw tuh
Bawipaw kyate nynh yn thua;
aning tuh vawsaw ccyh lya
mih khynnaw nynh thua.
40 Bawipaw nynh minmin kha
bawm hae zah, a luesah hae;
amaw kya a reku hae keiccuze,
ccungccaw hoylei hae paw kyate
luesah hae zah, a khum hae.